சர்வதேச கடல்வழி வர்த்தகத்தில் மிக முக்கியத்துவம் வாய்ந்த செங்கடலின் பாப் எல்-மண்டேப் (Bab el-Mandeb) நீரிணைப் பகுதியிலிருந்து சவுதி ஆதரவு பெற்ற ஏமன் அரசுப் படைகள் ஞாயிற்றுக்கிழமை (நவம்பர் 15) பின்வாங்கியுள்ளன. இதன் மூலம், ஈரான் ஆதரவு பெற்ற ஹவுதி கிளர்ச்சியாளர்கள் இந்த முக்கியக் கடல்வழிப் பகுதியின் முழுமையான கட்டுப்பாட்டைத் தங்கள் வசம் கொண்டு வந்துள்ளனர்.
துபாப் (Dhubab) விமான நிலையம் மற்றும் பாப் எல்-மண்டேப் பகுதிகளில் இருந்து தங்கள் படைகளைத் திரும்பப் பெற்று, ஏமனின் தற்காலிகத் தலைநகரான ஏடன் மற்றும் அதன் அண்டை மாகாணங்களின் பாதுகாப்பை வலுப்படுத்தும் பணியில் ஈடுபட்டுள்ளதாகத் தெற்கு ஆயுதப் படைகள் அறிக்கை வெளியிட்டுள்ளன. துபாப் முதல் கோர் அமிரா வரை சுமார் 150 கிலோமீட்டருக்கும் அதிகமான கடற்கரைப் பகுதிகளைத் தங்கள் கட்டுப்பாட்டில் கொண்டு வந்துள்ளதாக ஹவுதி ராணுவ வட்டாரங்கள் உறுதிப்படுத்தியுள்ளன.
உலகளாவிய வர்த்தகத்தில் சுமார் 10 சதவீதமும், சர்வதேச கச்சா எண்ணெய் போக்குவரத்தில் 5 முதல் 7 சதவீதமும் இந்த நீரிணை வழியாகவே நடைபெறுவதால், இந்த மாற்றம் சர்வதேச அளவில் பெரும் தாக்கத்தை ஏற்படுத்தியுள்ளது. குறிப்பாக, ஹார்முஸ் நீரிணைப் பகுதியில் ஏற்பட்டுள்ள நெருக்கடியால் சவுதி அரேபியா தனது எண்ணெய் ஏற்றுமதிக்குச் செங்கடல் வழியையே அதிகம் நம்பியிருந்த நிலையில், ஏமன் அரசுப் படைகளின் இந்தப் பின்னடைவு முக்கியத்துவம் பெற்றுள்ளது.
ஏடன் நகரிலிருந்து சுமார் 60 கிலோமீட்டர் தொலைவு வரை ஹவுதி படைகள் முன்னேறியுள்ளதால், ஏடன் நகரைச் சுற்றி மணல் மூட்டைகள் அடுக்கியும் சுரங்கங்கள் அமைத்தும் அரசுப் படைகள் பாதுகாப்பு ஏற்பாடுகளைத் தீவிரப்படுத்தியுள்ளன. இதற்கிடையில், ஹவுதி கிளர்ச்சியாளர்களின் முற்றுகையில் உள்ள தாயிஸ் (Taiz) நகரை மீட்பதற்கான ராணுவ நடவடிக்கைகள் தொடர்ந்து நடைபெறும் என ஏமன் அரசுத் தரப்பில் தெரிவிக்கப்பட்டுள்ளது.