இந்தியாவின் ராணுவ பலத்தை மேலும் வலுப்படுத்தும் நோக்கில், அப்பாச்சி ரக ஹெலிகாப்டர்கள் மற்றும் M777 அல்ட்ரா-லைட் ஹோவிட்சர் பீரங்கிகளுக்கான 428 மில்லியன் டாலர் (சுமார் ₹3,500 கோடிக்கும் அதிகம்) மதிப்பிலான பாதுகாப்பு ஆதரவுச் சேவைகளை வழங்க அமெரிக்க வெளியுறவுத்துறை ஒப்புதல் அளித்துள்ளது. இது புதிய ஆயுதங்களை வாங்குவதற்கான ஒப்பந்தம் அல்ல; ஏற்கனவே இந்திய ராணுவத்தில் பயன்பாட்டில் இருக்கும் அதிநவீன ஆயுதங்களின் செயல்பாட்டுத் திறனை நீண்ட காலத்திற்குத் தக்கவைப்பதற்கான ஒரு முக்கிய பராமரிப்பு மற்றும் தொழில்நுட்ப ஆதரவு ஒப்பந்தமாகும்.
அமெரிக்காவின் இந்த ராணுவ உதவித் திட்டம் இரு பிரிவுகளாகச் செயல்படுத்தப்பட உள்ளது. இதில், இந்திய விமானப்படை மற்றும் ராணுவத்தில் உள்ள AH-64E அப்பாச்சி ரக போர் ஹெலிகாப்டர்களின் தொழில்நுட்பப் பராமரிப்பிற்காக 198.2 மில்லியன் டாலர் ஒதுக்கப்பட்டுள்ளது. இதற்கான முதன்மைப் பொறுப்பை போயிங் (Boeing) மற்றும் லாக்ஹீட் மார்ட்டின் (Lockheed Martin) நிறுவனங்கள் ஏற்கின்றன. அதேபோல, எல்லைப் பகுதிகளில் பாதுகாப்புப் பணியில் ஈடுபடுத்தப்பட்டுள்ள 145 M777A2 ரக ஹோவிட்சர் பீரங்கிகளின் நீண்ட காலப் பராமரிப்புக்காக 230 மில்லியன் டாலர் ஒதுக்கப்பட்டுள்ளது. இதன் முதன்மை ஒப்பந்தக்காரராக பிரிட்டனைச் சேர்ந்த பிஏஇ சிஸ்டம்ஸ் (BAE Systems) நிறுவனம் செயல்படவுள்ளது.
இந்த ஒப்பந்தத்தின் கீழ் இந்தியாவின் அப்பாச்சி ஹெலிகாப்டர்கள் மற்றும் பீரங்கிப் படைகளுக்குத் தேவையான உதிரிப் பாகங்கள், பழுது நீக்கும் வசதிகள், பொறியியல் மற்றும் லாஜிஸ்டிக்ஸ் உதவிகள், தொழில்நுட்பத் தரவுகள் மற்றும் ராணுவ வீரர்களுக்கான சிறப்புப் பயிற்சிகள் வழங்கப்பட உள்ளன. குறிப்பாக, சீன மற்றும் பாகிஸ்தான் எல்லைகளில் உள்ள இமயமலை போன்ற சவாலான மலைப்பகுதிகளில் பயன்படுத்தப்படும் M777 பீரங்கிகளின் தயார் நிலையை மேம்படுத்த இந்த லாஜிஸ்டிக்ஸ் ஆதரவு பெரிதும் உதவும் என பாதுகாப்புத் துறை வல்லுநர்கள் தெரிவிக்கின்றனர்.
இந்தியா-அமெரிக்கா இடையிலான மூலோபாயப் பங்களிப்பை இந்த ஒப்பந்தம் மேலும் வலுப்படுத்தும் என்று அமெரிக்க வெளியுறவுத்துறை தெரிவித்துள்ளது. இந்த விநியோகம் பிராந்தியத்தின் அடிப்படை ராணுவ சமநிலையை மாற்றாது என்றும், தற்போதைய மற்றும் எதிர்கால அச்சுறுத்தல்களை எதிர்கொள்ளவும், நாட்டின் பாதுகாப்பை உறுதிப்படுத்தவும் இந்தியாவுக்கு இது உதவும் என்றும் வாஷிங்டன் குறிப்பிட்டுள்ளது. இந்தத் திட்டத்தின் மூலம் அமெரிக்காவின் பாதுகாப்புத் தயார் நிலைக்கு எந்தப் பாதிப்பும் ஏற்படாது என்றும் அமெரிக்கா தெளிவுபடுத்தியுள்ளது.
