கடந்த 2009-ஆம் ஆண்டு பிரேசில் நாட்டின் ரியோ டி ஜெனிரோ நகரில் இருந்து பிரான்ஸ் தலைநகர் பாரிஸிற்கு 216 பயணிகள் மற்றும் 12 ஊழியர்களுடன் புறப்பட்ட ஏர் பிரான்ஸ் நிறுவனத்தின் ‘ஏஎஃப் 447’ (AF447) விமானம் அட்லாண்டிக் பெருங்கடலில் விழுந்து விபத்துக்குள்ளானது. பிரான்ஸ் வான்வழிப் போக்குவரத்து வரலாற்றிலேயே மிக மோசமான இந்த விபத்தில், விமானத்தில் இருந்த 228 பேரும் பரிதாபமாக உயிரிழந்தனர். இந்த கோர விபத்து நடந்து 17 ஆண்டுகள் நிறைவடைய உள்ள நிலையில், பாரிஸ் மேல்முறையீட்டு நீதிமன்றம் இந்த வழக்கில் இன்று வரலாற்றுச் சிறப்புமிக்க அதிரடித் தீர்ப்பை வழங்கியுள்ளது.
இந்த வழக்கை விசாரித்த பாரிஸ் நீதிமன்றம், விபத்துக்குக் காரணமான ஏர்பஸ் (Airbus) விமானத் தயாரிப்பு நிறுவனம் மற்றும் ஏர் பிரான்ஸ் (Air France) விமான நிறுவனம் ஆகிய இரு நிறுவனங்களுமே அலட்சியமாகச் செயல்பட்டதாகக் கூறி, அவற்றை ‘கார்ப்பரேட் நரபலி’ (Corporate Manslaughter) குற்றவாளிகள் என அறிவித்துள்ளது. முன்னதாக 2023-ஆம் ஆண்டில் கீழ் நீதிமன்றம் இந்த இரு நிறுவனங்களையும் குற்றச்சாட்டுகளில் இருந்து விடுவித்திருந்த நிலையில், தற்போது மேல்முறையீட்டு நீதிமன்றம் அந்த தீர்ப்பைத் தலைகீழாக மாற்றி, இரு நிறுவனங்களுக்கும் தலா 2,25,000 யூரோக்கள் (சுமார் 2.6 லட்சம் அமெரிக்க டாலர்கள்) அபராதம் விதித்து உத்தரவிட்டுள்ளது.
பசிபிக் மற்றும் அட்லாண்டிக் பெருங்கடல் பகுதிகளில் ஏற்பட்ட கடுமையான புயலின் போது, விமானத்தின் வேகம் மற்றும் உயரத்தைக் கணக்கிடும் ‘பிடோட் ட்யூப்ஸ்’ (Pitot Tubes) என்ற வெளிப்புறக் கருவிகள் பனிக்கட்டிகளால் உறைந்து பழுதடைந்ததுதான் இந்த விபத்தின் தொடக்கப்புள்ளியாக அமைந்தது என்று விசாரணையில் கண்டறியப்பட்டது. இதனால் விமானத்தின் தானியங்கி இயக்கம் (Autopilot) செயலிழந்த போது, விமானத்தை எப்படிக் கையாள்வது என்று தெரியாமல் விமானிகள் தடுமாறியுள்ளனர். இதனால் கட்டுப்பாட்டை இழந்த ஏர்பஸ் ஏ330 (Airbus A330) விமானம், 38,000 அடி உயரத்தில் இருந்து வெறும் மூன்றரை நிமிடங்களில் கடலுக்குள் தலைகீழாகப் பாய்ந்து மூழ்கியது.
இந்த வழக்கில் தீர்ப்பளித்த நீதிபதிகள், வேகம் காட்டும் கருவிகளில் ஏற்படும் கோளாறுகள் குறித்து ஏர்பஸ் நிறுவனம் விமான நிறுவனங்களுக்குச் சரியான எச்சரிக்கைகளை வழங்கத் தவறிவிட்டதாகவும், அதே நேரத்தில் இத்தகைய அவசரக் கால தொழில்நுட்பக் கோளாறுகளைச் சமாளிப்பதற்கான தகுந்த பயிற்சியை ஏர் பிரான்ஸ் நிறுவனம் தனது விமானிகளுக்கு வழங்கவில்லை என்றும் குற்றம் சாட்டியுள்ளனர். நீதிமன்றத்தின் இந்த அபராதத் தொகை இரு நிறுவனங்களின் வருவாயோடு ஒப்பிடுகையில் மிகச் சிறியது என்றாலும், 17 ஆண்டுகளாகத் தங்களின் உறவினர்களை இழந்து தவித்த 33 நாடுகளைச் சேர்ந்த பாதிக்கப்பட்ட குடும்பத்தினருக்கு இந்த தீர்ப்பு ஒரு தார்மீக வெற்றியாகவும் நீதியாகவும் பார்க்கப்படுகிறது.
