கியூபாவின் முன்னாள் அதிபரும், நீண்டகால கம்யூனிச சர்வாதிகாரியுமான 94 வயது ரவுல் காஸ்ட்ரோவுக்கு (Raúl Castro) எதிராக அமெரிக்க நீதித்துறை பல்வேறு கொலைக் குற்றச்சாட்டுகளின் கீழ் குற்றப்பத்திரிகை தாக்கல் செய்துள்ளது. கடந்த 1996 ஆம் ஆண்டில், அமெரிக்க குடிமக்கள் பயணித்த இரண்டு சிவிலியன் விமானங்களை கியூபா ராணுவம் சுட்டு வீழ்த்தியதில் 4 பேர் உயிரிழந்தனர். இந்த கொடூரமான தாக்குதலுக்கு ரவுல் காஸ்ட்ரோவே நேரடி உத்தரவிட்டார் என்ற ஆதாரங்களின் அடிப்படையில் தற்போது டொனால்ட் டிரம்ப் தலைமையிலான அமெரிக்க அரசு இந்த அதிரடி சட்ட நடவடிக்கையை மேற்கொண்டுள்ளது.
அமெரிக்காவின் ஸ்டேட்டன் தீவு (Staten Island) பிரதிநிதியான நிகோல் மல்லியோடாக்சிஸ் (Nicole Malliotakis) மற்றும் அவரது குடியரசுக் கட்சி சகாக்கள் வாஷிங்டனில் இதற்கான கூட்டு செய்தியாளர் சந்திப்பை நடத்தினர். அப்போது பேசிய அவர்கள், வெனிசுலா அதிபர் நிக்கோலஸ் மதுரோவை (Nicolás Maduro) அமெரிக்க ராணுவம் தங்களுக்குரிய பாணியில் பிடித்து வந்து சட்டத்தின் முன் நிறுத்தியதை சுட்டிக்காட்டினர். அதேபோல, அமெரிக்க குடிமக்களைக் கொன்ற சர்வாதிகாரி ரவுல் காஸ்ட்ரோவையும் கியூபாவில் இருந்து உடனடியாக அமெரிக்க ராணுவம் மூலமாக இழுத்து வந்து, அமெரிக்க நீதிமன்றத்தில் நிறுத்தி தகுந்த நீதி வழங்க வேண்டும் என்று அவர்கள் வலியுறுத்தியுள்ளனர்.
இந்த குற்றப்பத்திரிகை அறிவிப்பை அமெரிக்காவின் தற்போதைய வெளியுறவுத்துறை அமைச்சர் மார்கோ ரூபியோ மற்றும் பிற உயர்மட்ட அதிகாரிகள் வரவேற்றுள்ளனர். முந்தைய கிளிண்டன் மற்றும் ஒபாமா அரசுகள் கியூபாவுடன் சமரசம் செய்ய முயன்ற நிலையில், டிரம்ப் அரசு தற்போது கியூபா கம்யூனிச ஆட்சிக்கு கடுமையான அழுத்தத்தை கொடுத்து வருகிறது. வெனிசுலாவைத் தொடர்ந்து கியூபாவிலும் ஆட்சி மாற்றத்தை ஏற்படுத்துவதே அமெரிக்காவின் இந்த தீவிர நடவடிக்கையின் முக்கிய நோக்கமாக பார்க்கப்படுகிறது.
மறுபுறம், அமெரிக்காவின் இந்த குற்றச்சாட்டை கியூபாவின் தற்போதைய அரசு முற்றிலும் மறுத்துள்ளது. இது சட்டபூர்வமான அடிப்படை இல்லாத ஒரு அரசியல் சூழ்ச்சி என்றும், அமெரிக்கா தங்கள் நாட்டின் மீது படையெடுக்க திட்டமிடுவதாகவும் கியூபா குற்றம் சாட்டியுள்ளது. அமெரிக்காவின் இந்த அதிரடி நகர்வு, கரீபியன் பிராந்தியத்தில் பெரும் ராணுவ மற்றும் அரசியல் பதற்றத்தை ஏற்படுத்தியுள்ளது.
