கோவை மாவட்டம் சூலூர் அருகே 10 வயது சிறுமி கடத்தப்பட்டு, பாலியல் வன்கொடுமை செய்து கொலை செய்யப்பட்ட கொடூர சம்பவம் தமிழகம் முழுவதும் பெரும் அதிர்வலைகளை ஏற்படுத்தியுள்ளது. இந்த வழக்கில் இரண்டு நபர்களைக் காவல்துறையினர் ஏற்கனவே கைது செய்துள்ளனர். இச்சூழ்நிலையில், உயிரிழந்த சிறுமியின் குடும்பத்தினரை நேரில் சந்தித்து ஆறுதல் கூறிய தமிழக வெற்றிக் கழக (தவெக) அரசின் பிற்படுத்தப்பட்டோர் நலத்துறை அமைச்சர் சம்பத்குமார், சிறுமி மாயமானது குறித்து காவல்துறைக்கு புகார் வருவதற்கு முன்பே இந்தத் துரதிஷ்டவசமான கொலைச் சம்பவம் அரங்கேறிவிட்டது என்று செய்தியாளர்களிடம் தெரிவித்துள்ளார்.
அமைச்சர் சம்பத்குமார் செய்தியாளர்களிடம் பேசுகையில், சிறுமி மாயமானது குறித்து குடும்பத்தினர் தரப்பில் இருந்து இரவு 8 முதல் 9 மணியளவில் தான் காவல் நிலையத்தில் புகார் அளிக்கப்பட்டுள்ளது என்று குறிப்பிட்டார். ஆனால், எங்களுக்குக் கிடைத்துள்ள முதற்கட்ட தகவல்களின்படி, சிறுமி காணாமல் போன ஒரு மணி நேரத்திற்குள்ளாகவே, அதாவது புகார் அளிக்கப்படுவதற்கு முன்பாகவே இந்தக் கொடூரச் சம்பவம் நடந்து முடிந்துவிட்டதாக அவர் வேதனை தெரிவித்தார். இந்த வழக்கில் காவல்துறையினர் மிகத் துரிதமாகச் செயல்பட்டுக் குற்றவாளிகள் இருவரையும் கைது செய்து நீதிமன்றக் காவலுக்கு அனுப்பியுள்ளனர் என்றும் அவர் கூறினார்.
பெண்கள் மற்றும் குழந்தைகளின் பாதுகாப்பில் தவெக அரசு எவ்வித சமரசமும் செய்து கொள்ளாது என்று திட்டவட்டமாகத் தெரிவித்த அமைச்சர், இந்த வழக்கில் மிக விரைவில் குற்றப்பத்திரிகை தாக்கல் செய்யப்பட்டு குற்றவாளிகளுக்குச் சட்டப்படி உச்சபட்ச தண்டனை பெற்றுத்தரப்படும் என்று உறுதி அளித்துள்ளார். மேலும், இனிவரும் காலங்களில் குற்றம் செய்பவர்களுக்குச் சட்டத்தின் மீது கடுமையான பயம் இருக்க வேண்டும் என்றும், பாதிக்கப்பட்ட சிறுமியின் குடும்பத்தினருக்கு முதலமைச்சர் சி. ஜோசப் விஜய் விரைவில் உரிய நிவாரணத் தொகையை அறிவிப்பார் என்றும் அவர் தெரிவித்தார்.
தமிழகத்தில் பெண்களின் பாதுகாப்பை உறுதி செய்யும் வகையில், வருகிற மே 27-ஆம் தேதி முதல் “சிங்கப்பெண்கள் பாதுகாப்பு திட்டம்” மாநிலம் முழுவதும் நடைமுறைப்படுத்தப்பட வாய்ப்புள்ளதாக அமைச்சர் சம்பத்குமார் இந்த சந்திப்பின் போது பெரிய அப்டேட் ஒன்றை வெளியிட்டார். இத்திட்டத்தின் கீழ் குற்றச் சம்பவங்கள் அதிகம் நடக்கக்கூடிய பகுதிகள் கண்டறியப்பட்டு, கண்காணிப்புப் பணிகள் தீவிரப்படுத்தப்படும் என்றும், ஆர்டிஓ மற்றும் காவல்துறையினர் மூலம் பொதுமக்களுக்கு விழிப்புணர்வுப் பிரச்சாரங்கள் மேற்கொள்ளப்படும் என்றும் அவர் விரிவாக விளக்கமளித்தார்.
