துருக்கியின் மத்திய தரைக்கடல் பகுதியில், பிரிட்டிஷ் சுற்றுலாப் பயணிகள் உட்பட 148 பேருடன் சென்ற கடற்கொள்ளையர் கருப்பொருள் (Pirate-themed) கொண்ட ஒரு பிரம்மாண்ட பார்ட்டி படகு திடீரென கடலில் மூழ்கிய சம்பவம் சர்வதேச அளவில் பெரும் பரபரப்பை ஏற்படுத்தியுள்ளது. ‘பிக் பாஸ் டைமண்ட்’ (Big Boss Diamond) என்று அழைக்கப்படும் இந்த சொகுசுப் படகு, துருக்கியின் புகழ்பெற்ற சுற்றுலாத் தலமான பாரடைஸ் தீவு (Paradise Island) அருகே உள்ள அக்வாரியம் வளைகுடா (Akvaryum Bay) பகுதியில் பயணித்துக் கொண்டிருந்தபோது இந்த விபத்து நேரிட்டுள்ளது.
அதிவேகமாகப் படகிற்குள் கடல் நீர் புகுந்ததால், அது ஒரு சில நிமிடங்களிலேயே கடலுக்குள் மூழ்கத் தொடங்கியது. இதனால் படகில் இருந்த பயணிகள் மரண பயத்தில் அலறியடித்துள்ளனர். படகு செங்குத்தாகச் சரியத் தொடங்கியதும், அதில் இருந்த 20 குழந்தைகள் உட்பட 148 பயணிகள் தங்களின் உயிரைக் காத்துக் கொள்ள கடலுக்குள் பாய்ந்து குதிக்கும் பதைபதைக்கும் வீடியோ காட்சிகள் சமூக வலைத்தளங்களில் வெளியாகி வைரலாகி வருகின்றன. மேலும் சிலர் படகின் மேல் கூரை மற்றும் கயிறுகளைப் பிடித்துக்கொண்டு தொங்கியபடி மரணப் போராட்டம் நடத்தினர்.
விபத்து குறித்துத் தகவல் அறிந்ததும் முக்லா மாகாண அரசு (Muğla Governorship) மற்றும் துருக்கியின் கடலோரக் காவல்படையினர் அதிவேக மீட்புக் கப்பல்கள் மற்றும் ஹெலிகாப்டர்களுடன் சம்பவ இடத்திற்கு விரைந்தனர். மேலும், அந்தப் பகுதியில் பயணித்துக் கொண்டிருந்த பிற சுற்றுலாப் படகுகளும் உடனடியாக மீட்புப் பணியில் கைகோர்த்தன. இந்த அதிவேக கூட்டு மீட்பு நடவடிக்கையின் காரணமாக, கடலில் தத்தளித்துக் கொண்டிருந்த பிரிட்டிஷ் சுற்றுலாப் பயணிகள் மற்றும் குழந்தைகள் உட்பட 148 பேரும் ஒரு சிறு காயமுமின்றி அதிர்ஷ்டவசமாக உயிரோடு மீட்கப்பட்டு கரைக்குக் கொண்டு வரப்பட்டனர்.
துருக்கியின் மிகப்பெரிய கடற்கொள்ளையர் பாணி படகு என்று விளம்பரப்படுத்தப்பட்ட இந்த சொகுசுப் படகு, சுற்றுலாப் பயணிகளுக்கு மதுபானங்கள் மற்றும் களியாட்டங்களுடன் தீவுகளுக்கு இடையே பயணம் வழங்கும் சேவையைச் செய்து வந்தது. விபத்திலிருந்து தப்பிய பிரிட்டிஷ் சுற்றுலாப் பயணி ஒருவர், “நாங்கள் உயிரோடு திரும்பியதே மிகப்பெரிய விஷயம்” எனத் தனது அதிர்ச்சியை வெளிப்படுத்தியுள்ளார். விபத்து நடந்த ஒரு மணி நேரத்திற்குள் அந்தப் படகின் பாய்மரக் கம்புகள் தவிர ஒட்டுமொத்தப் பகுதியும் நீல நிறக் கடலுக்குள் மூழ்கிப் போனது குறித்துத் துருக்கி அதிகாரிகள் தீவிர விசாரணை மேற்கொண்டு வருகின்றனர்.
