ரஷ்ய எல்லைக்குள் புகுந்து அதிரடி: ஏவுகணை அமைப்புகளை அழித்த உக்ரைன் ட்ரோன்கள்!

ரஷ்யாவுடனான போர் தீவிரமடைந்து வரும் நிலையில், உக்ரைன் ராணுவம் ரஷ்ய எல்லைக்குள் சுமார் 600 கிலோமீட்டர் ஆழத்தில் புகுந்து ஒரு மிகப்பெரிய வான்வழித் தாக்குதலை நடத்தியுள்ளது. ரஷ்யாவின் ரோஸ்டோவ் (Rostov) மாகாணத்தில் உள்ள டாகன்ரோக் (Taganrog) ராணுவ விமான நிலையத்தைக் குறிவைத்து உக்ரைனின் ஆளில்லா வான்வழிப் பாதுகாப்புப் படையினர் (Unmanned Systems Forces) இந்த அதிரடித் தாக்குதலை நடத்தியுள்ளனர். இந்தத் தாக்குதலில் ரஷ்ய கடற்படைக்குச் சொந்தமான இரண்டு அதிநவீன போர் விமானங்கள் மற்றும் ஒரு முக்கிய ஏவுகணை ஏவுதளம் முற்றிலும் அழிக்கப்பட்டதாக உக்ரைன் அதிகாரப்பூர்வமாக அறிவித்துள்ளது.

உக்ரைன் ராணுவத்தின் நீண்டதூரத் தாக்குதல் பிரிவின் கமாண்டர் ராபர்ட் “மக்யார்” பிரவ்டி (Robert “Madyar” Brovdi) இந்தத் தாக்குதல் குறித்த அதிரடி வீடியோ ஆதாரங்களை சமூக வலைத்தளங்களில் வெளியிட்டுள்ளார். உக்ரைனின் அதிநவீன எஃப்பி-1 மற்றும் எஃப்பி-2 (FP-1, FP-2) ரக ட்ரோன்கள், ரஷ்யாவின் அதிமுக்கிய வான் பாதுகாப்பு வளையங்களை உடைத்துக்கொண்டு விமான நிலையத்திற்குள் ஊடுருவித் தாக்குவதைக் காட்டும் அந்த வீடியோ சர்வதேச ராணுவ வட்டாரங்களில் பெரும் பரபரப்பை ஏற்படுத்தியுள்ளது. இந்தத் தாக்குதலின் போது ஏற்பட்ட பெரும் தீ விபத்து மற்றும் அடுத்தடுத்து வெடித்த வெடிபொருட்களின் சத்தம் அந்தப் பகுதி முழுவதையும் அதிரச் செய்துள்ளது.

இந்தத் துல்லியமான ட்ரோன் தாக்குதலில், ரஷ்ய கடற்படையின் நீர்மூழ்கிக் கப்பல்களை வேட்டையாடப் பயன்படும் இரண்டு அரிய ‘டியு-142’ (Tu-142) ரக நீண்டதூர ரோந்து மற்றும் உளவு விமானங்கள் முற்றிலும் எரிக்கப்பட்டு சாம்பலாக்கப்பட்டுள்ளன. சோவியத் காலத்து ‘டியு-95’ ரக குண்டுவீச்சு விமானங்களின் கட்டமைப்பை அடிப்படையாகக் கொண்டு உருவாக்கப்பட்ட இந்த விமானங்கள், தற்போது ரஷ்யாவால் மீண்டும் தயாரிக்க முடியாதவை என்பதால் இது ரஷ்யாவிற்கு ஈடுகட்ட முடியாத இழப்பாகக் கருதப்படுகிறது. இதுமட்டுமின்றி, உக்ரைன் நகரங்கள் மீது தொடர்ந்து ஏவுகணைகளைப் பொழிந்து வந்த ரஷ்யாவின் அதிபயங்கர ‘இஸ்கந்தர்’ (Iskander) தந்திரோபாய பாலிஸ்டிக் ஏவுகணை அமைப்பும் (Missile System) அது நிலைநிறுத்தப்பட்டிருந்த இடத்திலேயே வைத்துத் தகர்க்கப்பட்டுள்ளது.

இந்தத் தாக்குதல் குறித்துத் தெரிவித்துள்ள ரோஸ்டோவ் மாகாண கவர்னர் யூரி ஸ்லூசர், ட்ரோன் தாக்குதலால் டாகன்ரோக் துறைமுகப் பகுதியில் உள்ள எரிபொருள் தொட்டி, ஒரு எண்ணெய் டேங்கர் கப்பல் மற்றும் அரசு நிர்வாகக் கட்டிடம் ஆகியவற்றில் பெரும் தீ விபத்து ஏற்பட்டுள்ளதாக ஒப்புக்கொண்டுள்ளார். உக்ரைன் மீது ரஷ்யா மீண்டும் ஒரு பிரம்மாண்டமான வான்வழித் தாக்குதலை நடத்தத் திட்டமிட்டுள்ளதாக அதிபர் வோலோடிமிர் ஜெலென்ஸ்கி எச்சரித்திருந்த நிலையில், உக்ரைன் முன்கூட்டியே ரஷ்யாவின் ஏவுகணை தளங்களை அதன் சொந்த மண்ணிலேயே வைத்து அழித்துள்ளது, இப்போரின் மிக முக்கிய இராஜதந்திர வெற்றியாகப் பார்க்கப்படுகிறது.