தமிழ் சொற்பிழைகளுடன் தவெக அரசின் ‘சிங்கப்பெண்’ வீடியோ !

தமிழக முதலமைச்சர் சி. ஜோசப் விஜய் இன்று சென்னை ராஜரத்தினம் மைதானத்தில் பெண்களின் பாதுகாப்பிற்கான ‘சிங்கப்பெண் சிறப்பு அதிரடிப்படை’ திட்டத்தைப் பிரம்மாண்டமாகத் தொடங்கி வைத்தார். இந்த விழாவின் போது, இச்சிறப்புப் படையின் செயல்பாடுகள் மற்றும் நோக்கம் குறித்துப் பொதுமக்களுக்கு விளக்கும் வகையில் செயற்கை நுண்ணறிவு (AI) தொழில்நுட்பத்தைப் பயன்படுத்தி உருவாக்கப்பட்ட அதிகாரப்பூர்வ விளக்க வீடியோ ஒன்று அரங்கிலிருந்த திரைகளில் ஒளிபரப்பப்பட்டது. ஆனால், அந்த அரசு வீடியோவில் ஏராளமான தமிழ் எழுத்துப் பிழைகளும் சொற்பிழைகளும் (Tamil Letter Mistakes) மலிந்து காணப்பட்டது பெரும் அதிர்ச்சியை ஏற்படுத்தியுள்ளது.

தொழில்நுட்பம் உச்சத்திலிருக்கும் தற்காலத்தில், தமிழ்நாடு அரசின் மிக முக்கியத் துறை சார்பில் வெளியிடப்பட்ட ஒரு சில நிமிட ஏ.ஐ. காணொளியில் கூடச் சரியான தமிழ் வார்த்தைகளைப் பயன்படுத்தாமல் பிழைகளுடன் வெளியிட்டது சமூக வலைதளங்களில் கடுமையான விமர்சனத்திற்கு உள்ளாகியுள்ளது. இந்த வீடியோ பொதுவெளியில் ஒளிபரப்பப்படுவதற்கு முன்பாக உயர்மட்ட அதிகாரிகள் யாரும் இதனைப் பரிசீலிக்கவில்லையா அல்லது பிழைகள் இருப்பது தெரிந்தே அலட்சியமாக வெளியிடப்பட்டதா என்ற கேள்விகள் எழுந்துள்ளன. இது புதிய தவெக அரசின் நிர்வாகக் குளறுபடியைக் காட்டுவதாக எதிர்க்கட்சிகள் குற்றம் சாட்டி வருகின்றன.

இந்த விவகாரம் தொடர்பாகப் பாஜகவின் மூத்த தலைவரும் முன்னாள் எம்.எல்.ஏ-வுமான வானதி சீனிவாசன் தனது எக்ஸ் (X) சமூக வலைதளப் பக்கத்தில் கடுமையான கண்டனப் பதிவு ஒன்றை வெளியிட்டுள்ளார். அதில், “இன்று முதலமைச்சர் விஜய் தொடங்கி வைத்த சிங்கப்பெண் சிறப்பு அதிரடிப்படை நிகழ்ச்சியில் ஒளிபரப்பப்பட்ட ஏ.ஐ. காணொளியில் இடம்பெற்றிருந்த தமிழ் வார்த்தைப் பிழைகள் தமிழ்நாட்டையே வெட்கப்பட வைத்துள்ளன. பெண்கள் பாதுகாப்பை முன்னிறுத்தும் ஒரு முக்கிய அரசு நிகழ்ச்சியில், தாய்மொழியான தமிழ் மொழிக்கு உரிய மரியாதை வழங்கப்படாதது மிகுந்த கண்டனத்திற்குரியது” என்று அவர் சாடியுள்ளார்.

மேலும், பாரதப் பிரதமர் நரேந்திர மோடி அவர்கள் உலக அரங்கில் செல்லும் இடமெல்லாம் தமிழ் மொழியின் தொன்மையையும், தமிழர் பண்பாட்டையும் மிக உயர்வாகப் பெருமையுடன் எடுத்துரைத்து வரும் வேளையில், தமிழ்நாட்டை ஆளும் புதிய அரசோ தாய்மொழியிலான ஒரு சிறு காணொளியைக் கூட முறையாகப் பிழையின்றி உருவாக்கத் தவறியது வருத்தத்திற்கும் கண்டனத்திற்கும் உரியது என வானதி சீனிவாசன் குறிப்பிட்டுள்ளார். இந்த எழுத்துப்பிழை சர்ச்சை தவெக அரசுக்கும், அதன் தமிழ் ஆர்வலர்களுக்கும் இணையத்தில் பெரும் பின்னடைவை ஏற்படுத்தியுள்ளது.