ஹார்முஸ் ஜலசந்தி (Strait of Hormuz) அருகே அமெரிக்காவின் அதிநவீன ‘அப்பாச்சி’ (Apache) ரக ஹெலிகாப்டர் வீழ்த்தப்பட்டதை அடுத்து, இரு நாடுகளுக்கும் இடையே போர் பதற்றம் உச்சக்கட்டத்தை எட்டியுள்ளது. அமெரிக்க ஹெலிகாப்டர் வீழ்த்தப்பட்டதற்கு ஈரானே காரணம் என்று குற்றம் சாட்டிய அமெரிக்க அதிபர் டொனால்ட் டிரம்ப், ஈரானிய ராணுவ நிலைகள் மீது வான்வழித் தாக்குதல் நடத்த உத்தரவிட்டார். இதனைத் தொடர்ந்து அமெரிக்காவின் மத்திய கட்டளைத் தலைமையகம் (CENTCOM) ஈரானின் தெற்கு கடற்கரையில் உள்ள வான் பாதுகாப்பு மற்றும் ரேடார் அமைப்புகளை குறிவைத்து பல மணி நேரம் தீவிர குண்டுமழை பொழிந்தது.
அமெரிக்காவின் இந்த அதிரடித் தாக்குதலுக்குப் பதிலடியாக, மத்திய கிழக்கு பிராந்தியத்தில் உள்ள அமெரிக்க ராணுவத் தளங்களை நோக்கி ஈரான் தனது ஏவுகணைகளையும் ட்ரோன்களையும் ஏவி அதிரடிப் பதில் தாக்குதலைத் தொடுத்துள்ளது. பஹ்ரைனில் உள்ள அமெரிக்க கடற்படையின் 5-வது படைப்பிரிவு தலைமையகம் மற்றும் குவைத், ஜோர்டான் ஆகிய நாடுகளில் உள்ள அமெரிக்க கூட்டுப் படைத் தளங்களை குறிவைத்து ஈரான் இந்த தாக்குதலை நடத்தியதாக ஈரானின் இஸ்லாமிய புரட்சிகர காவல்படை (IRGC) அதிகாரப்பூர்வமாக அறிவித்துள்ளது. இதன் காரணமாக குவைத் மற்றும் பஹ்ரைன் ஆகிய நாடுகளில் வான்வழித் தாக்குதல் எச்சரிக்கை சைரன்கள் ஒலிக்கப்பட்டு, பாதுகாப்பு பலப்படுத்தப்பட்டுள்ளது.
இந்தத் தாக்குதல்கள் குறித்துப் பேசிய ஈரான் வெளியுறவுத்துறை அமைச்சர் அப்பாஸ் அரக்சி, அமெரிக்காவின் எந்தவொரு அச்சுறுத்தலும் தாக்குதலும் தகுந்த பதிலடி இல்லாமல் போகாது என்று எச்சரித்துள்ளார். மேலும், அமெரிக்காவின் தாக்குதலில் ஈரானின் சிவிலியன் உள்கட்டமைப்புகள் மற்றும் தண்ணீர் தொட்டிகள் சேதமடைந்துள்ளதாக ஈரான் ஊடகங்கள் குற்றம் சாட்டியுள்ளன. அதே நேரத்தில், ஈரான் ஏவிய பெரும்பாலான ஏவுகணைகள் மற்றும் ட்ரோன்களை தங்கள் நாட்டு வான் பாதுகாப்பு அமைப்புகள் வெற்றிகரமாக சுட்டு வீழ்த்திவிட்டதாக ஜோர்டான் மற்றும் குவைத் நாடுகள் தெரிவித்துள்ளன. அமெரிக்க வீரர்கள் யாருக்கும் இந்தத் தாக்குதலில் காயம் ஏற்படவில்லை என அமெரிக்கா தரப்பில் விளக்கமளிக்கப்பட்டுள்ளது.
ஏற்கனவே இஸ்ரேல் – ஈரான் மோதலால் தவித்து வரும் மத்திய கிழக்கில், தற்போது அமெரிக்கா நேரடியாக ஈரானுடன் மோதலில் இறங்கியுள்ளது உலக நாடுகளிடையே பெரும் கவலையை ஏற்படுத்தியுள்ளது. கடந்த ஏப்ரல் மாதம் இரு நாடுகளுக்கும் இடையே எட்டப்பட்ட தற்காலிக போர்நிறுத்த ஒப்பந்தத்தை இந்தச் சம்பவம் முழுமையாக சிதைத்துள்ளது. இந்த திடீர் போர் பதற்றத்தின் காரணமாக சர்வதேச சந்தையில் கச்சா எண்ணெய் விலையும் கணிசமாக உயரத் தொடங்கியுள்ளது.
