யூடியூபர் முக்தார் அதிரடி கைது: கர்நாடகாவில் வைத்து அள்ளிய சென்னை சைபர் கிரைம் போலீஸ்!

பாஜக மாநில நிர்வாகியும், இந்தியாவின் முதல் பெண் மோட்டார் பந்தய சாம்பியனுமான அலிசா அப்துல்லா மற்றும் அவரது குழந்தைகள் குறித்துச் சமூக வலைதளங்களில் ஆபாசமாகவும், அவதூறாகவும் பேசிய வழக்கில் தேடப்பட்டு வந்த பிரபல யூடியூபர் முக்தார் அகமது (50) சென்னை சைபர் க்ரைம் போலீசாரால் அதிரடியாகக் கைது செய்யப்பட்டுள்ளார். தமிழக காவல்துறைக்குக் கைதாகாமல் தப்பித்து ஓடிய அவர், கர்நாடக மாநிலத்தில் பதுங்கியிருந்த போது தனிப்படை போலீசாரால் சுற்றி வளைக்கப்பட்டுத் தூக்கப்பட்டார்.

திமுக எம்பி திருச்சி சிவாவின் மகனான திருச்சி சூர்யா கடந்த மே மாதம் யூடியூபர் முக்தாரின் சேனலுக்குப் பேட்டி ஒன்று அளித்திருந்தார். அந்த நேர்காணலின் போது, பாஜாக பிரமுகர் அலிசா அப்துல்லா மற்றும் அவரது இரட்டைக் குழந்தைகளில் ஒரு குழந்தையைக் குறித்து மிகக் கொச்சையான மற்றும் பாலியல் ரீதியான அவதூறு கருத்துக்கள் (Sexually Coloured Remarks) பரப்பப்பட்டதாகக் கூறப்படுகிறது. இதைக் கண்டு கடும் மனவேதனையடைந்த அலிசா அப்துல்லா, சென்னை மாநகர காவல் ஆணையரிடம் நேரில் சென்று முக்தார் மற்றும் திருச்சி சூர்யா மீது சட்டப்பூர்வ நடவடிக்கை எடுக்கக் கோரி அதிரடிப் புகார் அளித்தார்.

இந்த அவதூறு புகாரின் அடிப்படையில் வழக்குப் பதிவு செய்த சென்னை சைபர் க்ரைம் பிரிவு போலீசார், கடந்த வாரம் திருச்சி சூர்யாவை அதிரடியாகக் கைது செய்தனர். இதையறிந்த யூடியூபர் முக்தார், போலீஸ் பிடியில் இருந்து தப்பிக்கத் தலைமறைவானார். இதனிடையே முக்தார் சென்னை சைபர் க்ரைம் வழக்கில் தனக்கு முன்ஜாமீன் கோரி சென்னை உயர் நீதிமன்றத்தில் மனுத் தாக்கல் செய்திருந்தார். எனினும், கர்நாடகாவில் பதுங்கியிருந்த அவரைத் தனிப்படை போலீசார் நேற்று (ஜூன் 9, 2026) கைது செய்துவிட்டதாக அரசுத் தரப்பு வழக்கறிஞர் சென்னை உயர் நீதிமன்றத்தில் இன்று அதிகாரப்பூர்வமாகத் தெரிவித்து, அவரது முன்ஜாமீன் மனுக்களை முடித்து வைத்தார்.

முன்னாள் முதல்வர் பெருந்தலைவர் காமராஜர் குறித்தும், தமிழக முதல்வர் சி. ஜோசப் விஜய் குறித்தும் அவதூறாகப் பேசியதாக முக்தார் மீது ஏற்கனவே பல்வேறு புகார்கள் நிலுவையில் உள்ள சூழலில், தற்போது அலிசா அப்துல்லா வழக்கில் கர்நாடகாவில் வைத்து அவர் கைது செய்யப்பட்டுள்ளது யூடியூப் வட்டாரங்களில் பெரும் அதிர்ச்சியை ஏற்படுத்தியுள்ளது. சமூக வலைதளங்கள் மற்றும் யூடியூப் நேர்காணல்களில் பெண்களின் கண்ணியத்திற்கு இழுக்கு ஏற்படுத்தும் வகையில் எல்லை மீறிப் பேசுபவர்கள் மீது காவல்துறை எடுத்து வரும் இந்த அதிரடி நடவடிக்கைகள் சமூக ஆர்வலர்கள் மத்தியில் பெரும் வரவேற்பைப் பெற்று வருகின்றன.