தமிழக சட்டமன்றத் தேர்தல் முடிவுகளுக்குப் பிறகு மாநிலத்தில் ஆட்சி மாற்றம் ஏற்பட்டுள்ள அரசியல் சூழலில், சென்னை கொளத்தூரில் நடைபெற்ற திமுக பொதுக்கூட்டத்தில் கலந்துகொண்ட பிரபல நடிகர் சத்யராஜ், மேடையிலேயே உணர்ச்சிவசப்பட்டு பேச முடியாமல் கண் கலங்கி அழுத சம்பவம் பெரும் பரபரப்பை ஏற்படுத்தியுள்ளது. எப்போதும் சினிமாவில் நக்கல், நையாண்டி மற்றும் கிண்டலான பேச்சுகளுக்குப் பெயர் போன சத்யராஜ், திமுகவின் தேர்தல் தோல்வியையும், மு.க.ஸ்டாலின் முதலமைச்சர் பதவியை இழந்ததையும் தாங்கிக் கொள்ள முடியாமல் பொதுமேடையில் கதறி அழுத வீடியோ காட்சிகள் சமூக வலைத்தளங்களில் பயங்கர ட்ரெண்டாகி வருகின்றன.
கொளத்தூர் தொகுதியில் மு.க.ஸ்டாலின் மீண்டும் வெற்றி பெற்றிருந்தாலும், மாநில அளவில் திமுக தோல்வியடைந்தது குறித்துப் பேசிய சத்யராஜ், “கொளத்தூரில் தலைவர் மு.க.ஸ்டாலின் ஜெயித்திருந்தாலும், ஒட்டுமொத்த தமிழ்நாட்டிலும் திமுக தோற்றது எனக்குள் மிகப்பெரிய கஷ்டத்தை ஏற்படுத்தியுள்ளது. நான் தந்தை பெரியாரின் தொண்டன், திராவிட கருத்தியலுக்கு ஆதரவானவன் என்பதால் எந்தக் கட்சியிலும் நான் உறுப்பினராக இல்லை. கடந்த ஐந்து ஆண்டுகளாக தம்பி சேகர் பாபு கூப்பிடும்போதெல்லாம் ஆளுங்கட்சிக்கு ஜால்ரா அடிக்கிறோமோ என்ற தயக்கத்துடன்தான் நலத்திட்ட விழாக்களுக்கு வந்தேன்; ஆனால் ஸ்டாலின் அவர்களின் பொற்கால மாடல் செயல்பாடுகள்தான் என்னை ஈர்த்தது” என்று உருக்கமாகக் குறிப்பிட்டார்.
மேலும் அசுர வேகத்தில் உணர்ச்சிவசப்பட்ட சத்யராஜ், “இனி என்னை இன்ஸ்டாகிராம் போன்ற சமூக வலைத்தளங்களில் டிரோல் செய்பவர்கள் என்ன வேண்டுமானாலும் திட்டிக்கொள்ளட்டும், எனக்குக் கவலையே இல்லை. எனக்கு ஏகப்பட்ட கெட்ட வார்த்தைகள் தெரியும், மரியாதையாக அதை அடக்கி வைத்துள்ளேன்; தேவைப்பட்டால் திருப்பித் தரவும் தயாராக இருக்கிறேன்” என்று ஆவேசப்பட்டார். தொடர்ந்து பேசிய அவர், “அறிஞர் அண்ணா மற்றும் கலைஞர் வழியில் தமிழ்நாட்டைப் பொற்காலமாக மாற்றியது மு.க.ஸ்டாலின் அவர்களின் திராவிட மாடல் ஆட்சிதான். இப்படிப்பட்ட ஒரு சிறந்த தலைவரை மக்கள் தோற்கடித்துள்ளார்கள். பட்டுத் திருந்தினால்தான் புத்தி வரும் என்பார்கள்; மக்கள் பட்டுத் திருந்தட்டும்” என்று மேடையிலேயே பேச முடியாமல் திணறி கண்ணீர் வடித்தார்.
தற்போது புதியதாகப் பொறுப்பேற்றுள்ள தமிழக வெற்றிக் கழகம் (தவெக) அரசுக்குக் காரசாரமான அறிவுரை வழங்கிய சத்யராஜ், “இப்போது ஆட்சியில் இருப்பவர்களுக்கு நான் ஒரே ஒரு அட்வைஸ் செய்கிறேன். நீங்கள் புதிதாக ஒண்ணுமே பண்ண வேண்டாம்; மு.க.ஸ்டாலின் கொண்டு வந்த ‘நான் முதல்வன்’, ‘விடியல் பயணம்’ போன்ற அற்புதமான நலத்திட்டங்களின் பெயர்களையும், ஸ்டிக்கரையும் மட்டும் மாற்றி உங்கள் பெயரை வைத்துக் கொள்ளுங்கள், உங்களுக்கு நல்ல பேர் கிடைத்துவிடும். ஆனால், அவர் கொண்டு வந்த வளர்ச்சித் திட்டங்களை மட்டும் நீங்கள் நிறுத்தவோ அல்லது மாற்றவோ முயன்றால் அது தமிழ்நாட்டில் சரிப்பட்டு வராது” என்று தவெக அரசுக்கு பகிரங்கமாக எச்சரிக்கை விடுத்துள்ளார்.
