ஈரானில் நிலவும் கடும் பொருளாதார நெருக்கடி மற்றும் அடக்குமுறைக்கு எதிராகத் தொடர் போராட்டங்கள் நடைபெற்று வருகின்றன. இந்தப் போராட்டங்களில் காயமடைந்தவர்களை மருத்துவமனைகளிலிருந்து பாதுகாப்புப் படையினர் வலுக்கட்டாயமாக அகற்றி வருவதாகக் குற்றச்சாட்டுகள் எழுந்துள்ளன. சில இடங்களில் படுகாயமடைந்த போராட்டக்காரர்களுக்குச் சிகிச்சை அளிக்கவிடாமல், அவர்கள் உயிருடன் இருக்கும்போதே (Vital signs) உடல் பைகளில் (Body bags) அடைக்கப்பட்டுப் பிணவறைகளுக்குக் கொண்டு செல்லப்பட்டதை நேரில் பார்த்ததாக மருத்துவப் பணியாளர்கள் மற்றும் சாட்சிகள் தெரிவித்துள்ளனர்.
வெளியாகியுள்ள சில புகைப்படங்களில், பிணவறையில் உள்ள உடல்களில் இன்னும் ஆக்சிஜன் குழாய்கள், ஈசிஜி (ECG) ஒட்டப்பட்ட ஸ்டிக்கர்கள் மற்றும் சிறுநீர் கழிக்க உதவும் குழாய்கள் (Catheters) அகற்றப்படாமல் அப்படியே இருப்பது உறுதி செய்யப்பட்டுள்ளது. இது அந்தப் போராட்டக்காரர்கள் தீவிர சிகிச்சை பெற்றுக்கொண்டிருந்தபோது அல்லது உயிருடன் இருந்தபோதே பிணவறைக்குக் கொண்டு வரப்பட்டதை உறுதிப்படுத்துவதாகச் சர்வதேச மனித உரிமை அமைப்புகள் (Human Rights Watch) தெரிவித்துள்ளன. இத்தகைய செயல்கள் ‘மனிதகுலத்திற்கு எதிரான குற்றங்கள்’ என்று விமர்சிக்கப்படுகின்றன.
ஈரானின் காஹ்ரிசாக் (Kahrizak) பிணவறையிலிருந்து கசிந்த புகைப்படங்கள் மற்றும் வீடியோக்கள் இந்த வன்முறையை வெளிச்சம் போட்டுக் காட்டுகின்றன. அங்கு நூற்றுக்கணக்கான உடல் பைகள் குவித்து வைக்கப்பட்டுள்ளன. காயமடைந்தவர்களைச் சிகிச்சைக்காக அனுமதித்தால் அவர்கள் கைது செய்யப்படுவார்கள் அல்லது கொல்லப்படுவார்கள் என்ற பயத்தில், பல போராட்டக்காரர்கள் மருத்துவமனைகளுக்குச் செல்லாமல் வீட்டிலேயே சிகிச்சை பெற்று வருவதாகவும், இது மரணங்களின் எண்ணிக்கையை மேலும் அதிகரித்து வருவதாகவும் மருத்துவர்கள் கவலை தெரிவித்துள்ளனர்.
இந்தப் போராட்டங்களில் இதுவரை 6,000-க்கும் மேற்பட்டோர் கொல்லப்பட்டிருக்கலாம் என்று சில தகவல்கள் தெரிவிக்கின்றன. பாதுகாப்புப் படையினர் போராட்டக்காரர்களை நேரடியாகத் தலையிலும் நெஞ்சிலும் சுட்டுக் கொல்வதாகவும், காயமடைந்தவர்களைச் சுட்டுக் கொல்ல ‘ஃபினிஷிங் ஷாட்’ (Finishing shot) முறையைப் பயன்படுத்துவதாகவும் சாட்சிகள் கூறுகின்றனர். இணையத் தொடர்புகள் துண்டிக்கப்பட்டுள்ள நிலையில், ஈரானில் நடக்கும் இந்த மனிதாபிமானமற்ற செயல்கள் சர்வதேச சமூகத்தை உறைய வைத்துள்ளன.
