உக்ரைன் போரில் உக்ரைனுக்கு ஆதரவாக பிரிட்டன் தொடர்ந்து செயல்பட்டு வரும் சூழலில், பிரிட்டன் மீது ரஷ்யா எந்நேரமும் நேரடி அல்லது மறைமுகத் தாக்குதல்களை நடத்தக்கூடும் என்று அந்நாட்டின் மூத்த அரசியல் தலைவரான ஆண்டி பர்ன்ஹாமிற்கு (Andy Burnham) உளவுத்துறை எச்சரிக்கை விடுத்துள்ளது. உக்ரைனுக்கு ஆயுத உதவிகள் மற்றும் நிதி உதவிகளை வழங்குவதில் பிரிட்டன் முன்னணியில் இருப்பதால், அதற்குப் பழிவாங்கும் நடவடிக்கையாக ரஷ்ய அதிபர் விளாடிமிர் புடின் தலைமையிலான அரசு இந்தத் தாக்குதலைத் திட்டமிட்டுள்ளதாகப் பாதுகாப்பு வட்டாரங்கள் தெரிவிக்கின்றன.
இந்த எச்சரிக்கையின்படி, ரஷ்யாவின் தாக்குதலானது வழக்கமான இராணுவப் போராக இல்லாமல், டிஜிட்டல் மற்றும் பொருளாதார உள்கட்டமைப்புகளை இலக்கு வைக்கும் ‘சவ்பர் தாக்குதல்களாக’ (Cyber Attacks) இருக்கவே அதிக வாய்ப்புள்ளது. குறிப்பாக பிரிட்டனின் மின் உற்பத்தி நிலையங்கள், வங்கிச் சேவை நெட்வொர்க் மற்றும் தகவல் தொடர்பு மையங்களைக் முடக்குவதன் மூலம் அந்நாட்டின் இயல்பு வாழ்க்கையைச் சீர்குலைக்க ரஷ்யா முயற்சிக்கும் என்று கருதப்படுகிறது. மேலும், போலிச் செய்திகளைப் பரப்பி மக்கள் மத்தியில் அமைதியின்மையை ஏற்படுத்தும் உளவியல் போரையும் ரஷ்யா தீவிரப்படுத்தியுள்ளது.
கிரேட்டர் மான்செஸ்டர் மேயரான ஆண்டி பர்ன்ஹாம், பிரிட்டனின் முக்கிய நகரங்கள் மற்றும் உள்ளாட்சி அமைப்புகள் இத்தகைய ஆபத்துகளை எதிர்கொள்ளத் தயார் நிலையில் இருக்க வேண்டும் என அறிவுறுத்தப்பட்டுள்ளார். உள்ளூர் அளவிலான உள்கட்டமைப்புகள் பாதிக்கப்ப்பட்டால், அதை உடனடி மீட்கும் வகையில் அவசரகால திட்டங்களைச் செயல்படுத்த அனைத்துத் துறைகளுக்கும் உத்தரவிடப்பட்டுள்ளது. தேசியப் பாதுகாப்பு முகமைகள் மற்றும் உள்ளாட்சி நிர்வாகங்கள் ஒருங்கிணைந்து செயல்படத் தொடங்கியுள்ளன.
சர்வதேச அளவில் உக்ரைனுக்கான ஆதரவை முடக்குவதே ரஷ்யாவின் முதன்மை நோக்கமாக உள்ளதால், ஐரோப்பிய நாடுகளுக்கு விடுக்கப்படும் எச்சரிக்கைகள் அதிகரித்துள்ளன. எனினும், ரஷ்யாவின் இத்தகைய அச்சுறுத்தல்களுக்குப் பயந்து உக்ரைனுக்கான ஆதரவை ஒருபோதும் திரும்பப் பெறப் போவதில்லை என்றும், ரஷ்யாவின் எந்தவொரு அச்சுறுத்தலையும் முறியடிக்கத் தேவையான அனைத்துப் பாதுகாப்பு நடவடிக்கைகளும் பலப்படுத்தப்பட்டுள்ளதாகவும் பிரிட்டன் அரசு திட்டவட்டமாக அறிவித்துள்ளது.
