உக்ரைன் மீது ரஷ்யா நடத்தி வரும் சட்டவிரோதமான போரில், ரஷ்ய அதிபர் விளாடிமிர் புடினின் ராணுவப் படையில் இணைந்து போரிடுவதற்காகப் பிரிட்டனைச் சேர்ந்த சில நபர்கள் ரஷ்யாவிற்குச் சென்றுள்ள தகவலும், அவர்களில் சிலர் போர்க்களத்தில் உயிரிழந்து வரும் நிகழ்வுகளும் பிரிட்டனில் பெரும் பரபரப்பையும் அதிர்ச்சியையும் ஏற்படுத்தியுள்ளன. “துரோகிகள்” (Traitors) எனப் பிரிட்டிஷ் ஊடகங்களால் அழைக்கப்படும் இவர்கள், தீவிரமான சித்தாந்த நம்பிக்கைகள், தனிப்பட்ட பின்னடைவுகள் மற்றும் குற்றப் பின்னணிகள் காரணமாக ரஷ்ய ராணுவத்தின் அழைப்பை ஏற்று போர்க்களத்தில் நுழைந்துள்ளனர்.
சமீபத்தில், இங்கிலாந்தின் யார்க்ஷயர் பகுதியைச் சேர்ந்த 33 வயதான பிராட்லி டவுன்சென்ட் (Bradley Townsend) என்ற நபர், கிழக்கு உக்ரைனின் டொனெட்ஸ்க் பிராந்தியத்தில் ரஷ்யப் படைகளுக்காகப் போரிட்ட போது ‘ஸ்டார்ம் ஆபரேஷன்’ தாக்குதலில் கொல்லப்பட்டார். பிரிட்டனிலிருந்து ரோமானியாவிற்குச் செல்வதாகக் கூறிச் சென்று ரஷ்ய ராணுவத்தில் இணைந்த இவர், புடினின் படைகளுக்காகப் போரிட்டு உயிரை இழந்த முதல் பிரிட்டிஷ் குடிமகன் என்று தகவல்கள் தெரிவிக்கின்றன. 1980-களில் சுரங்கத் தொழிலாளர்களின் போராட்டத்திற்கு ரஷ்யா உதவியதற்கு “நன்றி செலுத்தும் விதமாகவே” தான் போரில் இணைந்ததாக அவர் இறப்பதற்கு முன் கூறியிருந்தார்.
இவரைத் தவிர, பென் ஸ்டிம்சன் (Ben Stimson) மற்றும் எய்டன் மின்னிஸ் (Aiden Minnis) போன்ற பல குற்றப் பின்னணி கொண்ட பிரிட்டிஷ் நபர்களும் ரஷ்ய ராணுவத்தில் இணைந்து உக்ரைனுக்கு எதிராகப் போரிட்டு வருகின்றனர். தீவிர வலதுசாரி சித்தாந்தம் கொண்ட இவர்கள், சோஷியல் மீடியாக்களில் வீடியோக்களை வெளியிட்டு ரஷ்யாவின் நடவடிக்கைகளை நியாயப்படுத்தி வருகின்றனர். மேற்கத்திய நாடுகள் உக்ரைனுக்கு நிதியுதவி அளிப்பதைக் கேலி செய்யும் வகையிலும், தங்களின் இந்த முடிவு சரியானது என வாதிட்டும் இவர்கள் சமூக வலைத்தளங்களில் பதிவிட்டு வருகின்றனர்.
பிரிட்டன் அரசாங்கம் மற்றும் பாதுகாப்பு வல்லுநர்கள் இத்தகைய நபர்களின் நடவடிக்கைகளைக் கடுமையாகக் கண்டித்துள்ளனர். எதிரி நாட்டின் ராணுவத்தில் இணைந்து போர்க்குற்றங்களுக்குத் துணைபோவது சட்டம் மற்றும் தேசிய பாதுகாப்புக்கு எதிரானது என்றும், நாடு திரும்பும் பட்சத்தில் இவர்கள் கைது செய்யப்பட்டு பயங்கரவாத தடுப்புச் சட்டங்களின் கீழ் சிறையில் அடைக்கப்படுவார்கள் என்றும் எச்சரிக்கப்பட்டுள்ளது. புடினின் “இறைச்சி அரைக்கும்” (Meat-Grinder) உக்ரைன் போர்க்களத்தில் விதியை உணராமல் சென்று மாட்டும் இந்த இளைஞர்களின் முடிவு பிரிட்டிஷ் சமூகத்தில் பெரும் விவாதத்தைக் கிளப்பியுள்ளது.
