விஷம் விற்று தற்கொலைக்கு தூண்டிய கனடா நபர்: நீதிமன்றத்தில் குற்றத்தை ஒப்புக்கொண்ட கென்னத் லா!

கனடாவைச் சேர்ந்த 60 வயதான முன்னாள் சமையல் கலைஞர் கென்னத் லா (Kenneth Law), ஆன்லைன் மூலம் ஆபத்தான விஷப் பொருட்களை விற்று, நூற்றுக்கணக்கானவர்களின் தற்கொலைக்குக் காரணமான வழக்கில் தனது குற்றத்தை ஒப்புக்கொண்டுள்ளார். கனடாவின் ஒண்டாரியோ மாகாணத்தில் உள்ள நியூமார்க்கெட் (Newmarket) நீதிமன்றத்தில் ஆஜர்படுத்தப்பட்ட அவர், 14 பேரின் தற்கொலைக்குத் தூண்டுகோலாக இருந்ததாகத் தொடரப்பட்ட 14 குற்றச்சாட்டுகளையும் (14 counts of aiding suicide) ஒப்புக்கொண்டார். உலகளவில் பெரும் அதிர்வலைகளை ஏற்படுத்திய இந்த விசித்திரமான வழக்கில், குற்றம் சாட்டப்பட்டவர் தனது குற்றங்களை ஒப்புக்கொண்டிருப்பது மிக முக்கியத் திருப்புமுனையாகப் பார்க்கப்படுகிறது.

முன்னாள் பொறியாளராகவும் இருந்த கென்னத் லா, கடந்த 2020 ஆம் ஆண்டு முதல் சில ரகசிய இணையதளங்களை நடத்தி வந்துள்ளார். மன உளைச்சலால் தற்கொலை எண்ணத்தில் இருக்கும் நபர்களைக் குறிவைத்து, அவர்கள் எவ்வாறு தங்களின் உயிரை மாய்த்துக் கொள்ளலாம் என்ற ஆலோசனைகளையும், அதற்குத் தேவையான ‘சோடியம் நைட்ரைட்’ (Sodium Nitrite) உள்ளிட்ட ஆபத்தான இரசாயன நச்சுப் பொருட்களையும் ஆன்லைனில் விநியோகம் செய்துள்ளார். காவல்துறையினரின் பார்வையில் படாமல் இருக்க, தான் ஒரு உணவு விநியோக மொத்த வியாபாரி போலக் காட்டி, காரசாரமான சாஸ் (Hot Sauce) பாட்டில்களுடன் சேர்த்து இந்த விஷப் பொட்டலங்களையும் அவர் உலகம் முழுவதும் பார்சல் மூலம் அனுப்பியுள்ளார்.

காவல்துறையின் விசாரணையில் கென்னத் லா, உலகின் 41 நாடுகளுக்குச் சுமார் 1,209 நச்சுப் பொட்டலங்களை அனுப்பியது வெளிச்சத்திற்கு வந்துள்ளது. கனடாவில் 16 முதல் 36 வயதுக்குட்பட்ட 14 பேரின் மரணத்திற்கு இந்த விஷமே காரணம் என்று உறுதிசெய்யப்பட்டுள்ளது. மேலும், பிரிட்டன் (UK) நாட்டில் மட்டும் இவரது விஷப் பார்சல்களைப் பெற்று 79 பேர் உயிரிழந்துள்ளதாக நீதிமன்றத்தில் சமர்ப்பிக்கப்பட்ட 60 பக்கங்கள் கொண்ட கூட்டு உண்மை அறிக்கையில் (Agreed Statement of Facts) தெரிவிக்கப்பட்டுள்ளது. ஆரம்பத்தில் இவருக்கு எதிராக 14 கொலைக் குற்றச்சாட்டுகளைப் பதிவு செய்ய அரசுத் தரப்பு முயன்ற போதிலும், தற்கொலைக்கு உதவினார் என்ற சட்டப் பிரிவின் கீழ் தற்போது குற்றச்சாட்டு மாற்றப்பட்டு, கொலைக் வழக்குகள் வாபஸ் பெறப்பட்டுள்ளன.

நீதிமன்றத்தில் பாதிக்கப்பட்டவர்களின் குடும்பத்தினர் முன்னிலையில், தான் செய்த குற்றங்களை எவ்வித சலனமுமின்றி கென்னத் லா ஒப்புக்கொண்டார். பிரிட்டன் அரசு இவரைத் தங்கள் நாட்டிற்கு நாடு கடத்தப் போவதில்லை என்றும், கனடா நீதிமன்றம் வழங்கும் தண்டனையே ஒட்டுமொத்தப் பாதிப்புகளுக்கும் போதுமானதாக இருக்கும் என்றும் அறிவித்துள்ளது. இதற்கிடையில், தற்கொலைகளை ஊக்குவிக்கும் இது போன்ற ஆன்லைன் தளங்களை அரசு உடனடியாக முடக்க வேண்டும் என்று பாதிக்கப்பட்டவர்களின் பெற்றோர்கள் கண்ணீர்மல்கக் கோரிக்கை விடுத்துள்ளனர். இந்த வழக்கிற்கான இறுதித் தண்டனை விவரங்கள் வரும் செப்டம்பர் மாதம் அறிவிக்கப்படவுள்ளது.