வங்கக்கடலில் நிலவும் வளிமண்டல மேலடுக்கு சுழற்சி மற்றும் வானிலை மாற்றங்கள் காரணமாகச் சென்னை கடலோரப் பகுதிகளில் கடல் சீற்றம் அதிகரித்து காணப்படுகிறது. வழக்கமான அளவை விடக் கடல் அலைகள் பல அடிகள் உயரத்திற்கு எழும்பிக் கரையை நோக்கி அடித்து வருவதால், பாதுகாப்பு கருதி சென்னை மெரினா கடற்கரையில் கட்டுப்பாடுகள் விதிக்கப்பட்டுள்ளன. அலையின் சீற்றம் அதிகமாக உள்ளதால் கடலில் இறங்கிக் குளிப்பதோ அல்லது அலைகளில் விளையாடுவதோ ஆபத்தானது என எச்சரிக்கை விடுக்கப்பட்டுள்ளது.
மணற்பரப்பில் பொதுமக்கள் அமர்வதற்கும் கடலுக்கு அருகில் செல்வதற்கும் சிவப்பு எச்சரிக்கை விடுக்கப்பட்டுத் தடை விதிக்கப்பட்டுள்ளது. கலங்கரை விளக்கம் முதல் அண்ணா சதுக்கம் வரையிலான பகுதிகளில் காவல்துறையினர் மற்றும் கடலோரக் காவல் படையினர் தீவிர ரோந்துப் பணியில் ஈடுபட்டு வருகின்றனர். மேலும் ஒலிபெருக்கிகள் மூலம் பொதுமக்களையும் சுற்றுலாப் பயணிகளையும் கரையை விட்டு பாதுகாப்பாக வெளியேறுமாறு அதிகாரிகள் தொடர்ந்து அறிவுறுத்தி வருகின்றனர்.
வங்கக்கடலில் நிலவும் வானிலை மாற்றங்களை வானிலை ஆய்வு மையம் தொடர்ந்து தீவிரமாகக் கண்காணித்து வருகிறது.
கடல் சீற்றம் தணிந்து இயல்பு நிலை திரும்பிய பின்னரே மெரினா கடற்கரையில் விதிக்கப்பட்ட கட்டுப்பாடுகள் தளர்வு செய்யப்படும் எனக் காவல்துறை தரப்பில் தெரிவிக்கப்பட்டுள்ளது.
