பிக்பாஸ் நிகழ்ச்சியில் நடிகர் விஜய் சேதுபதி பேசிய ‘தலைமைப் பண்பு’ குறித்தக் கருத்துக்கள், தமிழக அரசியல் களத்தில் தவெக தொண்டர்கள் மற்றும் நெட்டிசன்கள் இடையே பெரும் விவாதத்தைக் கிளப்பியுள்ள நிலையில், இது தொடர்பாகத் தனக்கு எதுவும் தெரியாது என அதிமுக பொதுச் செயலாளர் எடப்பாடி பழனிசாமி சுருக்கமாகப் பதிலளித்து நகர்ந்துள்ளார்.
பிக்பாஸ் வார இறுதி நிகழ்ச்சியில் போட்டியாளர் ஒருவரிடம் பேசிய தொகுப்பாளர் விஜய் சேதுபதி, “பொறுப்பில் இருப்பவர்கள் வாக்குறுதியை நிறைவேற்றாமல், கேள்வி எழுப்பும்போது பழியை எதிரணி மீது போட்டுவிட்டு ஓடுவது தலைமைப் பண்பு அல்ல; அது ஏமாற்று வேலை” எனக் குறிப்பிட்டிருந்தார். இந்த உரை பிக்பாஸ் போட்டியாளருக்காகச் சொல்லப்பட்டாலும், சமீபத்தில் சட்டசபைக் கூட்டத்தொடரின் போது வெளிநடப்பு செய்த முதலமைச்சர் விஜய்யை மறைமுகமாகத் தாக்கியே விஜய் சேதுபதி பேசினார் என தவெகவினர் சமூக வலைதளங்களில் அவரைத் தீவிரமாக விமர்சித்து வருகின்றனர்.
இந்நிலையில், சென்னை விமான நிலையத்தில் செய்தியாளர்களைச் சந்தித்த அதிமுக பொதுச் செயலாளர் எடப்பாடி பழனிசாமியிடம், “விஜய் சேதுபதி பேசிய கருத்துக்கும், அவருக்கு எதிராகச் சமூக வலைதளங்களில் எழுந்துள்ள விமர்சனங்களுக்கும் உங்களின் ரியாக்ஷன் என்ன?” எனச் செய்தியாளர்கள் கேள்வி எழுப்பினர். அதற்குப் பதிலளித்த இபிஎஸ், “நடிகர் விஜய் சேதுபதிக்கு எதிராகச் சமூக வலைதளங்களில் கருத்து தெரிவிக்கப்பட்டு வரும் சம்பவம் குறித்து எனக்கு முழுமையாகத் தெரியவில்லை” என்று கூறி அந்த விவகாரத்திற்கு முற்றுப்புள்ளி வைத்தார்.
வரவிருக்கும் தாராபுரம் மற்றும் மதுராந்தகம் சட்டமன்றத் தொகுதிகளுக்கான இடைத்தேர்தலில் அதிமுகவின் வெற்றி உறுதி எனத் நம்பிக்கைத் தெரிவித்த எடப்பாடி பழனிசாமி, முதலமைச்சர் விஜய்யின் லண்டன் முதலீட்டுப் பயணம் குறித்து அவர் தமிழகம் திரும்பிய பிறகே கருத்து கூற முடியும் எனவும் தெளிவுபடுத்தினார். அரசியல் களத்தில் சினிமா பிரபலங்களின் பேச்சுக்கள் புயலைக் கிளப்பி வரும் வேளையில், எதிர்க்கட்சித் தலைவரின் இந்த விலகிய நிலைப்பாடு அரசியல் வட்டாரங்களில் கவனத்தைப் பெற்றுள்ளது.
