தமிழகத்தில் புதிதாகப் பொறுப்பேற்றுள்ள தமிழக வெற்றிக் கழக (தவெக) அரசாங்கத்தின் தொழில் துறை அமைச்சர் எஸ். கீர்த்தனா, இன்ஸ்டாகிராம் ரீல்ஸ் வீடியோ ஒன்றைப் பகிர்ந்துள்ளார். அதில் “தமிழகம் எதிர்காலத்தை நோக்கி காத்திருக்கவில்லை; மாறாக நாங்களே அதை கட்டமைக்கிறோம்” என்ற வாசகத்துடன் அவர் வெளியிட்ட வீடியோ தற்போது சமூக ஊடகங்களில் காட்டுத்தீயாய் பரவி வருகிறது.
முதலமைச்சர் சி. ஜோசப் விஜய் தலைமையிலான புதிய அமைச்சரவையில், 29 வயதான இளம் அமைச்சரான கீர்த்தனா தொழில் துறையைக் கவனித்து வருகிறார். தமிழகத்தை இந்தியாவின் முதலீட்டு மற்றும் புதுமை மையமாக மாற்றுவதே தங்களின் இலக்கு என அவர் குறிப்பிட்டுள்ளார். இந்த ரீல்ஸ் வீடியோவில் ஏஐ நகரங்கள் (AI Cities), பசுமை ஹைட்ரஜன், மேம்பட்ட உற்பத்தித் துறைகள் மற்றும் விண்வெளிப் பொருளாதாரம் போன்ற அதிநவீன உள்கட்டமைப்புகளை நோக்கி தமிழகம் நகர்வதை அவர் சுட்டிக்காட்டியுள்ளார்.
முக்கியமாக, தமிழகத்தில் புதிய தொழில்களைத் தொடங்குவதற்கான அனுமதியை வெறும் 21 நாட்களுக்குள் வழங்க அரசு வழிவகை செய்துள்ளதாக அமைச்சர் இந்த வீடியோவில் பெருமையுடன் தெரிவித்துள்ளார். அரசியல் களம் மற்றும் அரசு நிர்வாகத்தில் டிஜிட்டல் உத்திகளையும், நவீன தொழில்நுட்பங்களையும் பயன்படுத்தி முதலீட்டாளர்களைக் கவரும் தவெக அரசின் இந்த முயற்சிக்கு இணையத்தில் ஒருபுறம் பாராட்டுகள் குவிந்து வருகின்றன.
இருப்பினும், இந்த ரீல்ஸ் வீடியோவிற்கு மற்றொரு புறம் விமர்சனங்களும் எழுந்துள்ளன. அரசு நிர்வாகத்தையும், கொள்கை முடிவுகளையும் வெறும் சமூக ஊடக ரீல்ஸ்கள் மூலம் விளம்பரப்படுத்துவது முறையானதல்ல என்று எதிர்க்கட்சிகளும் சில அரசியல் விமர்சகர்களும் கருத்து தெரிவித்து வருகின்றனர். இந்த ஆதரவும் எதிர்ப்பும் கலந்த விவாதங்களால் இந்த வீடியோ தற்போது ட்ரெண்டிங்கில் முன்னணியில் உள்ளது.
