இத்தாலி, பிரிட்டன், அயர்லாந்து உட்பட ஐரோப்பிய நாடுகளின் பல்வேறு நகரங்களுக்குப் பயணித்த 14-க்கும் மேற்பட்ட பயணிகள் விமானங்களுக்குத் தொடர்ச்சியாக வெடிகுண்டு மிரட்டல்கள் விடுக்கப்பட்டன. இத்தாலிய மொழியில் அனுப்பப்பட்ட அந்த மின்னஞ்சல்களில், “வானத்தைச் சிவப்பாக மாற்றுவோம்” (turn the skies red) என்றும் தங்கள் அமைப்பு வரலாற்றுச் சுவடைப் பதிக்கும் என்றும் குறிப்பிடப்பட்டிருந்தது. ‘மேல் ஸ்டேட்’ (Male State) என்ற ரஷ்ய தீவிரவாத அமைப்பின் பெயரில் அனுப்பப்பட்ட இந்த மிரட்டல்களால், ரயான்ஏர் (Ryanair), விஸ் ஏர் (Wizz Air), ஈசிஜெட் (easyJet) உள்ளிட்ட பல்வேறு நிறுவனங்களின் விமானங்கள் அவசரமாகத் தரையிறக்கப்பட்டுப் பரிசோதிக்கப்பட்டன.
இந்த மிரட்டல்ச் செய்திகளைத் தொடர்ந்து, ரோமை நோக்கிச் சென்ற ஒரு விமானத்தைப் பாதுகாப்பாக அழைத்துவர இத்தாலிய வான்படையின் போர் விமானங்கள் ஈடுபடுத்தப்பட்டன. மேலும், போலந்தின் வார்சா நகருக்குச் சென்ற விமானங்கள் வேறு விமான நிலையத்திற்குத் திருப்பப்பட்டுப் பயணிகள் அனைவரும் உடனடியாக வெளியேற்றப்பட்டனர். எனினும், பாதுகாப்பு அதிகாரிகள் நடத்திய தீவிர சோதனையில் எந்தவொரு விமானத்திலும் வெடிமருந்துகளோ அல்லது சந்தேகத்திற்கிடமான பொருட்களோ கண்டெடுக்கப்படவில்லை என்பதால் இவை அனைத்தும் போலி மிரட்டல்கள் (Hoax) என்பது உறுதி செய்யப்பட்டது.
இச்சம்பவம் குறித்துப் பேசிய இங்கிலாந்து அரசுத் தொடர்பாளர் மற்றும் விமானப் பாதுகாப்பு அதிகாரிகள், வான்வழிப் போக்குவரத்து மிரட்டல்களை எதிர்கொள்ளத் தங்களிடம் வலுவான பாதுகாப்பு நடைமுறைகள் இருப்பதாகத் தெரிவித்தனர்.
தற்போது அனைத்து விமானப் பயணங்களும் இயல்பு நிலைக்குத் திரும்பியுள்ள நிலையில், இந்த மின்னஞ்சல்களை அனுப்பிய போலி மிரட்டல் நபர்கள் மற்றும் அமைப்புகள் குறித்து ஐரோப்பியப் புலனாய்வு அமைப்புகள் தீவிர விசாரணை நடத்தி வருகின்றன.
