பிரிட்டன் நாடு தற்போது ரஷ்யாவுடன் ஒரு மறைமுகப் போரில் (Covert War) ஈடுபட்டுள்ளதாகவும், ரஷ்ய அதிபர் விளாடிமிர் புதனின் ரகசிய ஒற்றர்கள் பிரிட்டனின் வீதிகளில் சுதந்திரமாக உலாவி வருவதாகவும் சிஐஏ (CIA) முன்னாள் உளவுத்துறை அதிகாரி ஒருவர் அதிர்ச்சித் தகவலை வெளியிட்டுள்ளார். பிரிட்டன் பிரதமர் கீர் ஸ்டார்மரை (Keir Starmer) மற்றும் அவரது குடும்பத்தினரைக் குறிவைத்து லண்டனில் அரங்கேற்றப்பட்ட அடுத்தடுத்த தொடர் தீவைப்புச் சம்பவங்களே (Arson Attacks) இதற்கு மிகமுக்கியமான சாட்சி என்றும், ரஷ்யா பிரிட்டனுக்குள் ஒரு ஆபத்தான நாசவேலை பிரச்சாரத்தை முடுக்கிவிட்டுள்ளது என்றும் அவர் எச்சரித்துள்ளார்.
சமீபத்தில் பிரிட்டன் நீதிமன்றம், பிரதமர் கீர் ஸ்டார்மரின் முன்னாள் கார் மற்றும் அவரது குடும்பத்தினர் வசித்து வந்த இரு வீடுகளுக்குத் தீ வைத்த வழக்கில் உக்ரைனைச் சேர்ந்த ரோமன் லாவ்ரினோவிச் (22) மற்றும் ருமேனியாவைச் சேர்ந்த ஸ்டானிஸ்லாவ் கார்பியுக் (27) ஆகிய இருவருக்கு முறையே 7 ஆண்டுகள் மற்றும் 2 ஆண்டுகள் சிறைத்தண்டனை விதித்து அதிரடித் தீர்ப்பளித்தது. இந்தத் தீர்ப்பைத் தொடர்ந்து லண்டன் ஊடகங்கள் நடத்திய ஆழமான புலனாய்வில், இந்தத் தீவைப்புச் சம்பவங்களின் பின்னணியில் ரஷ்ய தூதரக அதிகாரியின் மகனான எவ்கேனி லியுக்ஷின் (Evgeny Lyukshin) என்பவர் ‘எல் மணி’ (El Money) என்ற போலி டெலிகிராம் கணக்கு மூலம் உக்ரைன் போருக்கு பிரிட்டன் அளித்து வரும் ஆதரவைப் பழிவாங்க இந்தச் சதியை ஒருங்கிணைத்தது அம்பலமானது.
இந்த விவகாரம் குறித்துப் பேசிய முன்னாள் சிஐஏ உளவுத்துறை நிபுணர், “பிரிட்டனின் உளவு அமைப்புகள் மற்றும் சட்ட அமலாக்கத் துறையினர் இன்னும் விழித்துக் கொள்ளவில்லை; புதனின் ஒற்றர்கள் பிரிட்டனின் உள்கட்டமைப்புகளையும், நாட்டின் மிக உயர்ந்த தலைவர்களையும் மிக எளிதாகக் குறிவைக்கத் தொடங்கிவிட்டனர். ஆன்லைன் மூலமாக ‘பயனுள்ள முட்டாள்களை’ (Useful Idiots) மற்றும் வறிய நிலையில் உள்ள இளைஞர்களைப் பண ஆசை காட்டி ரஷ்ய உளவுத்துறை தங்களின் நாசவேலைகளுக்குப் பயன்படுத்தி வருகிறது. இது பிரிட்டனின் தேசிய பாதுகாப்பிற்கும் அதன் ஜனநாயக அமைப்புகளின் கட்டமைப்பிற்கும் விடப்பட்ட மிக நேரடியான சவால்” என்று விவரித்துள்ளார்.
மேற்கத்திய நாடுகளின் பாதுகாப்பு அதிகாரிகள் அளித்துள்ள தரவுகளின்படி, உக்ரைன் மீதான ரஷ்யாவின் முழு அளவிலான படையெடுப்பிற்குப் பிறகு ஐரோப்பா முழுவதும் இதுவரை 192-க்கும் மேற்பட்ட ரஷ்ய ஆதரவு நாசவேலைத் தாக்குதல்கள், சைபர் தாக்குதல்கள் மற்றும் அரசியல் தலைவர்களைக் குறிவைத்த கொலை முயற்சிகள் நடந்துள்ளன. பிரான்சில் நடைபெற்ற ஜி-7 (G7) மாநாட்டில் பங்கேற்ற பிரதமர் கீர் ஸ்டார்மர், இந்தத் தீவைப்பு வழக்கில் நீதி நிலைநாட்டப்பட்டுள்ளதாகத் தெரிவித்துள்ளதோடு, ரஷ்யாவின் நிழல் கடற்படை மற்றும் எரிசக்தித் துறை மீது 70 புதிய பொருளாதாரத் தடைகளையும் விதித்துள்ளார். இந்த ஒற்றர்கள் விவகாரம் தற்போது பிரிட்டன் மக்களிடையே பெரும் பயத்தையும் பரபரப்பையும் ஏற்படுத்தியுள்ளது.
