ஜெர்மனியின் பவேரியா மாகாணத்தில் உள்ள கெல்ஸ்டீன் மலையில் அமைந்துள்ள, நாஜி சர்வாதிகாரி அடால்ஃப் ஹிட்லரின் ‘ஈகிள்ஸ் நெஸ்ட்’ (Kehlsteinhaus) உணவகம் மற்றும் வரலாற்றுத் தளம் தீ விபத்தில் முற்றிலும் சேதமடைந்துள்ளது. கடந்த அக்டோபர் 23-ஆம் தேதி இரவு ஏற்பட்ட இந்தத் தீ விபத்து, திட்டமிட்டு நடத்தப்பட்ட தீவைப்புத் தாக்குதலாக இருக்கலாம் எனக் காவல்துறையினர் சந்தேகிக்கின்றனர். இச்சம்பவம் தொடர்பாக 33 வயதான ஜெர்மன் குடிமகன் ஒருவரை போலீசார் கைது செய்து தீவிர விசாரணை மேற்கொண்டு வருகின்றனர்.
இந்த வரலாற்றுச் சின்னம் தீக்கிரையான சம்பவத்தைத் தொடர்ந்து, அந்தக் கட்டடத்தை மீண்டும் பழமை மாறாமல் மீளமைப்பதா அல்லது அப்படியே விட்டுவிடுவதா என்பது குறித்து ஜெர்மனியில் தீவிர விவாதங்கள் உருவாகியுள்ளன. இக்கட்டடத்தைச் சீரமைத்தால் அது நவா-நாஜிக்கள் (Neo-Nazis) கூடும் புனிதத் தலமாக மாறிவிடும் எனச் சில வரலாற்றாசிரியர்கள் மற்றும் நிபுணர்கள் அச்சம் தெரிவித்துள்ளனர். அதேவேளையில் பவேரிய கலாச்சார அமைச்சர் மார்கஸ் புளூம், நாஜி காலக் கொடூரங்களை நினைவுகூரும் வகையில் வரலாற்றுப் பொறுப்புடன் இதற்கான தீர்வு காணப்படும் என்று கூறியுள்ளார்.
ஆண்டுதோறும் 3 லட்சத்திற்கும் அதிகமான சுற்றுலாப் பயணிகள் பார்வையிடும் இந்தத் தளம், விபத்து காரணமாகத் தற்போது காலவரையறையின்றி மூடப்பட்டுள்ளது.
பவேரிய மாகாண அரசு, வரலாற்று நிபுணர்கள் மற்றும் உள்ளாட்சி அமைப்புகளுடன் கலந்தாலோசித்து கட்டடத்தின் எதிர்காலம் குறித்து இறுதி முடிவெடுக்கத் திட்டமிட்டுள்ளது.
நாஜி சகாப்தத்தின் எஞ்சியிருந்த இந்த வரலாற்று நினைவிடத்தைச் சுற்றியுள்ள இடங்கள் மற்றும் கைதான நபரிடம் விசாரணைத் தொடர்ந்து நடத்தப்பட்டு வருகிறது.
