ஐரோப்பிய நாடுகளில் கொப்பளித்து வரும் புதிய வாழ்க்கை முறை மாற்றங்களுக்கு மத்தியில், கொனோரியா (Gonorrhea) மற்றும் சிபிலிஸ் (Syphilis) போன்ற ஆபத்தான பாலியல் ரீதியாக பரவும் பாக்டீரியா தொற்றுகள் (STIs) முன்னெப்போதும் இல்லாத அளவிற்கு அசுர வேகத்தில் அதிகரித்துள்ளன. ஐரோப்பிய நோய் தடுப்பு மற்றும் கட்டுப்பாட்டு மையம் (ECDC) மே 21, 2026 அன்று வெளியிட்டுள்ள புதிய அதிர்ச்சி அறிக்கையின்படி, கடந்த பத்து ஆண்டுகளில் இல்லாத அளவிற்கு இந்த நோய்களின் பரவல் புதிய உச்சத்தைத் தொட்டுள்ளது. குறிப்பாக, ஐரோப்பிய நாடுகளில் ஸ்பெயின் (Spain) நாடுதான் இந்த இரண்டு நோய்களின் பரவலிலும் மிக மோசமான பாதிப்புகளுடன் முதலிடத்தில் உள்ளதாகத் தரவுகள் எச்சரிக்கின்றன.
புதிய புள்ளிவிவரங்களின்படி, கடந்த 2015-ஆம் ஆண்டுடன் ஒப்பிடுகையில் ஐரோப்பாவில் கொனோரியா நோய்த்தொற்று 303 சதவீதம் என்ற அசுரத்தனமான வளர்ச்சியைப் பதிவு செய்து 1,06,331 வழக்குகளாகப் பதிவாகியுள்ளது. அதே வேளையில், சிபிலிஸ் பாதிப்பும் இரண்டு மடங்குக்கும் மேல் அதிகரித்து 45,557 ஆக உயர்ந்துள்ளது. இதில் ஸ்பெயின் நாட்டில் மட்டும் கடந்த ஆண்டில் 37,169 கொனோரியா வழக்குகளும், 11,556 சிபிலிஸ் வழக்குகளும் உறுதி செய்யப்பட்டு ஒட்டுமொத்த ஐரோப்பிய பிராந்தியத்திற்கே பெரும் அச்சுறுத்தலாக மாறியுள்ளது.
இந்த நோய்ப் பரவலில் மிகவும் கவலையளிக்கும் விஷயம் என்னவென்றால், கர்ப்பிணித் தாய்மார்களிடமிருந்து பிறக்கும் குழந்தைகளுக்கு நேரடியாகப் பரவும் ‘பிறவி சிபிலிஸ்’ (Congenital Syphilis) பாதிப்பு, கடந்த ஓராண்டில் மட்டும் 78-லிருந்து 140 ஆக, அதாவது கிட்டத்தட்ட இரண்டு மடங்கு அதிகரித்துள்ளது. இது பிறக்கும் குழந்தைகளுக்கு வாழ்நாள் முழுவதும் நரம்பு மற்றும் இதயப் பாதிப்புகளை ஏற்படுத்தக்கூடிய கொடூரமான நிலையாகும். நவீன டேட்டிங் ஆப்ஸ்களின் (Dating Apps) அதீத பயன்பாடு, பலருடன் உடலுறவு கொள்ளும் பழக்கம் மற்றும் உடலுறவின் போது காண்டம்களைப் (Condoms) பயன்படுத்தும் வழக்கம் பெருமளவு குறைந்து போனதே இந்த நோய்ப் பரவல் சுனாமி போல் வெடிக்கக் காரணம் என்று மருத்துவ நிபுணர் லினா நெர்லாண்டர் விளக்கியுள்ளார்.
தற்போது பரவி வரும் கொனோரியா பாக்டீரியாக்கள், பொதுவான ஆன்டிபயாடிக் (Antimicrobial Resistance) மருந்துகளுக்குக் கட்டுப்படாமல் எதிர்ப்புத் திறனை வளர்த்துக் கொள்வது உலக சுகாதார அமைப்பிற்குப் புதிய தலைவலியை ஏற்படுத்தியுள்ளது. ஐரோப்பாவில் உள்ள 29 நாடுகளில் 13 நாடுகள் இன்னும் அடிப்படை பாலியல் பரிசோதனைகளுக்கு மக்களிடமிருந்து கட்டணம் வசூலிப்பதே, இந்த நோயை ஆரம்பத்திலேயே கண்டறிந்து தடுக்க முடியாமல் போனதற்குக் காரணம் என ECDC சாடியுள்ளது. இந்த நிலை தொடர்ந்தால் மலட்டுத்தன்மை, நாள்பட்ட உடல் வலி போன்ற கடுமையான உடல்நலப் பாதிப்புகள் ஐரோப்பிய இளைஞர்களிடையே பேராபத்தாக மாறும் என்பதால், அனைத்து நாடுகளும் தங்களின் சுகாதார உத்திகளை உடனடியாக மாற்றியமைக்க வேண்டும் என எச்சரிக்கப்பட்டுள்ளது.
