அதிபர் டொனால்ட் டிரம்ப் ஈரான் மீது “நரகத்தைக் கட்டவிழ்த்து விடுவோம்” (Unleash Hell) என்று விடுத்த மிரட்டலுக்குப் பதிலடியாக, ஈரான் அரசு ஒரு அனிமேஷன் பிரச்சார வீடியோவை வெளியிட்டுள்ளது. அந்த வீடியோவில், அதிபர் டிரம்ப் ஒரு இருண்ட நரகப் பகுதிக்குள் தள்ளப்படுவதைப் போன்ற காட்சிகள் இடம் பெற்றுள்ளன. இதில் மிகப்பெரிய ட்விஸ்ட் என்னவென்றால், டிரம்பை நரகத்திற்குள் தள்ளிவிடுவது போல இயேசு கிறிஸ்துவின் (Jesus) உருவம் சித்தரிக்கப்பட்டுள்ளது. டிரம்பின் ஆதரவாளர்கள் அவரை ஒரு ‘தெய்வீகத் தூதர்’ போலச் சித்தரித்து வரும் நிலையில், அதற்கு நேர்மாறாக ஈரான் இத்தகைய வீடியோவை வெளியிட்டு அமெரிக்க அரசியலையே சீண்டியுள்ளது.
சமீபத்தில் டொனால்ட் டிரம்ப் தனது சமூக வலைதளப் பக்கத்தில், தன்னை ஒரு ‘இயேசு போன்ற உருவம்’ (Christ-like AI post) தாங்கிப் பிடிப்பது போன்ற ஒரு ஏஐ (AI) புகைப்படத்தைப் பகிர்ந்து மிரட்டல் விடுத்திருந்தார். இதற்குப் பதிலடி கொடுக்கும் விதமாகவே, ஈரானின் புரட்சிகரக் காவல் படை (IRGC) ஆதரவு பெற்ற ஊடகங்கள் இந்த வீடியோவைத் தயாரித்துள்ளன. “உண்மையான இயேசு கிறிஸ்து ஒருபோதும் போரை ஆதரிக்க மாட்டார், அவர் உன்னைப் போன்றவர்களை நரகத்திற்குத்தான் அனுப்புவார்” என்ற செய்தியை மறைமுகமாகச் சொல்ல ஈரான் முயற்சித்துள்ளது. மதக் குறியீடுகளைப் பயன்படுத்தி நடத்தப்படும் இந்த ‘இணையப் போர்’ அமெரிக்க கிரிஸ்துவ அமைப்புகளிடையே பெரும் கொந்தளிப்பை ஏற்படுத்தியுள்ளது.
ஈரானின் இந்த வீடியோ ட்ராலிங் (Trolling) ஒருபுறமிருக்க, களத்தில் போர் சூழல் மிகவும் மோசமடைந்துள்ளது. ஹார்முஸ் ஜலசந்தியை (Strait of Hormuz) திறக்கத் தவறினால் ஈரானின் மின் உற்பத்தி நிலையங்கள் மற்றும் பாலங்கள் மீது தாக்குதல் நடத்தப்படும் என்று டிரம்ப் இறுதி எச்சரிக்கை விடுத்துள்ளார். ஈரானின் அரசு ஊடகங்கள் டிரம்பை “சித்தப்பிரமை பிடித்தவர்” (Delusional) என்றும், ஒரு நாட்டின் உள்கட்டமைப்பை அழிப்பேன் என்று மிரட்டுவது சர்வதேசப் போர்க்குற்றம் என்றும் சாடியுள்ளன. இரண்டு வார காலப் போர்நிறுத்த ஒப்பந்தம் தோல்வியடைந்த நிலையில், இந்தப் பிரச்சார வீடியோ இரு நாடுகளுக்கும் இடையிலான வெறுப்பை மேலும் அதிகப்படுத்தியுள்ளது.
ஈரான் மற்றும் அமெரிக்கா இடையிலான இந்த மோதல் வெறும் ராணுவ ரீதியானது மட்டுமல்ல, அது ஒரு சித்தாந்த மற்றும் மத ரீதியான மோதலாகவும் உருவெடுத்துள்ளதை இந்த வீடியோ காட்டுகிறது. சமூக வலைதளங்களில் இந்த வீடியோ லட்சக்கணக்கான பார்வைகளைப் பெற்று வைரலாகி வருகிறது. டிரம்பின் ஆதரவாளர்கள் இது “தெய்வ நிந்தனை” என்று கூறி வரும் நிலையில், ஈரானிய ஆதரவாளர்கள் இதனை அமெரிக்காவின் “அகங்காரத்திற்கு” கிடைத்த பதிலடி எனப் கொண்டாடி வருகின்றனர். வரும் 48 மணி நேரத்தில் அமெரிக்கா என்ன மாதிரியான ராணுவ நடவடிக்கைகளை எடுக்கும் என்பதைப் பொறுத்தே இந்த வீடியோ மோதலின் இறுதி முடிவு அமையும்.
