ஈரானின் ஆன்மீக மற்றும் உச்ச தலைவரான அயதுல்லா அலி கமேனியின் மறைவைத் தொடர்ந்து, அந்நாடு பல நாட்கள் நீடிக்கும் தேசிய துக்க அனுசரிப்புகளுக்குத் தயாராகி வருகிறது. இந்தச் சூழ்நிலையில், கடந்த பல மாதங்களாகப் பொதுவெளியில் தோன்றாமல் ரகசிய இடத்தில் தங்கியிருந்த ஈரானின் இஸ்லாமிய புரட்சிகர பாதுகாப்புப் படையின் (IRGC) மிகச் சக்திவாய்ந்த ஜெனரலான அகமது வாஹிதி, திடீரென தலைநகர் தெஹ்ரானில் தோன்றியுள்ளார். கமேனியின் இறுதிச்சடங்கு ஏற்பாடுகள் குறித்த ஆலோசனைக் கூட்டத்தில் அவர் பங்கேற்ற புகைப்படங்களும், கமேனியின் உடலடங்கிய பெட்டிக்கு அருகில் அவர் அமர்ந்திருக்கும் காட்சிகளும் ஈரான் அரசு ஊடகங்களால் அதிகாரப்பூர்வமாக வெளியிடப்பட்டு சர்வதேச அளவில் பெரும் பரபரப்பை ஏற்படுத்தியுள்ளன.
கடந்த பிப்ரவரி 28 அன்று இஸ்ரேல்-அமெரிக்க கூட்டு வான்வழித் தாக்குதலில் அயதுல்லா அலி கமேனி மற்றும் அவரது குடும்ப உறுப்பினர்கள் கொல்லப்பட்டதைத் தொடர்ந்து ஈரானில் போர்ச் சூழல் உருவானது. இப்போரின் தொடக்கத்திற்கு முன்பாக, அதாவது கடந்த பிப்ரவரி 8-ஆம் தேதிக்குப் பிறகு ஜெனரல் அகமது வாஹிதி பொதுவெளியில் எங்கும் காணப்படவில்லை. பாதுகாப்பு காரணங்களுக்காகவும், ஈரானின் அடுத்தகட்ட போர் உத்திகளை வகுப்பதற்காகவும் அவர் ரகசிய இடத்தில் வைக்கப்பட்டிருந்ததாகக் கூறப்பட்ட நிலையில், தற்போது ஐந்து மாதங்களுக்குப் பிறகு அவர் முதல்முறையாகப் பொதுமக்களின் பார்வைக்கு வந்துள்ளார்.
அமெரிக்கா மற்றும் இஸ்ரேல் உடனான போரை நிரந்தரமாக முடிவுக்குக் கொண்டுவருவது குறித்த சர்வதேச பேச்சுவார்த்தைகளில், ஈரானின் கடுமையான மற்றும் பிடிவாதமான உத்திகளை வகுப்பதில் ஜெனரல் வாஹிதி மிக முக்கியப் பங்கு வகிப்பதாக சர்வதேச அரசியல் ஆய்வாளர்கள் கருதுகின்றனர். “நம்முடைய தியாகி இமாமின் தூய்மையான இரத்தம், உலக அரங்கில் இஸ்லாத்தின் வெற்றிகளுக்கு மற்றொரு திருப்புமுனையாக அமையும்” என ஈரான் அரசுத் தொலைக்காட்சியில் அவர் ஆற்றிய உரை தற்போதைய ஈரானின் ஆக்ரோஷமான நிலைப்பாட்டை வெளிப்படுத்துகிறது. மேலும், தாக்குதலில் காயமடைந்து தற்போது தலைமறைவாக இருக்கும் ஈரானின் புதிய உச்ச தலைவர் அயதுல்லா மொஜ்தபா கமேனியுடன் நேரடியாகத் தொடர்பில் இருக்கும் ஒரு சில முக்கிய நபர்களில் இவரும் ஒருவர் என்பது குறிப்பிடத்தக்கது.
தெஹ்ரானில் உள்ள இமாம் கொமேனி கிராண்ட் மொசல்லா (Grand Mosalla) மைதானத்தில் கமேனியின் இறுதிச்சடங்கு சடங்குகள் அதிகாரப்பூர்வமாகத் தொடங்குகின்றன. இந்த இறுதி ஊர்வலத்தின் போது கமேனியின் உடல் ஈரான் மற்றும் அண்டை நாடான ஈராக்கின் முக்கிய நகரங்களுக்குக் கொண்டு செல்லப்பட உள்ளதால், தெஹ்ரானின் முக்கிய வீதிகள் மற்றும் வான்வழிப் போக்குவரத்து தற்காலிகமாக மூடப்பட்டுள்ளன. ஈரானின் புதிய உச்ச தலைவராகப் பொறுப்பேற்றுள்ள மொஜ்தபா கமேனி தன் தந்தையின் இறுதிச்சடங்கில் நேரில் பங்கேற்பாரா அல்லது பாதுகாப்பு காரணங்களுக்காகத் தொடர்ந்து ரகசிய இடத்திலேயே இருப்பாரா என்ற பலத்த கேள்விகளுக்கு மத்தியில் இந்த இறுதிச்சடங்கு நிகழ்வுகள் ஈரானில் பலத்த பாதுகாப்புடன் நடைபெற்று வருகின்றன.
