இஸ்ரேலின் 120 இடங்களைக் கொண்ட நெசெட் (Knesset) நாடாளுமன்றத்திற்கு அக்டோபர் 27 அன்று பொதுத்தேர்தல் நடைபெறுகிறது. 2023 அக்டோபர் 7 சம்பவத்திற்குப் பிறகு நடைபெறும் முதல் தேர்தல் என்பதால், நெதன்யாகுவின் லிகுட் (Likud) கட்சிக்கும் எதிர்க்கட்சிகளுக்கும் இடையே கடும் போட்டி நிலவுகிறது. முன்னாள் ராணுவத் தளபதி காடி ஐசென்காட் தலைமையிலான ‘யாஷார்’ (Yashar!) கட்சியும், முன்னாள் பிரதமர் நாஃப்தாலி பென்னட் தலைமையிலான கூட்டணியும் நெதன்யாகுவுக்கு முதன்மைச் சவாலாக உருவெடுத்துள்ளன.
ஆட்சியைப் பிடிக்க 61 இடங்களின் ஆதரவு தேவைப்படும் நிலையில், பெரும்பாலான கருத்துக் கணிப்புகளில் நெதன்யாகு கூட்டணிக்கும் எதிர்க்கட்சித் தரப்பிற்கும் இடையே இழுபறி நிலை நீடிப்பதாகத் தகவல்கள் தெரிவிக்கின்றன. காசா போர் கையாளுதல் மற்றும் உள்நாட்டு சட்டச் சீர்திருத்தங்கள் தொடர்பாக நெதன்யாகு மீது விமர்சனங்கள் இருக்கும் நிலையில், நாட்டின் பாதுகாப்பு மற்றும் பொருளாதார அனுபவத்தை மையமாக வைத்து அவர் வாக்கு சேகரித்து வருகிறார். அதேவேளையில், எதிர்க்கட்சிகள் ஒன்றிணைந்து ஆட்சியமைக்க தீவிர முயற்சியில் ஈடுபட்டு வருகின்றன.
தேர்தல் முடிவுகளுக்குப் பிறகே கூட்டணிகள் அமைக்கப்பட்டுப் புதிய அரசு உருவாவதற்கான 28 நாட்கள் கெடுத் தொடங்கும் என்பதால் இஸ்ரேல் அரசியலில் சுவாரஸ்யம் கூடியுள்ளது.
வாக்குப்பதிவு நிறைவடைந்து தேர்தல் முடிவுகள் அதிகாரப்பூர்வமாக வெளியான பிறகே இஸ்ரேலின் அடுத்த பிரதமர் யார் என்பது உறுதியாகும்.
