தெற்கு லண்டனின் பர்மாண்டசி (Bermondsey) பகுதியில் அமைந்துள்ள கழிவு மறுசுழற்சி மையம் ஒன்றில் திடீரெனப் பயங்கரத் தீ விபத்து ஏற்பட்டது. இத்தீ விபத்தின் காரணமாக அப்பகுதி முழுவதும் அடர்ந்த கருப்புகைப் மூட்டம் சூழ்ந்துள்ளது. தண்டவாளங்களுக்கு மிக அருகில் அமைந்துள்ள கட்டிடத்தில் தீ வேகமாகப் பரவியதால், பாதுகாப்பு நடவடிக்கையாக லண்டன் பிரிட்ஜ் (London Bridge) ரயில் நிலையத்திற்குச் செல்லும் பிரதான இரயில் பாதைகள் அனைத்தும் மூடப்பட்டுப் போக்குவரத்து நிறுத்தப்பட்டுள்ளது.
சுமார் 100-க்கும் மேற்பட்ட தீயணைப்பு வீரர்கள் மற்றும் பல தீயணைப்பு வாகனங்கள் சம்பவ இடத்திற்கு விரைந்து வந்து தீயைக் கட்டுப்படுத்தும் பணியில் தீவிரமாக ஈடுபட்டு வருகின்றன. இருப்பினும், மறுசுழற்சி மையத்தில் குவிக்கப்பட்டுள்ள பிளாஸ்டிக் மற்றும் கழிவுப் பொருட்கள் காரணமாகத் தீயின் வீரியம் அதிகரித்து வருவதாகத் தீயணைப்புத் துறை தெரிவித்துள்ளது. புகை மூட்டம் அதிகமாக இருப்பதால், அப்பகுதியில் வசிக்கும் பொதுமக்கள் தங்களது வீடு மற்றும் அலுவலகங்களின் கதவு, ஜன்னல்களை மூடி வைக்குமாறு அறிவுறுத்தப்பட்டுள்ளனர்.
ரயில் பாதைகள் மூடப்பட்டதன் காரணமாகப் பணி முடிந்து வீட்டிற்குத் திரும்பும் ஆயிரக்கணக்கான பயணிகள் பெரும் அவதிக்குள்ளாகியுள்ளனர். பல ரயில் சேவைகள் ரத்து செய்யப்பட்டுள்ளன அல்லது மாற்றுப் பாதைகளில் திருப்பி விடப்பட்டுள்ளன. ரயில்வே அதிகாரிகள் தண்டவாளங்கள் மற்றும் அதன் கட்டமைப்புப் பாதுகாப்பை ஆய்வு செய்த பின்னரே இயல்பு நிலை திரும்புவது குறித்து முடிவு செய்யப்படும் எனத் தெரிவித்துள்ளனர்.
முக்கியப் போக்குவரத்துப் பாதையில் ஏற்பட்டுள்ள இந்தத் தீ விபத்து லண்டன் நகரில் பெரும் பரபரப்பை ஏற்படுத்தியுள்ளது. இத்தீ விபத்திற்கான காரணம் குறித்துத் தீயணைப்புத் துறை மற்றும் காவல்துறையினர் வழக்குப் பதிவு செய்து தீவிர விசாரணை மேற்கொண்டு வருகின்றனர்.
