அமெரிக்காவின் நியூயார்க் நகரில் உள்ள புரூக்ளின் (Brooklyn) பகுதியில் நள்ளிரவில் மர்ம நபர்கள் சிலர் பாதாள சாக்கடையின் (Sewer Manholes) இரும்பு மூடியைத் திறந்து கொண்டு, அடுத்தடுத்து வெளியேறும் வினோதமான சிசிடிவி காட்சிகள் சமூக வலைத்தளங்களில் வெளியாகி ஒட்டுமொத்த அமெரிக்காவையும் உலுக்கியுள்ளன. இதனால் நியூயார்க் சுரங்கங்களுக்கு அடியில் ‘மோல் மென்’ (Mole Men) எனப்படும் மனித உருவ வினோத உயிரினங்கள் வாழ்கின்றனவா என்ற காட்டுத்தீ போன்ற வதந்திகளும், சதி கோட்பாடுகளும் இணையத்தில் பரவத் தொடங்கியுள்ளதால் நியூயார்க் நகர போலீசார் (NYPD) அவசர விசாரணையில் இறங்கியுள்ளனர்.
கடந்த சில தினங்களுக்கு முன்பு நள்ளிரவு 1 மணியளவில் புரூக்ளினின் வில்லியம்ஸ்பர்க் மற்றும் கிரேவ்செண்ட் ஆகிய இரண்டு வெவ்வேறு இடங்களில் இந்த அதிர்ச்சியூட்டும் சம்பவங்கள் அரங்கேறியுள்ளன. அங்குள்ள மெக்டொனால்டு அவென்யூ பகுதியில் பதிவான வீடியோவில், நீர்ப்புகா ஆடைகள் (Waders) மற்றும் பூட்ஸ் அணிந்த சுமார் 7 முதல் 8 பேர் கொண்ட ஆண்கள் குழு ஒன்று நள்ளிரவில் சாக்கடைக்குள் இறங்கியதும், சுமார் இரண்டு மணி நேரத்திற்குப் பிறகு அதே துவாரத்தின் வழியே மீண்டும் மேலே ஏறி வந்துள்ளனர். பின்னர் அவர்கள் தங்களின் அசுத்தமான உடைகளைக் கலைந்துவிட்டு, அங்குக் காத்திருந்த வாகனங்களில் ஏறி மின்னல் வேகத்தில் தப்பியுள்ளனர். மற்றொரு இடத்தில், தலைக்கவச விளக்குகளுடன் (Headlamps) சாலைப் போக்குவரத்திற்கு மிக அருகில் சாக்கடை மூடியை அடியில் இருந்து தள்ளிக்கொண்டு இந்த மர்மக் கும்பல் வெளியேறியுள்ளது.
இந்த விபரீதச் செயல் குறித்துப் பொதுமக்களிடம் இருந்து அவசரக் கால 911 அழைப்புகள் வந்ததைத் தொடர்ந்து, நியூயார்க் காவல்துறையின் (NYPD) அதிநவீன அவசரச் சேவைப் பிரிவு, தீயணைப்புத் துறை (FDNY) மற்றும் சுற்றுச்சூழல் பாதுகாப்புத் துறை (DEP) அதிகாரிகள் சம்பவ இடத்திற்கு விரைந்தனர். பாதாள சாக்கடைக்குள் ஏதேனும் வெடிபொருட்களோ அல்லது அசம்பாவிதப் பொருட்களோ வைக்கப்பட்டுள்ளதா என்பதை உறுதி செய்ய ரோபோடிக் கேமராக்கள் மற்றும் சிறப்புப் படைகள் மூலம் நிலத்தடி சுரங்கங்கள் முழுவதும் தீவிர சோதனை நடத்தப்பட்டது. தற்போதைக்கு தீவிரவாத அச்சுறுத்தல்கள் எதுவும் இல்லை என போலீசார் உறுதி செய்தாலும், நச்சு வாயுக்கள், திடீர் வெள்ள அபாயம் மற்றும் ஆக்சிஜன் பற்றாக்குறை நிறைந்த இப்பகுதிகளுக்குள் பொதுமக்களோ அல்லது மர்ம நபர்களோ நுழைவது சட்டவிரோதமானது மற்றும் உயிருக்கு ஆபத்தானது என அதிகாரிகள் எச்சரித்துள்ளனர்.
இணையத்தில் ‘மோல் மென்’ குறித்த கதைகள் உலா வந்தாலும், காவல்துறையின் நம்பகமான வட்டாரங்கள் இந்த மர்ம மனிதர்கள் “புதையல் வேட்டைக்காரர்களாக” (Treasure Hunters) இருக்கலாம் என்று சந்தேகிக்கின்றன. நியூயார்க் நகரத்தின் கழிவுநீர் உள்கட்டமைப்பில் தவறி விழும் தங்கம், பணம் மற்றும் மதிப்புமிக்க பொருட்களைச் சேகரிக்கும் நகர்ப்புறக் கூலிப்படையாக இவர்கள் இருக்கலாம் எனக் கருதப்படுகிறது. இதுவரை இந்தச் சம்பவங்கள் தொடர்பாக யாரும் கைது செய்யப்படாத நிலையில், தப்பியோடிய மர்ம நபர்களை அடையாளம் காணும் பணிகளில் நியூயார்க் போலீசார் தீவிரமாக ஈடுபட்டுள்ளனர்.
