சுமார் 3,15,000 ஆண்டுகளுக்கு முன்பு ஆப்பிரிக்க நாடான மொராக்கோவில் வாழ்ந்த பழமையான மனிதனின் (ஹோமோ சேபியன்ஸ்) முக அமைப்பை சர்வதேச ஆய்வாளர்கள் குழு டிஜிட்டல் தொழில்நுட்பம் மூலம் வெற்றிகரமாக மீளுருவாக்கம் செய்துள்ளது. ஆய்வு முடிவுகளின்படி, பிரேசிலை சேர்ந்த முப்பரிமாணக் கலைஞர் சிசெரோ மொரேஸ் (Cicero Moraes) தலைமையிலான குழுவினர் நவீன கணினித் தொழில்நுட்பத்தைப் பயன்படுத்தி இந்த முக உருவமைப்பை உருவாக்கியுள்ளனர். மொராக்கோவின் ஜெபல் இர்ஹவுட் (Jebel Irhoud) தொல்பொருள் தளத்தில் கண்டெடுக்கப்பட்ட பழமையான மண்டை ஓட்டுப் பகுதிகளை அடிப்படையாகக் கொண்டு இந்த சாதனை நிகழ்த்தப்பட்டுள்ளது.
கடந்த 1960-ஆம் ஆண்டுகளில் ஜெபல் இர்ஹவுட் பகுதியில் சுரங்கத் தொழிலாளிகளால் இந்த மனித எலும்புப் பகுதிகள் முதன்முதலில் கண்டுபிடிக்கப்பட்டன. தொடக்கத்தில் இவை 40,000 ஆண்டுகள் பழமையானவை எனக் கருதப்பட்ட நிலையில், 2017-ஆம் ஆண்டு ‘நேச்சர்’ (Nature) இதழில் வெளியான விரிவான ஆய்வில் இவை 3,15,000 ஆண்டுகள் பழமையான ஹோமோ சேபியன்ஸ் புதைபடிவங்கள் என்பது உறுதி செய்யப்பட்டது. தற்போது ஆய்வாளர்கள் ‘இர்ஹவுட் 1’ (Irhoud 1) எனப் பெயரிடப்பட்ட முதன்மை மண்டை ஓட்டுப் பகுதியுடன், தாடை மற்றும் பற்களின் படிவங்களை ஒருங்கிணைத்து முப்பரிமாண (3D) மண்டை ஓட்டு மாதிரியை வடிவாக்கம் செய்துள்ளனர்.
இந்த ஆய்வில் இரு வேறுபட்ட முக வடிவங்கள் உருவாக்கப்பட்டு வெளியிடப்பட்டுள்ளன. முதலாவது வடிவம், தலைமுடி இன்றி தசை மற்றும் எலும்பு அமைப்பைத் துல்லியமாகக் காட்டும் சாம்பல் நிற (Grayscale) அறிவியல் மாதிரியாகும். இரண்டாவது வடிவம், தோல் நிறம், கண்கள், தலைமுடி மற்றும் தாடியுடன் கூடிய முழுமையான மனித முகத்தின் வண்ணப் படமாகும். நவீன மனித உடற்கூறியல் தரவுகளைப் பயன்படுத்தி இந்த முக அமைப்பு துல்லியமாகக் கணக்கிடப்பட்டுள்ளதாக ஆய்வுக் கட்டுரையில் குறிப்பிடப்பட்டுள்ளது.
மனித பரிணாம வளர்ச்சியைப் புரிந்துகொள்வதில் இந்த முக மீளுருவாக்கம் ஒரு முக்கிய மைல்கல்லாகக் கருதப்படுகிறது. பல்லாயிரம் ஆண்டுகளுக்கு முன்பு வாழ்ந்த நமது முன்னோர்களின் முக அமைப்பை நேரில் காண்பது போன்ற உணர்வை இது உலகெங்கிலும் உள்ள தொல்பொருள் ஆர்வலர்களுக்கு வழங்கியுள்ளது. மேலும், திறந்த மூலத் தொழில்நுட்பங்கள் (Open-source tools) மூலம் பழங்கால படிவங்களை ஆய்வு செய்யும் முறை எதிர்காலத்தில் தொல்லியல் துறையில் புதிய பாதையை அமைக்கும் என எதிர்பார்க்கப்படுகிறது.
