பாலஸ்தீன ஆணையத்தால் தயாரிக்கப்பட்டு காசா மற்றும் மேற்குக்கரை பள்ளிகளில் கற்பிக்கப்படும் பாடநூல்களில், இஸ்ரேலுக்கு எதிரான வன்முறை மற்றும் யூத எதிர்ப்பு கருத்துக்கள் தொடர்ச்சியாக இடம்பெற்றுள்ளதாக சர்வதேச அமைப்புகள் நடத்திய ஆய்வில் தெரியவந்துள்ளது. மேற்கொள்ளப்பட்ட தாக்குதல்களை நியாயப்படுத்தும் வகையிலான பாடப்பகுதிகள் புதிய பாடத்திட்டங்களிலும் தொடர்வதாகத் தெரிவிக்கப்பட்டுள்ளது.
கல்விப் பாடநூல்களை ஆய்வு செய்த நிபுணர்கள், இரண்டாம் வகுப்பு முதல் பன்னிரண்டாம் வகுப்பு வரையிலான பாடப்புத்தகங்களில் வரலாற்று மற்றும் புவியியல் விவரங்கள் மாற்றப்பட்டு எழுதப்பட்டுள்ளதாகக் குறிப்பிட்டுள்ளனர். பாடப் புத்தகங்களின் வரைபடங்களில் இருந்து இஸ்ரேல் முற்றிலும் நீக்கப்பட்டு முழுப் பகுதியும் பாலஸ்தீனமாக சித்தரிக்கப்பட்டுள்ளதாகவும், கணிதம் மற்றும் அறிவியல் பாடப் பயிற்சிகளிலும்கூட அரசியல் ரீதியான கருத்துக்கள் புகுத்தப்பட்டுள்ளதாகவும் ஆய்வு அறிக்கையில் விவரிக்கப்பட்டுள்ளது.
ஐரோப்பிய ஒன்றியத்துடனான ஒப்பந்தத்தின்படி பாடத்திட்டங்களில் சீர்திருத்தம் கொண்டுவரப்படும் எனப் பாலஸ்தீன ஆணையம் உறுதியளித்திருந்த போதிலும், நடைமுறையில் வன்முறையை ஊக்குவிக்கும் பாடங்கள் நீக்கப்படவில்லை என ‘இம்பேக்ட்-சி’ அமைப்பின் தலைமைச் செயல் அதிகாரி மார்கஸ் ஷெஃப் குற்றம் சாட்டியுள்ளார். இருப்பினும், பாலஸ்தீனக் கல்வி அமைச்சகத்தின் சார்பில் இது குறித்துப் பேசுகையில், தங்களின் சர்வதேச சட்ட உரிமைகள் மற்றும் வரலாற்று உண்மைகளின் அடிப்படையிலேயே பாடத்திட்டங்கள் அமைக்கப்பட்டுள்ளதாகத் தெரிவிக்கப்பட்டுள்ளது.
தற்போது காசாவில் போரினால் பாதிக்கப்பட்டுள்ள குழந்தைகளுக்கு ஐ.நா-வின் நிவாரண முகமையான ‘உன்ர்வா’ (UNRWA) டிஜிட்டல் தளங்கள் மூலம் மாற்று வழிகளில் கல்வியை வழங்கி வருகிறது. சர்வதேச நிதியுதவிகள் மூலமாகப் பாடத்திட்டங்களை முற்றிலும் ஆய்வு செய்து, அமைதி மற்றும் மனித உரிமைகளுக்கு முன்னுரிமை அளிக்கும் வகையிலான புதிய பாடப் புத்தகங்களை உருவாக்க வேண்டும் என சர்வதேசக் கண்காணிப்பு அமைப்புகள் கோரிக்கை விடுத்துள்ளன.
