பிரிட்டனில் ஊடுருவியுள்ள புதினின் கொலையாளிகள்! எந்த நேரத்திலும் தாக்குதல்? – ரஷ்யத் தொழிலதிபர் விடுத்த அதிரடி எச்சரிக்கை!

ரஷ்யாவின் முன்னாள் எண்ணெய் நிறுவன அதிபரும், அதிபர் புதினின் தீவிர விமர்சகருமான மிகைல் கோடொர்கோவ்ஸ்கி, லண்டனில் இருந்து அளித்துள்ள சமீபத்திய பேட்டியில் திடுக்கிடும் தகவல்களை வெளியிட்டுள்ளார். புதினின் ரகசிய ஏஜெண்டுகள் தற்போது பிரிட்டன் மண்ணில் தீவிரமாகச் செயல்பட்டு வருவதாகவும், அவர்கள் எந்நேரமும் நாசவேலைகளில் ஈடுபடத் தயாராக இருப்பதாகவும் அவர் தெரிவித்துள்ளார். 2018-ஆம் ஆண்டு சாலிஸ்பரியில் (Salisbury) நடந்த நொவிசோக் (Novichok) நச்சுத் தாக்குதல் போன்ற மற்றொரு கொடூரமான தாக்குதலைப் பிரிட்டன் விரைவில் சந்திக்க நேரிடும் என அவர் தனது புலனாய்வுத் தகவல்கள் மூலம் எச்சரித்துள்ளார்.

பிரிட்டனின் தற்போதைய அரசியல் மற்றும் பாதுகாப்புச் சூழல் பலவீனமாக இருப்பதை புதின் தனக்குச் சாதகமாகப் பயன்படுத்திக் கொள்ளத் துடிக்கிறார் என்பது கோடொர்கோவ்ஸ்கியின் பிரதான குற்றச்சாட்டு. “மேற்கத்திய நாடுகளிடையே ஒருவித அச்சத்தையும், பாதுகாப்பற்ற உணர்வையும் உருவாக்குவதே புதினின் நோக்கம். இதற்காக அவர் லண்டன் வீதிகளில் வன்முறையைத் தூண்டவோ அல்லது முக்கிய நபர்களைக் குறிவைக்கவோ தயங்கமாட்டார்” என்று அவர் கூறியுள்ளார். குறிப்பாக, அமெரிக்க அதிபர் தேர்தலுக்குப் பிந்தைய சூழலில் ஐரோப்பிய நாடுகளுக்கு இடையே ஏற்பட்டுள்ள இடைவெளியைப் புதின் ஒரு ‘வாய்ப்பாக’ (Window of Opportunity) கருதுவதாக அவர் சுட்டிக்காட்டியுள்ளார்.

ரஷ்யாவில் 10 ஆண்டுகள் சிறைவாசம் அனுபவித்து, தற்போது லண்டனில் வசித்து வரும் கோடொர்கோவ்ஸ்கி, தனது உயிருக்கு எந்நேரமும் ஆபத்து இருப்பதை உணர்ந்துள்ளதாகத் தெரிவித்துள்ளார். “ரஷ்ய உளவு அமைப்பினர் சாதாரண மனிதர்களைப் போலவே நம்மோடு நடமாடுகிறார்கள்; அவர்களைக் கண்டறிவது கடினம்” என்று கூறும் அவர், பிரிட்டன் அரசு இத்தகைய அச்சுறுத்தல்களை எதிர்கொள்ள மிகவும் ஆக்ரோஷமான (Aggressive) தற்காப்பு நடவடிக்கைகளை எடுக்க வேண்டும் என வலியுறுத்தியுள்ளார். ரஷ்யாவின் ‘கேஜிபி’ (KGB) பாணி உளவு வேலைகள் இப்போது நவீனத் தொழில்நுட்பத்துடன் இணைந்து இன்னும் அபாயகரமானதாக மாறியுள்ளதாகவும் அவர் தனது அறிக்கையில் குறிப்பிட்டுள்ளார்.

இந்த விவகாரம் குறித்து பிரிட்டன் பாதுகாப்புத் துறை வட்டாரங்கள் தீவிர ஆலோசனை நடத்தி வருகின்றன. கோடொர்கோவ்ஸ்கியின் எச்சரிக்கை வெறும் யூகம் மட்டுமல்ல, அது கள யதார்த்தத்தை ஒட்டியது எனப் பாதுகாப்பு வல்லுநர்கள் கருதுகின்றனர். ஏற்கனவே உக்ரைன் போரினால் ரஷ்யாவுக்கும் பிரிட்டனுக்கும் இடையே நேரடி மோதல் போக்கு நிலவி வரும் வேளையில், புதினின் ஏஜெண்டுகள் குறித்த இந்தத் தகவல் லண்டனில் பாதுகாப்பை மேலும் பலப்படுத்த வேண்டிய அவசியத்தை உணர்த்தியுள்ளது. “பிரிட்டனைத் தனது முதன்மை எதிரியாக புதின் கருதுகிறார்” என்ற கோடொர்கோவ்ஸ்கியின் வார்த்தைகள் சர்வதேச அளவில் விவாதிக்கப்பட்டு வருகின்றன.