உக்ரைன் நடத்திய தீவிர ட்ரோன் தாக்குதல்களால் ரஷ்யாவில் பெட்ரோல் மற்றும் டீசல் தட்டுப்பாடு அதிகரித்து வரும் சூழலில், நாட்டு மக்கள் “எதற்கும் தயாராக இருக்க வேண்டும்” (Prepared for anything) என்று ரஷ்ய அதிபர் விளாடிமிர் புடின் எச்சரித்துள்ளார். தூர கிழக்கு பிராந்தியத்தில் உள்ள பிளாடிவோஸ்டாக் நகரில் நடைபெற்ற பொருளாதார மாநாட்டில் பேசிய அவர், சுத்திகரிப்பு ஆலைகள் மீதான எதிரிப் படைகளின் தாக்குதலைத் தங்களால் முன்கூட்டியே கணிக்க முடியாமல் போனது பெரிய தவறாகிவிட்டது என்றும் பகிரங்கமாக ஒப்புக்கொண்டுள்ளார்.
உக்ரைன் உடனான போரில் ரஷ்யாவின் எண்ணெய் சுத்திகரிப்பு ஆலைகளை எதிரிகள் தாக்குவார்கள் என மாஸ்கோ எதிர்பார்க்கவில்லை என்று குறிப்பிட்ட புடின், அவை “சாதாரண சிவில் கட்டமைப்பு” எனக் கருதி பாதுகாப்பு அளிக்காமல் விட்டது தங்களின் தவறு எனத் தெரிவித்தார். உக்ரைனின் இந்தத் தாக்குதல்களுக்குப் பதிலடி கொடுக்கும் வகையில், அவர்களின் முக்கிய உள்கட்டமைப்புகள் மற்றும் மின் உற்பத்தி நிலையங்கள் மீது ரஷ்யா மிகக் கடுமையான “பழிவாங்கும் தாக்குதல்களை” நடத்தும் எனவும் அவர் எச்சரித்தார்.
உக்ரைனிய ட்ரோன் தாக்குதல்கள் காரணமாக ரஷ்யாவின் எண்ணெய் சுத்திகரிப்பு திறன் கணிசமாகக் குறைந்துள்ளதால், நாட்டின் 17-க்கும் மேற்பட்ட பிராந்தியங்களில் பெட்ரோல் விற்பனைக்குக் கடும் கட்டுப்பாடுகள் விதிக்கப்பட்டுள்ளன. தட்டுப்பாட்டைச் சமாளிக்கப் பாரத தேசம், மொராக்கோ மற்றும் துருக்கி ஆகிய நாடுகளிலிருந்து கடல் வழியாகப் பெட்ரோல் இறக்குமதி செய்யும் நிலைக்கு மாஸ்கோ தள்ளப்பட்டுள்ளது. பாதிக்கப்பட்ட ஆலைகளைச் சீரமைக்கக் கால அவகாசம் தேவைப்படும் என்பதால், மக்கள் இந்த அத்தியாவசியப் பொருள் பற்றாக்குறைக்குத் பழகிக் கொள்ள வேண்டும் எனச் சுட்டிக்காட்டப்பட்டுள்ளது.
போர்க்களத்தில் அமைதிப் பேச்சுவார்த்தைக்கான கதவுகள் முற்றிலும் மூடப்படவில்லை என்ற போதிலும், ரஷ்யாவிற்கு எதிராக உக்ரைன் நடத்தி வரும் வான்வழித் தாக்குதல்கள் பேச்சுவார்த்தைக்கான சூழலை மேலும் சிக்கலாக்கியுள்ளதாக புடின் குற்றம் சாட்டினார். ரஷ்யாவின் பொருளாதார நிலையை முடக்கும் நோக்கில் உக்ரைன் தீவிரமடைந்து வரும் நிலையில், நாட்டின் வான் பாதுகாப்பு அமைப்புகளைப் (Air Defense Systems) பலப்படுத்துவதே மாஸ்கோவின் முதன்மை இலக்காக இருக்கும் என அவர் உறுதிபடத் தெரிவித்தார்.
