தமிழகத்தில் அண்மையில் நடைபெற்ற சட்டப்பேரவைத் தேர்தலில் 108 தொகுதிகளில் வென்று, அக்கட்சியின் தலைவர் சி. ஜோசப் விஜய் தலைமையில் புதிய தமிழக வெற்றிக் கழக (தவெக) அரசு அமைந்துள்ள சூழலில், மாநில அரசியல் களம் நாளுக்கு நாள் அனல் பறந்து வருகிறது. குறிப்பாக, தவெக அரசுக்கும், பிரதான எதிர்க்கட்சிகளான திமுக மற்றும் அதிமுகவுக்கும் இடையேயான மோதல் உச்சமடைந்துள்ளது. இந்நிலையில், தவெக அரசின் ஆயுள் குறித்தும், முதலமைச்சர் விஜய் குறித்தும் அதிமுக முன்னாள் அமைச்சர் கே.டி. ராஜேந்திரபாலாஜி பேசியுள்ள சர்ச்சை பேச்சு தமிழக அரசியலில் புதிய புயலைக் கிளப்பியுள்ளது.
ஸ்ரீவில்லிபுத்தூரில் நடைபெற்ற அதிமுக நிர்வாகிகள் ஆலோசனைக் கூட்டத்தில் பேசிய கே.டி. ராஜேந்திரபாலாஜி, தவெக அரசை “ஒரு நாள் கூத்து” என்று கடுமையாக எள்ளி நகையாடியுள்ளார். திமுக மற்றும் அதிமுக ஆகிய இரண்டு பிரதானக் கட்சிகளையும் விரும்பாத சில வாக்காளர்களின் வாக்குளைப் பெற்றுத்தான் விஜய் தற்காலிகமாக இந்த வெற்றியைப் பெற்றுள்ளார் என்றும், இது நிலையான ஒரு வெற்றி கிடையாது என்றும் அவர் சுட்டிக்காட்டியுள்ளார். மேலும், “விஜய்யின் இந்த ஆட்டம் நீண்ட நாட்களுக்கு நீடிக்காது, விரைவில் இதற்கு முற்றுப்புள்ளி வைக்கப்படும்” என்றும் அவர் பகிரங்கமாக முழங்கியுள்ளார்.
இக்கூட்டத்தில் மேலும் அதிரடியாகப் பேசிய ராஜேந்திரபாலாஜி, “முன்னாள் முதலமைச்சரும், திமுக தலைவருமான மு.க. ஸ்டாலினுக்கு எப்போது உண்மையாகக் கோபம் வருகிறதோ, அன்றோடு இந்தத் தவெக ஆட்சி தமிழ்நாட்டில் முற்றிலும் காலி ஆகிவிடும்” என்று எச்சரித்துள்ளார். களத்தில் எப்போதும் போல திமுக மற்றும் அண்ணா திமுக ஆகிய இரு பெரும் திராவிடக் கட்சிகளுக்கு இடையேதான் உண்மையான போட்டி நிலவுகிறதே தவிர, தவெக போன்ற கட்சிகளை மக்கள் பெரிதாகக் கண்டுகொள்வதில்லை என்றும் அவர் ஒருமையில் விமர்சித்துள்ளார். அதிமுகவில் இருந்து விலகி தவெகவில் இணையும் நிர்வாகிகள் குறித்துப் பேசிய அவர், ஏமாந்து போனவர்கள் விரைவில் தங்களது தவறை உணர்ந்து திரும்புவார்கள் என்றார்.
அதிமுக முன்னாள் அமைச்சரின் இந்தத் தாக்குதலுக்கு திமுக மற்றும் தவெக ஆகிய இரு தரப்பில் இருந்தும் உடனடியாகக் கண்டனங்கள் எழத் தொடங்கியுள்ளன. தவெகவினர் ராஜேந்திரபாலாஜியின் கருத்துக்கு தங்களது கடுமையான எதிர்ப்பைப் பதிவு செய்து வரும் நிலையில், கரூரில் அண்மையில் நடைபெற்ற பொதுக்கூட்டத்தில் பேசிய முதலமைச்சர் விஜய், தங்களது தூய மக்கள் ஆட்சியை யாராலும் அசைக்க முடியாது எனப் பதிலடி கொடுத்துள்ளார். ராஜேந்திரபாலாஜியின் இந்தச் சர்ச்சைப் பேச்சு, வரவிருக்கும் இடைத்தேர்தல் களம் மற்றும் தமிழகத்தின் மும்முனை அரசியல் யுத்தத்தை மேலும் தீவிரப்படுத்தியுள்ளது.
