நார்வே கடற்பகுதியில் பாதுகாப்புப் பணியில் ஈடுபட்டிருந்த பிரிட்டன் ராயல் நேவியின் முதன்மை விமானம் தாங்கிப் போர்க்கப்பலான ‘எச்.எம்.எஸ் பிரின்ஸ் ஆஃப் வேல்ஸ்’ (HMS Prince of Wales) அருகே ரஷ்யாவின் உளவு விமானம் ஒன்று மிக ஆபத்தான முறையில் பறந்து சென்று சோனார் டிராக்கர்களை (Sonar Trackers) வீசியுள்ள சம்பவம் சர்வதேச அளவில் பெரும் பரபரப்பை ஏற்படுத்தியுள்ளது. ரஷ்யாவின் இந்த அத்துமீறிய நடவடிக்கையைத் தொடர்ந்து, பிரிட்டன் கடற்படை தனது அதிநவீன எஃப்-35பி (F-35B) போர் விமானங்களை உடனடியாக வானில் செலுத்தி அந்த உளவு விமானத்தை அங்கிருந்து விரட்டியடித்துள்ளது. நேட்டோ (NATO) பாதுகாப்புப் படையின் ஒரு பகுதியாக பிரிட்டன் கப்பல் குழுவினர் வான் பாதுகாப்புப் பயிற்சியில் ஈடுபட்டிருந்தபோது இந்த சம்பவம் நிகழ்ந்துள்ளது.
ரஷ்ய கடற்படைக்குச் சொந்தமான ‘டிடியு-142 பியர்-எஃப்’ (Tu-142 Bear F) என்ற கடல்சார் ரோந்து மற்றும் உளவு விமானமே இந்த அத்துமீறலில் ஈடுபட்டுள்ளது. சர்வதேச தகவல் தொடர்பு அலைவரிசைகள் மூலம் பிரிட்டன் அதிகாரிகள் தொடர்பு கொள்ள முயன்றபோதும், அதற்கு எந்தப் பதிலும் அளிக்காமல் அந்த ரஷ்ய விமானம் போர்க்கப்பலுக்கு மிக அருகில், குறைந்த உயரத்தில் பறந்துள்ளது. மேலும், கடலுக்கடியில் உள்ள நீர்மூழ்கிக் கப்பல்களைக் கண்காணிப்பதற்காகப் பயன்படுத்தப்படும் நூற்றுக்கணக்கான ‘சோனோபுய்களை’ (Sonobuoys) அந்தப் போர்க்கப்பல் செல்லும் பாதையிலேயே வீசியுள்ளது. ரஷ்யாவின் இந்த செயல் பாதுகாப்பற்றது மற்றும் தொழில்முறைக்கு எதிரானது என்று பிரிட்டன் பாதுகாப்பு அமைச்சகம் கடுமையாகக் கண்டனம் தெரிவித்துள்ளது.
இந்த விவகாரம் குறித்து பிரிட்டன் பாதுகாப்புத்துறை அமைச்சர் டான் ஜார்விஸ் கூறுகையில், ரஷ்ய அதிபர் விளாடிமிர் புடின் சர்வதேச அளவில் எதிர்கொண்டு வரும் கடுமையான அரசியல் அழுத்தங்களின் காரணமாகவே இதுபோன்ற ஆத்திரமூட்டும் செயல்களில் ரஷ்யா ஈடுபட்டு வருவதாகக் குறிப்பிட்டுள்ளார். மேலும், கடலுக்கு அடியில், வான்வெளியில், மற்றும் சைபர் தளங்களில் என அனைத்து இடங்களிலும் ரஷ்யாவின் அச்சுறுத்தல்கள் தொடர்ந்து அதிகரித்து வருவதை இந்தச் சம்பவம் காட்டுவதாகவும், நேட்டோ கூட்டணியின் பாதுகாப்பை உறுதி செய்ய பிரிட்டன் எப்போதும் தயாராக இருப்பதாகவும் அவர் உறுதிபடத் தெரிவித்துள்ளார்.
உக்ரைன் போருக்குப் பிறகு பிரிட்டன் மற்றும் ரஷ்யா இடையேயான தூதரக உறவுகள் மிக மோசமான நிலையை எட்டியுள்ள சூழலில், நார்வே கடலில் நடந்துள்ள இந்த வான்வழி மோதல் போக்கு இரு நாடுகளுக்கு இடையேயான பதற்றத்தை மேலும் அதிகரித்துள்ளது. வட அட்லாண்டிக் மற்றும் ஆர்க்டிக் பகுதிகளில் நேட்டோ படைகளின் நடமாட்டத்தைக் கண்காணிப்பதற்கும், பிரிட்டனின் கடற்படை நீர்மூழ்கிக் கப்பல்களின் ஒலி சமிக்ஞைகளை (Acoustic Signatures) ரகசியமாகச் சேகரிப்பதற்கும் ரஷ்யா தொடர்ந்து இதுபோன்ற உளவு நடவடிக்கைகளை மேற்கொண்டு வருவதாகப் பாதுகாப்புப் படை நிபுணர்கள் கருதுகின்றனர்.
