அமெரிக்கா மற்றும் இஸ்ரேல் படைகள் இணைந்து ஈரான் மீது தாக்குதலைத் தொடங்கி (Operation Epic Fury) 6 மாதங்கள் நிறைவடைந்துள்ள நிலையில், இந்த முழு போரின் போக்கும் அதிபர் டொனால்ட் டிரம்பின் (Donald Trump) சமூக வலைத்தளப் பதிவுகள் மூலம் உலகிற்கு எவ்வாறு கடத்தப்பட்டது என்பது குறித்த சுவாரசியமான தரவு பகுப்பாய்வு வெளியாகியுள்ளது. கடந்த பிப்ரவரி 28 முதல் ஆகஸ்ட் 25 வரை, அதிபர் டிரம்ப் தனது ‘ட்ரூத் சோஷியல்’ (Truth Social) பக்கத்தில் ஈரானைப் பற்றி மட்டும் சுமார் 319 பதிவுகளை (சராசரியாக 14 மணி நேரத்திற்கு ஒரு பதிவு) வெளியிட்டுள்ளார். 32,000-க்கும் அதிகமான வார்த்தைகளைக் கொண்ட இந்த தொடர் பதிவுகள், ஒரு போர் எவ்வாறு அறிவிக்கப்பட்டது, நடத்தப்பட்டது, வெற்றி எனப் பிரகடனப்படுத்தப்பட்டது மற்றும் மீண்டும் பொருளாதாரப் போராக உருவெடுத்தது என்பதைப் படம் பிடித்துக் காட்டுகின்றன.
போரின் தொடக்கத்தில், தாக்குதலின் தீவிரத்தையும் ஈரானிய தலைவர்களின் வீழ்ச்சியையும் டிரம்ப் தனது பதிவுகளில் தொடர்ச்சியாகக் கொண்டாடி வந்தார். ஈரான் அதிஉயர் தலைவர் அயதுல்லா அலி கமேனி கொல்லப்பட்டதாக அறிவித்த பதிவிலிருந்து, ஈரானின் 100% ராணுவக் கட்டமைப்பு அழிக்கப்பட்டுவிட்டதாக மார்ச் மாதத்தில் வெளியிட்ட பதிவுகள் வரை, அவரது சமூக வலைத்தளப் பக்கம் ஒரு நேரலை உளவுத்துறை அறிக்கையைப் போலச் செயல்பட்டது. ஆரம்பத்தில் 4 முதல் 5 வாரங்களுக்குள் போர் முடிவுக்கு வந்துவிடும் எனக் கூறப்பட்டபோதிலும், நாட்கள் செல்லச் செல்ல டிரம்பின் தொனி தீவிரமான எச்சரிக்கைகளிலிருந்து வர்த்தகப் பேச்சுவார்த்தைகளாக மாறத் தொடங்கியது.
போரின் 6 மாத முடிவில், உலகப் பொருளாதாரத்தில் பெரும் தாக்கத்தை ஏற்படுத்தியுள்ள ‘ஹோர்முஸ் ஜலசந்தி’ (Strait of Hormuz) கடல்சார் வணிகப் பாதையே டிரம்பின் சமூக வலைத்தளப் பதிவுகளின் மையப் பொருளாக மாறியுள்ளது. ஈரான் மீது முழுமையான கடற்படை முற்றுகையை (Naval Blockade) அறிவித்த டிரம்ப், ஆகஸ்ட் மாதத்தில் ஈரானுக்கு எதிராக “வரலாற்றிலேயே இல்லாத மிகக் கடுமையான பொருளாதாரப் போர்” (Crushing Economic Operation) தொடுக்கப்பட்டுள்ளதாக அறிவித்தார். மேலும், ஈரானுக்கு நிதியுதவியோ அல்லது வர்த்தக உதவியோ அளிக்கும் எந்தவொரு நாட்டிற்கும் கடுமையான பொருளாதார விளைவுகள் ஏற்படும் எனத் தனது பதிவுகள் மூலம் பகிரங்க எச்சரிக்கை விடுத்தார்.
போர் இலக்குகள் தொடர்ந்து மாறிவருவதையும், ஜூன் மாத தற்காலிக ஒப்பந்தம் முறிந்ததையும் டிரம்ப் தனது தனித்துவமான பாணியிலேயே சமூக வலைத்தளங்களில் விவரித்து வருகிறார். தனது ஆட்சிக்கு எதிரான விமர்சனங்கள் எழும்போதெல்லாம், தான் போர்க்களத்தில் தளபதிகளுடன் நிற்பது போன்ற AI மூலம் உருவாக்கப்பட்ட படங்களைப் பகிர்ந்து கவனத்தைத் திருப்பி வருகிறார். 6 மாதங்களைக் கடந்தும் அமெரிக்க-ஈரான் மோதலுக்கு ஒரு தெளிவான முற்றுப்புள்ளி கிடைக்காத நிலையில், நவீன வரலாற்றில் ஒரு முழுமையான ராணுவ நடவடிக்கை அதிபரின் சொந்த சமூக வலைத்தளப் பக்கத்திலேயே நேரடியாக எழுதப்பட்டு வந்த சம்பவம் சர்வதேச வல்லுநர்களை வியப்பில் ஆழ்த்தியுள்ளது.
