தமிழகத்தில் உள்ள அனைத்து நீதிமன்றங்களின் அரசு வழக்கறிஞர்களுக்கான பதவிக்காலம் கடந்த ஜூன் 30-ஆம் தேதியுடன் முடிவடைந்த நிலையில், புதிய அரசு வழக்கறிஞர்களை (Government Advocates / Law Officers) நியமிப்பதில் தவெக (தமிழக வெற்றிக் கழகம்) அரசின் முக்கிய அமைச்சர்கள் மற்றும் நிர்வாகிகள் பல கோடி ரூபாய் லஞ்சம் வாங்கியதாக அடுத்தடுத்துப் புதிய பூதங்கள் கிளம்பியுள்ளன. பல்வேறு மாவட்டங்களுக்கு அரசு வழக்கறிஞர்களை நியமித்து அதிகாரப்பூர்வ அரசாணை (GO) வெளியிடப்பட்ட பிறகும், கூடுதல் பணத்திற்காக ஏற்கனவே நியமிக்கப்பட்டவர்களை மாற்றிவிட்டுப் புதியவர்களை நியமிக்கத் திரைமறைவில் பேரங்கள் நடப்பதாக எழுந்துள்ள குற்றச்சாட்டு கோட்டை வட்டாரங்களை அதிர வைத்துள்ளது.
தமிழகம் முழுவதும் அரசு வழக்கறிஞர்கள், கூடுதல் மற்றும் சிறப்பு அரசு வழக்கறிஞர்கள் நியமனத்தில் தகுதிக்கு முக்கியத்துவம் தராமல், ரூ.5 லட்சம் முதல் ரூ.30 லட்சம் வரை லஞ்சம் பெற்றுக் கொண்டு பதவிகள் விற்கப்படுவதாகத் திமுகவின் துணை அமைப்புச் செயலாளர் தாயகம் கவி லஞ்ச ஒழிப்புத் துறையில் (DVAC) அதிரடிப் புகார் ஒன்றை அளித்துள்ளார். அந்தப் புகாரில், தவெக-வின் முக்கிய அமைச்சர்களான புஸ்ஸி என். ஆனந்த் மற்றும் கே. நிர்மல் குமார் ஆகியோரின் பெயர்களைப் பயன்படுத்தி, அவர்களின் ‘வசூல் முகவர்களாக’ச் செயல்படும் லெனின் ஜெயபாலன் மற்றும் பார்த்திபன் போன்ற வழக்கறிஞர்கள் பல கோடி ரூபாய் சட்டவிரோதப் பணம் வசூலித்துள்ளதாகக் கடுமையான குற்றச்சாட்டுகள் முன்வைக்கப்பட்டுள்ளன. தர்மபுரியில் ரூ.3 லட்சம் முதல் ரூ.10 லட்சம் வரை தவெக மாவட்டச் செயலாளர்கள் வசூலித்ததாகவும், திருப்பத்தூரில் ஆடு திருட்டு வழக்கில் தொடர்புடைய ஒருவருக்கு அரசு வழக்கறிஞர் பதவி வழங்கப்பட்டுள்ளதாகவும் அதிர்ச்சித் தகவல்கள் வெளியாகியுள்ளன.
இந்த மாநிலம் தழுவிய ஊழல் சர்ச்சைக்கு நடுவே, தற்போது மயிலாடுதுறை மாவட்ட நீதிமன்றங்களுக்கான அரசு வழக்கறிஞர்கள் நியமனத்தில் மிகப் பெரிய முறைகேடு அரங்கேறி வருவதாகப் புதிய விவாதம் கிளம்பியுள்ளது. மயிலாடுதுறைக்கு ஏற்கனவே அரசாணை மூலம் நியமிக்கப்பட்ட சில நேர்மையான தவெக வழக்கறிஞர்களைத் தூக்கி எறிந்துவிட்டு, பண பலத்தைக் காட்டிப் புதியவர்களைப் புகுத்த தீவிர முயற்சி நடப்பதாகக் கூறப்படுகிறது. குறிப்பாக, கடந்த சட்டமன்றத் தேர்தல் வரை திமுக-விற்காகக் களத்தில் கடுமையாக வேலை பார்த்துவிட்டு, தவெக ஆட்சிக்கு வந்தவுடன் தங்களைக் கட்சியில் இணைத்துக் கொண்ட சிலர், கட்சித் தலைமைக்குக் கொடுக்க வேண்டிய ‘கவனிப்பைக்’ கச்சிதமாகக் கொடுத்துவிட்டு இந்த உயர் பதவிகளைத் தட்டிப்பறிக்கப் பின்விளைவுகள் அறியாமல் காய நகர்த்தி வருகின்றனர்.
ஏற்கனவே, தவெக-வின் விழுப்புரம் மாவட்ட வழக்கறிஞர் அணி இணைச் செயலாளரான ஞானசவுந்தரி, கட்சிக்காக உழைத்த தங்களுக்குப் பதவிகள் வழங்காமல், தகுதியற்றவர்களிடம் லட்சக்கணக்கில் பணம் வாங்கிக் கொண்டு பதவிகளை வாரி வழங்கியுள்ளனர் எனச் சென்னை உயர் நீதிமன்றத்தில் (Madras High Court) ரிட் மனு ஒன்றைத் தாக்கல் செய்து அதிர்வலைகளை ஏற்படுத்தியிருந்தார். தகுதி, நேர்மை மற்றும் தொழில்முறைத் திறனின் அடிப்படையில் மட்டுமே வழக்கறிஞர்கள் நியமிக்கப்படுகிறார்கள் என்று அரசு தரப்பில் மழுப்பலான விளக்கங்கள் அளிக்கப்பட்டாலும், தவெக அரசுக்கு அவப்பெயரை ஏற்படுத்தும் வகையில் சொந்தக் கட்சி நிர்வாகிகளே இந்த மெகா நியமன ஊழலில் ஈடுபட்டிருப்பது முதலமைச்சர் சி. ஜோசப் விஜய்க்குப் பெரும் தலைவலியைக் கொடுத்துள்ளது.
