பிரிட்டனின் முன்னணி அரசியல் தலைவரும், ‘ரிஃபார்ம் யூகே’ (Reform UK) கட்சியின் தலைவருமான நைஜல் ஃபரேஜுக்கு (Nigel Farage), சமூக வலைதளமான டிக்டாக்கில் துப்பாக்கியால் சுடுவது போல் சைகை செய்து பகிரங்கமாகக் கொலை மிரட்டல் விடுத்த ஆப்கானிஸ்தான் நாட்டைச் சேர்ந்த அகதி ஒருவருக்கு லண்டன் சௌத்வார்க் கிரவுன் நீதிமன்றம் (Southwark Crown Court) 5 ஆண்டுகள் கடுமையான சிறைத்தண்டனை விதித்து அதிரடித் தீர்ப்பளித்துள்ளது. முகத்தில் ‘AK-47’ ரகத் துப்பாக்கியைப் பச்சைக் குத்தியுள்ள (Tattoo) அந்த நபர், சிறைக்குள் இருந்தபடியே வீடியோக்களைப் பதிவிட்டு வந்த நிலையில் இந்த இறுதித் தீர்ப்பு வெளியாகியுள்ளது.
‘மடாபசா’ (Madapasa) என்ற பெயரில் லட்சக்கணக்கான பின்தொடர்பாளர்களைக் கொண்டு டிக்டாக்கில் புகழ்பெற்றிருந்த 26 வயதான பயாஸ் கான் (Fayaz Khan) என்ற ஆப்கான் வாலிபர், கடந்த 2024 அக்டோபரில் பிரான்சில் இருந்து சிறிய படகு மூலம் சட்டவிரோதமாகப் பிரிட்டனுக்குள் நுழைய முயன்றார். அப்போது, அவரது சட்டவிரோதப் பயணத்தைக் குறிப்பிட்டு நைஜல் ஃபரேஜ் யூடியூபில் விழிப்புணர்வு வீடியோ ஒன்றை வெளியிட்டார். இதற்குப் பதிலடி கொடுக்கும் வகையில் டிக்டாக்கில் வீடியோ வெளியிட்ட பயாஸ் கான், ஃபரேஜை எச்சரிக்கும் தொனியில் பேசி, தனது முகத்தில் இருந்த ஏகே-47 டாட்டூவைச் சுட்டிக்காட்டி, கைகளால் துப்பாக்கி போல் சைகை செய்து “பாப், பாப், பாப்” (Pop, Pop, Pop) என்று சுடுவது போல் மிரட்டல் விடுத்தார்.
இந்த விவகாரம் பிரிட்டனில் பெரும் அரசியல் அதிர்வலைகளை ஏற்படுத்தியதைத் தொடர்ந்து, பிரிட்டன் எல்லைக்குள் நுழைந்த அடுத்த சில நாட்களில் பயாஸ் கானைப் போலீசார் அதிரடியாகக் கைது செய்தனர். நீதிமன்ற விசாரணையின் போது நேரில் ஆஜராகி சாட்சியமளித்த நைஜல் ஃபரேஜ், “அந்த வீடியோ என்னை உறைந்து போகச் செய்தது; அவர் கையில் துப்பாக்கிகளுடன் இருக்கும் பிற வீடியோக்களைப் பார்த்த போது எனது உயிருக்கு அவர் உண்மையாகவே ஆபத்து விளைவிப்பார் என நான் பயந்தேன்” என்று வாக்குமூலம் அளித்தார். ஆனால், குற்றவாளி தரப்போ அது தனது வழக்கமான டிக்டாக் நடிப்புத் திறன் (Character acting) என்றும், நிஜமாகக் கொலை செய்யும் நோக்கம் இல்லை என்றும் வாதிட்டதை ஜூரி மார்கள் ஏற்க மறுத்துவிட்டனர்.
வழக்கின் இறுதித் தீர்ப்பை வழங்கிய நீதிபதி காரென் ஸ்டெய்ன் (Judge Karen Steyn), தேர்ந்தெடுக்கப்பட்ட மக்கள் பிரதிநிதிகளுக்கு எதிராகச் சமூக வலைதளங்கள் மூலம் இத்தகைய வன்முறையான அச்சுறுத்தல்களைப் பரப்புவதை ஒருபோதும் அனுமதிக்க முடியாது என்று கூறி 5 ஆண்டுகள் சிறைத் தண்டனையை உறுதி செய்தார். மேலும், பயாஸ் கான் ஏற்கனவே சுவீடன் நாட்டில் பல்வேறு குற்ற வழக்குகளில் தொடர்புடையவர் என்பதும், தனது அடையாளத்தை மறைக்கப் போலிப் பெயர்களைப் பயன்படுத்தியுள்ளார் என்பதும் விசாரணையில் அம்பலமானது. தண்டனைக் காலம் முடிந்தவுடன் அவரை உடனடியாக ஆப்கானிஸ்தானுக்கே நாடு கடத்த (Deport) பிரிட்டன் உள்துறை அமைச்சகம் தீவிர நடவடிக்கைகளை மேற்கொண்டு வருகிறது.
