அமெரிக்க அதிபர் டொனால்ட் டிரம்ப் வெளியிட்டுள்ள 927 பக்கங்கள் கொண்ட அதிகாரப்பூர்வ சொத்து பிரகடன அறிக்கை (Financial Disclosure), உலக அளவில் பெரும் விவாதத்தை ஏற்படுத்தியுள்ளது. கடந்த ஆண்டில் மட்டும் டிரம்ப் மற்றும் அவரது குடும்பத்தினர் பல்வேறு தொழில்கள் மற்றும் கிரிப்டோகரன்சி முதலீடுகள் மூலம் சுமார் 2 பில்லியன் டாலர்களுக்கும் மேல் வருவாய் ஈட்டியுள்ளது இந்த அறிக்கையின் மூலம் அம்பலமாகியுள்ளது. பல தசாப்தங்களாக டிரம்பின் அடையாளமாக இருந்த ரியல் எஸ்டேட் மற்றும் சொகுசு ஹோட்டல் வணிகங்களை விட, தற்போது டிஜிட்டல் மற்றும் பிராண்டிங் வர்த்தகம் அவருக்கு அசுர வேகத்தில் லாபத்தை வாரிக் குவித்துள்ளது குறிப்பிடத்தக்கது.
இவ்வர்த்தகப் பேரரசின் மையப்புள்ளியாக உருவெடுத்துள்ளது டிரம்ப் குடும்பத்தின் கிரிப்டோகரன்சி (Cryptocurrency) முதலீடுகள் ஆகும். டிரம்ப் குடும்பத்தால் தொடங்கப்பட்ட ‘வேர்ல்ட் லிபர்ட்டி ஃபைனான்சியல்’ (World Liberty Financial) தளம் மூலம் கவர்னன்ஸ் டோக்கன்களை விற்பனை செய்து 500 மில்லியன் டாலருக்கும் அதிகமாகவும், டிரம்பின் முகம் பதிக்கப்பட்ட நினைவு ‘மீம் காயின்கள்’ (Meme Coins) விற்பனை உரிமம் மூலம் சுமார் 600 மில்லியன் டாலருக்கும் அதிகமாகவும் வருவாய் கிடைத்துள்ளது. அமெரிக்காவை உலகின் கிரிப்டோ தலைநகரமாக மாற்றுவேன் என்ற டிரம்பின் கொள்கை முடிவுகளுக்கு மத்தியில், இந்த கிரிப்டோ வணிகங்கள் மூலம் மட்டுமே கடந்த ஆண்டில் அவர் சுமார் 1.2 பில்லியன் டாலர்களை அள்ளியுள்ளார்.
கிரிப்டோ தவிர, தனது சொந்த சமூக ஊடக தளமான ‘ட்ரூத் சோஷியல்’ (Truth Social) மூலமும் டிரம்ப் புதுமையான வணிக உத்திகளைக் கையாண்டு வருகிறார். அண்மையில் ட்ரூத் சோஷியல் தளத்தில் டிரம்ப் பதிவிடும் செய்திகளை, சாதாரண பயனர்களுக்கு முன்பாகவே சில நொடிகள் முன்கூட்டியே அணுகும் பிரத்யேக ‘Truth API’ வசதியை பெரும் வங்கிகளுக்கும் ஹெட்ஜ் ஃபண்டுகளுக்கும் (Hedge Funds) விற்கத் தொடங்கியுள்ளனர். மேலும், டிரம்ப் பிராண்ட் செய்யப்பட்ட பைபிள்கள் (Bibles), தங்கக் கடிகாரங்கள் மற்றும் காலணிகள் (Sneakers) போன்ற சில்லறை வர்த்தகப் பொருட்கள் மூலமும் பல மில்லியன் டாலர்கள் வருவாய் கிடைத்துள்ளதாக அந்த அறிக்கை விவரிக்கிறது. கடிகாரங்கள் விற்பனையில் மட்டும் 4.7 மில்லியன் டாலர் வருவாய் கிடைத்துள்ளது.
அதிபர் பதவியில் இருந்துகொண்டே இத்தகைய பிரம்மாண்ட வணிக சாம்ராஜ்யத்தை டிரம்ப் நடத்துவது, அமெரிக்க அரசியலில் பெரும் ‘பரஸ்பர நலன் முரண்’ (Conflict of Interest) மற்றும் விமர்சனங்களை எழுப்பியுள்ளது. அதிபரின் கொள்கை முடிவுகள் அவரது சொந்த கிரிப்டோ மற்றும் வணிக லாபங்களுக்கு சாதகமாக மாற்றப்படுவதாக எதிர்க்கட்சிகள் குற்றம் சாட்டுகின்றன. எனினும், இந்த வணிகங்கள் அனைத்தும் அவரது மகன்களால் நிர்வகிக்கப்படும் ஒரு தனி அறக்கட்டளையின் கீழ் இயங்குவதாகவும், இதில் எந்தவொரு சட்டவிரோதச் செயலும் இல்லை என்றும் வெள்ளை மாளிகை மற்றும் டிரம்ப் தரப்பு இந்த விமர்சனங்களை முற்றிலுமாக மறுத்துள்ளது.
