பிரிட்டனில் ஈரான் நாட்டின் உளவு அமைப்பிற்குச் (Iran’s Intelligence Service) சட்டவிரோதமாக உதவிகள் செய்ததாக 39 வயது மதிக்கத்தக்க நபர் ஒருவரை அந்நாட்டின் பயங்கரவாத தடுப்புப் பிரிவு (Counter Terrorism Policing) போலீசார் அதிரடியாகக் கைது செய்து வழக்குப் பதிவு செய்துள்ளனர். ஈரான் மற்றும் மேற்கத்திய நாடுகளுக்கு இடையே நிலவி வரும் தீவிரமான போர்ப் பதற்றங்களுக்கு மத்தியில், பிரிட்டன் மண்ணில் ஈரான் உளவுத்துறை ஊடுருவியுள்ளதாக வெளிவந்துள்ள இந்தச் செய்தி சர்வதேச பாதுகாப்பு வட்டாரங்களில் பெரும் பரபரப்பை ஏற்படுத்தியுள்ளது.
கைது செய்யப்பட்ட நபர் லிவர்பூல் (Liverpool) நகரைச் சேர்ந்த ‘வாகித் அபேரி’ (Vahid Aberi) என லண்டன் மாநகரக் காவல் துறை (Metropolitan Police) அதிகாரப்பூர்வமாக அடையாளம் காட்டியுள்ளது. பர்மிங்காம் (Birmingham) பகுதியில் வைத்து கடந்த புதன்கிழமை அன்று உளவுத்துறை அதிகாரிகளால் ரகசியமாகப் பிடிக்கப்பட்ட இவரிடம், மேற்கு மிட்லாண்ட்ஸ் காவல் நிலையத்தில் வைத்துத் தீவிர விசாரணை நடத்தப்பட்டது. அதன் தொடர்ச்சியாக, பிரிட்டனின் அதிமுக்கிய ‘2023 தேசிய பாதுகாப்புச் சட்டத்தின்’ (National Security Act 2023) பிரிவு 3-இன் கீழ், வெளிநாட்டு உளவு அமைப்பிற்கு உளவு வேலைகள் மற்றும் உதவிகள் செய்ததாக அவர் மீது லண்டன் கிரவுன் பிராசிகியூஷன் சர்வீஸ் ஒப்புதலுடன் முறைப்படி குற்றச்சாட்டுகள் பதிவு செய்யப்பட்டுள்ளன.
இந்த அதிரடி நடவடிக்கை குறித்து லண்டன் பயங்கரவாத தடுப்புப் பிரிவின் தலைவர் கமாண்டர் ஹெலன் பிளனகன் (Helen Flanagan) செய்தியாளர்களிடம் பேசுகையில், “சமீபத்திய ஆண்டுகளில் பிரிட்டனின் தேசிய பாதுகாப்பிற்கு அச்சுறுத்தலாக விளங்கும் வெளிநாட்டு உளவு வேலைகள் மற்றும் வழக்குகளின் வேகம் மிகக் கடுமையாக அதிகரித்துள்ளது. வெளிநாட்டு உளவு அமைப்புகளுடன் தொடர்புடைய இத்தகைய சந்தேகத்திற்கிடமான சட்டவிரோதச் செயல்பாடுகளை முறியடிக்கவே இந்த அதிரடித் தலையீட்டை மேற்கொண்டுள்ளோம்” என்று தெரிவித்துள்ளார். எனினும், தற்போதைக்கு லண்டன் நீதிமன்றத்தில் குற்றவியல் நடவடிக்கைகள் தொடங்கிவிட்டதால், அவர் என்ன மாதிரியான ரகசியத் தகவல்களைத் திருடினார் என்பது குறித்த முழுமையான விபரங்களை வெளியிடப் போலீசார் மறுத்துவிட்டனர்.
இங்கிலாந்தில் ஈரானிய அரசுக்கு ஆதரவான இஸ்லாமிய புரட்சிகர காவல்படை (IRGC) போன்ற அமைப்புகளின் செயல்பாடுகளைத் தடை செய்யப் பிரிட்டன் நாடாளுமன்றம் புதிய சட்டங்களைக் கொண்டு வந்துள்ள அதே வாரத்தில் இந்த உளவு விவகாரம் அம்பலமாகியுள்ளது. தற்போதைக்கு வாகித் அபேரியின் கைது காரணமாகப் பொதுமக்கள் அல்லது குறிப்பிட்ட தனிநபர்கள் யாருக்கும் நேரடி ஆபத்து எதுவும் இல்லை என்று போலீசார் உறுதியளித்துள்ளனர். பர்மிங்காம் மற்றும் லிவர்பூல் ஆகிய நகரங்களில் உள்ள அவரது ரகசியத் தங்குமிடங்களில் நடத்தப்பட்ட சோதனைகளில் பறிமுதல் செய்யப்பட்ட டிஜிட்டல் ஆவணங்களின் அடிப்படையில், அவர் இன்று லண்டன் வெஸ்ட்மின்ஸ்டர் நீதிமன்றத்தில் (Westminster Magistrates’ Court) ஆஜர்படுத்தப்பட்டுச் சிறையில் அடைக்கப்பட்டுள்ளார்.
