தமிழகத்தில் தமிழக வெற்றிக் கழகம் (தவேக) ஆட்சியமைத்து அக்கட்சியின் தலைவர் சி. ஜோசப் விஜய் முதலமைச்சராகப் பொறுப்பேற்றுள்ள சூழலில், மாநிலத்தில் சட்டம் ஒழுங்கு மற்றும் பெண் குழந்தைகளின் பாதுகாப்பு மிகவும் மோசமடைந்துள்ளதாக அம்மா மக்கள் முன்னேற்றக் கழகத்தின் (அமமுக) பொதுச்செயலாளர் டிடிவி தினகரன் கடுமையாகக் குற்றம்சாட்டியுள்ளார். விழுப்புரம் மாவட்டம் மரக்காணம் அருகே உள்ள வண்டிப்பாளையம் பகுதியில் 11 வயது சிறுமி பாலியல் வன்கொடுமைக்கு உள்ளாக்கப்பட்ட சம்பவம் தொடர்பாக அவர் தனது கண்டனத்தை எக்ஸ் (X) தளத்தில் பதிவு செய்துள்ளார்.
அவரது அந்தப் பதிவில், கோயம்புத்தூர் மாவட்டம் சூலூர் அருகே 10 வயது சிறுமி கடத்தப்பட்டு, பாலியல் வன்கொடுமைக்கு உள்ளாக்கப்பட்டு கொடூரமாகக் கொலை செய்யப்பட்ட சம்பவம் ஏற்படுத்திய அதிர்வலைகள் அடங்குவதற்குள், தற்போது மரக்காணத்தில் மீண்டும் ஒரு சிறுமிக்கு இழைக்கப்பட்டிருக்கும் இந்த கொடூரம் தமிழகத்தில் ஒட்டுமொத்த பெண் குழந்தைகளின் பாதுகாப்பையும் மிகப்பெரிய கேள்விக்குறியாக்கியுள்ளது என்று டிடிவி தினகரன் மிகவும் கவலை தெரிவித்துள்ளார்.
முன்னதாக அண்ணா பல்கலைக்கழக மாணவி ஒருவர் பாலியல் வன்கொடுமைக்கு உள்ளாக்கப்பட்ட நிகழ்வைக் கண்டு அன்று கொதித்தெழுந்த விஜய், தமிழ்நாட்டில் உள்ள அனைத்து தங்கைகளுக்கும் நான் அண்ணனாகவும், அரணாகவும் இருந்து பாதுகாப்பேன் என்று உணர்ச்சிவசப்பட்டு கடிதம் எழுதியதை தினகரன் சுட்டிக்காட்டியுள்ளார். அன்று அப்படி வீரவசனம் பேசிய ஜோசப் விஜய், இன்று முதலமைச்சராகப் பொறுப்பேற்ற பின்பு நாள்தோறும் அரங்கேறும் பெண்களுக்கு எதிரான இத்தகைய குற்றச்சம்பவங்களைக் கண்டும் காணாமல் வாய்மூடி மௌனம் காப்பது ஏன் என்றும் அவர் கேள்வி எழுப்பியுள்ளார்.
விழுப்புரம் மரக்காணத்தில் சிறுமியை வன்கொடுமை செய்த வழக்கில் கைதாகியுள்ள குற்றவாளிக்கு நீதிமன்றத்தின் மூலம் கடுமையான உச்சபட்ச தண்டனையைப் பெற்றுத் தர அரசு உடனடியாக நடவடிக்கை எடுக்க வேண்டும் என்று தினகரன் வலியுறுத்தியுள்ளார். மேலும், முதலமைச்சர் விஜய் தனது புதிய தவேக ஆட்சியைப் பாதுகாப்பதில் செலுத்தும் கவனத்தை விட, தமிழ்நாட்டில் வாழும் அப்பாவி குழந்தைகள் மற்றும் பெண்களின் பாதுகாப்பில் கூடுதல் கவனம் செலுத்த வேண்டும் என்றும் அவர் தனது அறிக்கையின் வாயிலாகக் கேட்டுக்கொண்டுள்ளார்.
