தமிழ்நாடு முதலமைச்சர் விஜய் தலைமையில் தமிழக வெற்றிக் கழக எம்எல்ஏக்கள் பங்கேற்கும் ஆலோசனைக் கூட்டம் பலத்த பாதுகாப்புடன் நடைபெறுகிறது.
தமிழக வெற்றிக் கழகத்தின் தலைவரும் தமிழ்நாடு முதலமைச்சருமான சி. ஜோசப் விஜய் தலைமையில், தவெக சட்டமன்ற உறுப்பினர்கள் (MLAக்கள்) பங்கேற்கும் அவசர ஆலோசனைக் கூட்டம் சென்னையை அடுத்த மாமல்லபுரத்தில் உள்ள தனியார் விடுதியில் நடைபெறுகிறது. தவெக ஆட்சி அமைந்து 6 மாதங்கள் நிறைவடைந்துள்ள சூழலிலும், சமீபகாலமாகச் சில சட்டமன்ற உறுப்பினர்கள் மீது எழுந்துள்ள சர்ச்சைகள் தொடர்பாகவும் ஆலோசிக்க இக்கூட்டம் கூட்டப்பட்டுள்ளது.
கூட்டம் நடைபெறும் தனியார் விடுதியைச் சுற்றி பலத்த காவல் துறை பாதுகாப்பு போடப்பட்டுள்ளதோடு, வெளிப்புறப் பார்வையை மறைக்கும் வகையில் விடுதி சுவர்களின் எல்லைப் பகுதிகளில் தகரச் சீட்டுகள் அமைக்கப்பட்டுப் பாதுகாப்பு பலப்படுத்தப்பட்டுள்ளது. மேலும், கூட்டத்திற்கு வரும் தவெக சட்டமன்ற உறுப்பினர்கள் மற்றும் கட்சியின் மூத்த நிர்வாகிகள் தவிர வேறு எந்த வெளிநபர்களும் அல்லது செய்தியாளர்களும் வளாகத்திற்குள் செல்ல அனுமதி மறுக்கப்பட்டுள்ளது. பொதுமக்களுக்கு இடையூறு ஏற்படாத வகையிலும் பாதுகாப்பு ரகசியம் காக்கப்படும் வகையிலும் இந்த ஏற்பாடுகள் செய்யப்பட்டுள்ளதாகத் தெரிவிக்கப்பட்டுள்ளது.
கட்சியின் சட்டமன்ற உறுப்பினர்களின் பொது நடத்தை, ஒழுக்கம் மற்றும் தொகுதிப் பணிகள் குறித்து இக்கூட்டத்தில் முதலமைச்சர் விஜய் கடுமையான அறிவுறுத்தல்களை வழங்குவார் என எதிர்பார்ப்பு எழுந்துள்ளது. மக்கள் பிரதிநிதிகள் கண்ணியத்துடன் செயல்பட வேண்டும் என்றும், அரசுக்கு அவப்பெயர் ஏற்படுத்தும் வகையில் செயல்படுபவர்கள் மீது ஒழுங்கு நடவடிக்கை எடுக்கப்படும் என்றும் இக்கூட்டத்தில் எச்சரிக்கப்பட வாய்ப்புள்ளதாகக் கூறப்படுகிறது.
தவெக சட்டமன்ற உறுப்பினர்கள் மூன்று நாட்கள் இந்த விடுதியில் தங்கி ஆலோசனைகளை மேற்கொள்ள உள்ள நிலையில், கூட்டத்தின் முடிவுகள் குறித்து கட்சியின் அதிகாரப்பூர்வ அறிக்கைகள் பின்னர் வெளியாகும் என எதிர்பார்க்கப்படுகிறது.
