தமிழகத்தில் புதிதாகப் பொறுப்பேற்றுள்ள தமிழக வெற்றிக் கழக (தவேக) ஆட்சியில், கடந்த 15 நாட்களில் மட்டும் சட்டம் ஒழுங்கு சீர்குலைந்து பெண்களுக்கு எதிரான குற்றங்கள் பல மடங்கு அதிகரித்துள்ளதாக எதிர்க்கட்சித் தலைவரும், திமுக முதன்மைச் செயலாளருமான உதயநிதி ஸ்டாலின் மிகக் கடுமையான குற்றச்சாட்டுகளை முன்வைத்துள்ளார். முதலமைச்சர் சி. ஜோசப் விஜய் தலைமையிலான புதிய அரசு, தேர்தல் வாக்குறுதிகளை நிறைவேற்றாமல் விளம்பர அரசியலில் மட்டுமே கவனம் செலுத்தி வருவதாக அவர் சாடியுள்ளார்.
சென்னையில் நடைபெற்ற செய்தியாளர்கள் சந்திப்பில் பேசிய உதயநிதி ஸ்டாலின், தவேக அரசு பதவியேற்ற இந்த மிகக் குறுகிய காலத்திற்குள் தமிழ்நாட்டில் பெண்களுக்கு எதிராக 25 கடுமையான பாலியல் வன்கொடுமை வழக்குகள், 4 கொடூரக் கொலைச் சம்பவங்கள் மற்றும் 19 கடத்தல் குற்றங்கள் என மொத்தம் 48 பெரிய குற்றச்சம்பவங்கள் அரங்கேறியுள்ளதாகப் புள்ளிவிவரங்களை அடுக்கினார். சட்டம் ஒழுங்கைப் பராமரிக்க வேண்டிய காவல்துறை, புதிய ஆட்சியில் முழுமையாக முடக்கப்பட்டுள்ளதையே இந்த எண்கள் காட்டுகின்றன என்றும் அவர் வேதனை தெரிவித்தார்.
முன்னதாக முதலமைச்சராகப் பதவியேற்ற முதல் நாளில், தமிழ்நாட்டில் பெண் குழந்தைகளுக்கு எதிரான குற்றங்களைத் தடுக்க ‘சிங்கப்பெண் சிறப்பு அதிரடிப்படை’ (Singappen Special Task Force) என்ற புதிய போலீஸ் பிரிவு உருவாக்கப்படும் என முதலமைச்சர் விஜய் அதிரடியாக அறிவித்ததை உதயநிதி சுட்டிக்காட்டினார் . “முதல் நாளில் வெறும் கையெழுத்தோடு சரி, கடந்த 15 நாட்களாக இந்த சிங்கப்பெண் அதிரடிப்படை எங்கே போனது? அது காற்றில் மறைந்துவிட்டதா?” என்று கேள்வி எழுப்பிய அவர், கோவையிலும் மரக்காணத்திலும் அடுத்தடுத்து சிறுமிகள் வன்கொடுமைக்கு உள்ளாக்கப்பட்ட போது இந்த சிறப்புப் படை என்ன செய்துகொண்டிருந்தது என்றும் ஆக்ரோஷமாக வினவினார்.
தமிழகத்தில் பெண்களுக்கும் குழந்தைகளுக்கும் தவேக ஆட்சியில் பாதுகாப்பற்ற ஒரு பயமுறுத்தும் சூழல் நிலவி வருவதாகக் குறிப்பிட்ட உதயநிதி ஸ்டாலின், எதிர்க்கட்சியாகத் தங்களின் கடமையைச் செய்ய திமுக என்றும் தயங்காது என எச்சரித்தார். முதலமைச்சர் விஜய் உடனடியாகச் சினிமா பாணி வீரவசனங்களை விடுத்து, மாநிலத்தில் நிலவும் இந்த அசாதாரண சட்டம் ஒழுங்கு சீர்குலைவைத் தடுக்கவும், பெண்களுக்கு எதிரான குற்றவாளிகள் மீது இரும்புக்கரம் கொண்டு கடுமையான நடவடிக்கை எடுக்கவும் முன்வர வேண்டும் என்று அவர் தனது பேட்டியில் வலியுறுத்தியுள்ளார்.
