பிரிட்டனில் (UK) நிலவும் ஓட்டுநர் தேர்வு (Driving Test) தாமதம் மற்றும் மிகப்பெரிய காத்திருப்பு பட்டியல் காரணமாக அந்நாட்டின் இளைஞர்கள் பெருமளவில் வேலை வாய்ப்புகளை இழப்பதாக சென்டர் ஃபார் சோஷியல் ஜஸ்டிஸ் (Centre for Social Justice – CSJ) வெளியிட்ட புதிய ஆய்வறிக்கையில் சுட்டிக்காட்டப்பட்டுள்ளது. டிரைவர் அண்ட் வெஹிக்கிள் ஸ்டாண்டர்ட்ஸ் ஏஜென்சியின் (DVSA) கடுமையான தேக்கநிலை காரணமாக, 17 முதல் 20 வயது வரையிலான இளைஞர்களில் வெறும் 29 சதவீதத்தினர் மட்டுமே தற்போது முழு ஓட்டுநர் உரிமம் வைத்துள்ளதாகவும், இது கடந்த பல தசாப்தங்களில் இல்லாத மிகக் குறைந்த அளவாகும் என்றும் அந்த அறிக்கை எச்சரித்துள்ளது.
பிரிட்டனில் தற்சமயம் ஓட்டுநர் தேர்வுக்கான நடைமுறை இடைவெளி சராசரியாக 21 முதல் 22 வாரங்கள் வரை நீடிக்கிறது. கொவிட் பெருந்தொற்றுக்கு முன்பாக வெறும் 5 வாரங்களாக இருந்த இந்த காத்திருப்பு காலம், தற்போது சுமார் 5 முதல் 6 மாதங்களாக உயர்ந்துள்ளது. பல தேர்வு மையங்களில் 70 சதவீதத்திற்கும் அதிகமான ஸ்லாட்டுகள் முழுமையாக முன்பதிவு செய்யப்பட்டுவிட்டதால், இளைஞர்கள் தங்களுக்கான தேர்வுத் தேதியை எளிதில் பெற முடியாமல் திணறி வருகின்றனர்.
நாட்டில் வெளியாகும் மொத்த வேலைவாய்ப்பு அறிவிப்புகளில் 17 சதவீதத்திற்கும் அதிகமான பணிகளுக்கு கட்டாயம் ஓட்டுநர் உரிமம் தேவைப்படுவதாக தரவுகள் கூறுகின்றன. குறிப்பாக, சமூகப் பராமரிப்புப் பணிகளில் 34 சதவீத வேலைகளுக்கும், பிளம்பிங் போன்ற தொழில்களில் 68 சதவீத பணிகளுக்கும் ஓட்டுநர் உரிமம் இன்றியமையாத நிபந்தனையாக உள்ளது. இத்தகைய சூழலில், வேலை வாய்ப்பு கிடைத்தாலும் ஓட்டுநர் உரிமம் பெற 6 மாத காலம் காத்திருக்க வேண்டியுள்ளதால் பல இளைஞர்கள் வேலை வாய்ப்புகளையும் பயிற்சி திட்டங்களையும் (Apprenticeships) கைவிடும் நிலைக்குத் தள்ளப்பட்டுள்ளனர்.
இந்த விவகாரத்தில் தீர்வு காண்பதற்காகக் கல்லூரிகள் மற்றும் பெரிய நிறுவனங்களே தங்களின் ஊழியர்களுக்கு ஓட்டுநர் தேர்வு நடத்தும் வகையிலான சிறப்புத் திட்டங்களை அரசு அறிமுகப்படுத்த வேண்டும் என ஆய்வாளர்கள் பரிந்துரைத்துள்ளனர். லேபர் கட்சி தலைமையிலான அரசு தேர்வாளர்களின் எண்ணிக்கையை அதிகரித்து வருவதாகக் குறிப்பிட்ட போதிலும், இத்தகைய கடுமையான தாமதங்கள் இளைஞர்களின் பொருளாதார சுதந்திரத்தையும் நாட்டின் வேலைவாய்ப்பு அமைப்பையும் சீர்குலைப்பதாக தொழிற்சங்கங்கள் மற்றும் சமூக ஆர்வலர்கள் கவலை தெரிவித்துள்ளனர்
