பிரிட்டன் சிறைகளில் நிலவும் கடுமையான இடநெருக்கடி மற்றும் கூட்ட நெரிசலைக் கட்டுப்படுத்துவதற்காக, சுமார் 5,000 கைதிகளைக் குறிப்பிட்ட காலத்திற்கு முன்பாகவே விடுவிக்க லேபர் கட்சி தலைமையிலான அரசு திட்டமிட்டுள்ளது. இந்த முடிவுக்குப் பிரிட்டனின் நன்னடத்தை அதிகாரிகள் (Probation Officers) மற்றும் அவர்களின் பிரதான தொழிற்சங்கமான நாப்போ (Napo) கடும் கண்டனத்தையும் எதிர்ப்பையும் பதிவு செய்துள்ளதுடன், திட்டத்திற்கு எதிராக அதிரடியாகப் பணிகளைப் புறக்கணித்து வேலைநிறுத்தத்தில் ஈடுபடப் போவதாகவும் எச்சரித்துள்ளனர்.
அரசின் இத்திட்டத்தின்படி, விடுவிக்கப்படும் ஆயிரக்கணக்கான குற்றவாளிகளைச் சமூகத்தில் தகுந்த முறையில் கண்காணிக்கும் பொறுப்பு நன்னடத்தை அதிகாரிகளையேச் சேரும். இருப்பினும், ஏற்கெனவே ஆட்கள் பற்றாக்குறை மற்றும் கூடுதல் பணிச்சுமையால் திணறி வரும் நன்னடத்தை கண்காணிப்புத் துறையில், ஒரே நேரத்தில் இவ்வளவு பெரிய எண்ணிக்கையிலான கைதிகளைக் கண்காணிப்பது என்பது சாத்தியமற்ற ஒன்று என்றும், இது பொதுமக்களின் பாதுகாப்பிற்கு மிகப் பெரிய அச்சுறுத்தலாக முடியும் என்றும் நாப்போ அமைப்பின் தேசியத் தலைவர் பென் காக்பர்ன் (Ben Cockburn) எச்சரித்துள்ளார்.
நாப்போ சங்கத்தின் சார்பில் நடத்தப்பட்ட வாக்கெடுப்பில், சுமார் 90 சதவீதத்திற்கும் அதிகமான அதிகாரிகள் அரசாங்கத்தின் இந்த முடிவுக்கு எதிராகவும், வேலைநிறுத்தப் போராட்டத்திற்கு ஆதரவாகவும் வாக்களித்துள்ளனர். குற்றவியல் நீதிக்கட்டமைப்பில் ஏற்படும் தொடர் தோல்விகளின் சுமையை நன்னடத்தை துறை மீது மட்டும் திணிப்பது ஏற்றுக்கொள்ள முடியாதது என்றும், உரிய ஆட்களையும் உட்கட்டமைப்பையும் மேம்படுத்தாமல் அவசர அவசரமாகக் கைதிகளை விடுவிப்பது பேரபாயத்தை உருவாக்கும் என்றும் அதிகாரிகள் ஆதங்கம் தெரிவித்துள்ளனர்.
தொழிற்சங்கங்களின் இந்த வேலைநிறுத்த எச்சரிக்கை குறித்து ஏமாற்றம் தெரிவித்துள்ள பிரிட்டன் நீதித்துறை அமைச்சகம் (Ministry of Justice), நன்னடத்தை துறையை மேம்படுத்தவும் கூடுதல் ஊழியர்களை நியமிக்கவும் நிதி ஒதுக்கி வருவதாக விளக்கம் அளித்துள்ளது. இருப்பினும், அதிகாரிகளின் இந்த அதிரடி வேலைநிறுத்த அறிவிப்பால் அக்டோபர் மாதம் செயல்படுத்தத் திட்டமிடப்பட்டிருந்த கைதிகள் விடுவிப்புத் திட்டம் பெரும் சிக்கலையும் சவாலையும் சந்தித்துள்ளது
