அமெரிக்க உள்நாட்டுப் பாதுகாப்புத் துறையில் (DHS) பணியாற்றும் சுமார் 41,000-க்கும் அதிகமான அதிகாரிகள் மற்றும் ஒப்பந்தப் பணியாளர்களின் தனிப்பட்ட தகவல்கள் இணையத்தில் பகிரங்கமாக வெளியிடப்பட்டுள்ளன. ‘டிபார்ட்மென்ட் ஆஃப் பீஸ்’ (Department of Peace) என்ற ஹேக்கர் குழுவால் கைப்பற்றப்பட்ட இந்தத் தரவுகள், ‘டிடிசெக்ரட்ஸ்’ (DDoSecrets) இணையதளத்தில் ‘ஐஸ்பிக்’ (Icepick) என்ற பெயரிலான தரவுத்தளத்தில் பதிவேற்றம் செய்யப்பட்டுள்ளன. இதில் குடிவரவு மற்றும் சுங்க அமலாக்கப் பிரிவு (ICE) மற்றும் எல்லைப் பாதுகாப்புப் படை (CBP) முகவர்களின் பெயர்கள், தொலைபேசி எண்கள், முகவரிகள் மற்றும் பணி நியமன விவரங்கள் அடங்கியுள்ளன.
அரசு நிறுவனங்களின் ரகசியத் தன்மையைக் கேள்விக்குள்ளாக்கும் நோக்கில் இந்தத் தகவல்களை வெளியிட்டுள்ளதாக ஹேக்கர்கள் தரப்பில் தெரிவிக்கப்பட்டுள்ளது. இரகசியமாக இயங்கும் ஐசிஇ (ICE) அதிகாரிகளின் தகவல்களும் இதில் கசிந்துள்ளதால், அவர்களின் பாதுகாப்பு குறித்துக் கவலைகள் எழுந்துள்ளன. இது குறித்துத் தகவல் வெளியிட்டுள்ள உள்நாட்டுப் பாதுகாப்புத் துறை செய்தித் தொடர்பாளர், சாத்தியமான தரவுக் கசிவு குறித்துத் துறை விழிப்புடன் இருப்பதாகவும், ஊழியர்களின் பாதுகாப்பை உறுதி செய்ய உடனடி நடவடிக்கைகள் எடுக்கப்பட்டு வருவதாகவும் தெரிவித்துள்ளார்.
சமீபத்திய வாரங்களில் அமெரிக்கக் கூட்டாட்சி அமைப்புகள் மீது நடத்தப்படும் மூன்றாவது பெரிய இணையத் தாக்குதலாக இது பார்க்கப்படுகிறது. ஏற்கனவே எஃப்பிஐ (FBI) மற்றும் கூட்டாட்சித் தேர்தல் ஆணையம் (FEC) ஆகிய அமைப்புகளும் இணையவழி அச்சுறுத்தல்களைச் சந்தித்த நிலைமை இங்கு நினைவுகூரத்தக்கது.
இந்தத் தரவுக் கசிவு சம்பவம் குறித்து அமெரிக்கப் பாதுகாப்பு அமைப்புகள் மற்றும் இணையவழிப் பாதுகாப்புத் துறையினர் தீவிர விசாரணை நடத்தி வருகின்றனர்.
கசிந்த தரவுகளால் ஏற்படும் பாதிப்புகளைத் தடுத்து, அதிகாரிகளுக்குத் தேவையான பாதுகாப்புகளை வழங்குவதற்கான பணிகளை அரசு முடுக்கிவிட்டுள்ளது.
