அமெரிக்காவின் டொனால்ட் டிரம்ப் நிர்வாகம், டாடா கன்சல்டன்சி சர்வீசஸ் (டிசிஎஸ்), இன்ஃபோசிஸ் உள்ளிட்ட 8 முக்கியத் தகவல் தொழில்நுட்ப நிறுவனங்களுக்கு நிரந்தரத் தொழிலாளர் சான்றிதழ் (PERM) வழங்குவதை இடைநிறுத்தியதாக அறிவித்தது. இதன் தொடர்ச்சியாக, அமெரிக்கக் கட்டுப்பாடுகளால் இந்தியப் பங்குச்சந்தை முற்றிலுமாகச் சரிந்து வீழ்ந்ததாகச் சமூக வலைதளத்தில் தவறான செய்தி பரவியது. இந்த போலிச் செய்தியை அமெரிக்கத் தொழிலாளர் துறையின் தலைமை ஆய்வாளர் அந்தோணி டெஸ்போசிட்டோ (Anthony D’Esposito) தனது எக்ஸ் பக்கத்தில் பகிர்ந்ததுடன், “Ruh Roh” எனக் கிண்டலாகப் பதிவிட்டிருந்தார்.
இருப்பினும், அமெரிக்க அரசு இந்தக் கட்டுப்பாடுகளை அறிவிப்பதற்குப் பல மணி நேரத்திற்கு முன்பே அன்றைய இந்தியப் பங்குச்சந்தை வர்த்தகம் முடிவடைந்துவிட்டது என்பதைத் தரவுகள் சுட்டிக்காட்டுகின்றன. மேலும், மறுநாளான வெள்ளிக்கிழமை (அக்டோபர் 9) மும்பைப் பங்குச்சந்தை குறியீட்டு எண் சென்செக்ஸ் 292 புள்ளிகளும், நிஃப்டி 84 புள்ளிகளும் உயர்ந்து வர்த்தகமாகின. உண்மை நிலவரத்தை அறியாமல் போலிச் செய்தியைப் பரப்பிய அமெரிக்க அதிகாரியின் செயலுக்கு இந்திய இணையவாசிகளும் சமூக வலைதளப் பயனர்களும் கடும் கண்டனம் தெரிவித்து வருகின்றனர்.
இந்தச் சம்பவத்தைத் தொடர்ந்து, சமூக வலைதளப் பக்கத்தில் பதிவிடப்படும் தவறான தகவல்களுக்குப் பயனர்கள் ‘கம்யூனிட்டி நோட்ஸ்’ (Community Notes) மூலம் உண்மை நிலவரத்தைச் சுட்டிக்காட்டி வருகின்றனர். அமெரிக்க அரசின் புதிய விசா கட்டுப்பாடுகள் குறித்த விவாதங்கள் தொடர்ந்து நடைபெற்று வரும் நிலையில், இந்தியத் தொழில்நுட்ப நிறுவனங்களின் பங்குகள் சந்தையில் சீராக இயங்கி வருகின்றன.
