இந்த விழாவில் மெலனியா ட்ரம்ப், புகழ்பெற்ற 'டோல்ஸ் அண்ட் கபானா' (Dolce and Gabbana) ஆடை அணிந்து மிக ஸ்டைலாகக் காட்சியளித்தார். அவருடன் அதிபர் டொனால்ட் ட்ரம்ப் மற்றும் டாக்டர் பில், பாப் பாடகி நிக்கி மினாஜ், பாதுகாப்புச் செயலாளர் பீட் ஹெக்செத் உள்ளிட்ட பல அரசியல் மற்றும் திரையுலக பிரபலங்கள் கலந்துகொண்டனர். சிவப்பு கம்பள வரவேற்பின் போது செய்தியாளர்களிடம் பேசிய டொனால்ட் ட்ரம்ப், "பழைய கால அகாடமி விருதுகள் விழா போல இது மிகுந்த வரவேற்பைப் பெற்றுள்ளது" என்று உற்சாகமாகக் குறிப்பிட்டார்.

இருப்பினும், இந்த நட்சத்திர விழாவில் ஒரு முக்கியப் பிரமுகரின் வரவு இல்லாதது பேசுபொருளானது. அமெரிக்க உள்நாட்டுப் பாதுகாப்புத் துறைச் செயலாளர் கிறிஸ்டி நோம் (Kristi Noem) இந்த விழாவில் கலந்துகொள்வதாக இருந்தது, ஆனால் அவர் வரவில்லை. கடந்த சனிக்கிழமை மினியாபோலிஸில் எல்லைப் பாதுகாப்புப் படையினரால் போராட்டக்காரர் ஒருவர் சுட்டுக் கொல்லப்பட்ட சம்பவத்தைத் தொடர்ந்து, கிறிஸ்டி நோம் பதவி விலக வேண்டும் என்ற அழுத்தம் அதிகரித்துள்ளது. இதன் காரணமாகவே அவர் இந்த விழாவைப் புறக்கணித்ததாகக் கூறப்படுகிறது.

அதே சமயம், குடியேற்றக் கட்டுப்பாட்டு நடவடிக்கைகளை முன்னெடுத்து வரும் டாம் ஹோமன் என்பவரை அதிபர் ட்ரம்ப் வெகுவாகப் பாராட்டினார். "அவர் ஒரு அற்புதமான நபர், குற்றவாளிகளை நாம் ஒழிக்க வேண்டும்" என்று ட்ரம்ப் இதன்போது குறிப்பிட்டார். மெலனியாவின் திரைப்படம் ஒருபுறம் கொண்டாடப்பட்டாலும், மறுபுறம் அமெரிக்காவின் உள்நாட்டுப் பாதுகாப்புத் துறைச் செயலாளர் மீதான சர்ச்சைகளும், மினசோட்டாவில் நடந்து வரும் குடியேற்ற விவகாரங்களும் ட்ரம்ப் நிர்வாகத்திற்குப் பெரும் சவாலாகவே உருவெடுத்துள்ளன.  

Twenty Days to History Melina