பழிவாங்க எச்.ஐ.வி ஊசி! அரக்க குணம் கொண்ட முன்னாள் 'சைக்கோ' காதலி.

பழிவாங்க எச்.ஐ.வி ஊசி! காதலனின் மனைவியைக் கொல்ல துடித்த 'சைக்கோ' காதலி: ஆந்திராவை உலுக்கிய பயங்கரம்!

ஆந்திர மாநிலம் கர்னூல் மாவட்டத்தில் அரங்கேறியுள்ள இந்தச் சம்பவம், சினிமா திரைகதையை விடக் கொடூரமானதாக அமைந்துள்ளது. வசுந்தரா (34) என்ற பெண், தனது முன்னாள் காதலர் வேறொரு பெண்ணைத் திருமணம் செய்துகொண்டதை ஆத்திரத்துடன் பார்த்துள்ளார். அந்தத் திருமண வாழ்க்கையைச் சீர்குலைக்க நினைத்த அவர், தனது வன்மத்தை மிகக் கொடூரமான முறையில் வெளிப்படுத்தியுள்ளார். பாதிக்கப்பட்ட பெண் ஒரு தனியார் மருத்துவக் கல்லூரியில் உதவிப் பேராசிரியராகப் பணியாற்றி வருபவர் என்பது குறிப்பிடத்தக்கது.

தனது திட்டத்தை நிறைவேற்ற வசுந்தரா ஒரு சாலை விபத்தை நாடகமாடியுள்ளார். கடந்த ஜனவரி 9ஆம் தேதி, அந்தப் பேராசிரியை பணி முடிந்து வீடு திரும்பும்போது, வசுந்தராவின் கூட்டாளிகள் இருசக்கர வாகனத்தில் மோதி விபத்தை ஏற்படுத்தினர். அந்தப் பதற்றமான சூழலில், உதவி செய்வது போல நடித்த கும்பல், அவரை ஒரு ஆட்டோவில் ஏற்றியுள்ளது. அங்குதான் வசுந்தரா தான் மறைத்து வைத்திருந்த அந்த எமபாசத்தைச் செலுத்தியுள்ளார். உயிரிழப்பை ஏற்படுத்தும் எச்.ஐ.வி வைரஸ் அடங்கிய ஊசியை அந்தப் பெண்ணின் உடலில் வலுக்கட்டாயமாக ஏற்றியுள்ளனர்.

இந்தக் குற்றத்திற்காக வசுந்தரா செய்த முன்னேற்பாடுகள் அதிரவைக்கின்றன. தான் ஏதோ ஒரு மருத்துவ ஆராய்ச்சி செய்யப்போவதாகக் கூறி, அரசு மருத்துவமனையில் எச்.ஐ.வி தொற்றால் பாதிக்கப்பட்ட நோயாளிகளிடம் இருந்து ரத்த மாதிரிகளைப் பெற்றுள்ளார். அந்த ரத்தத்தை வீட்டின் குளிர்சாதனப் பெட்டியில் (Fridge) ரகசியமாகச் சேமித்து வைத்துப் பராமரித்து வந்துள்ளார். சரியான தருணம் பார்த்து, அந்தத் தொற்றுள்ள ரத்தத்தை ஊசி மூலம் தனது காதலனின் மனைவியின் உடலில் செலுத்தி அவரது வாழ்க்கையை முடக்கத் துணிந்துள்ளார்.

சம்பவம் நடந்த பிறகு, அந்தப் பெண்ணுக்கு ஏற்பட்ட உடல்நலக் குறைவு மற்றும் சந்தேகத்தின் அடிப்படையில் அவரது கணவர் காவல்துறையில் புகார் அளித்தார். கர்னூல் மாவட்ட போலீஸார் நடத்திய அதிரடி விசாரணையில், சிசிடிவி காட்சிகள் மற்றும் செல்போன் சிக்னல்களை வைத்து வசுந்தராவையும் அவருக்கு உடந்தையாக இருந்த 4 பேரையும் கைது செய்தனர். விசாரணையில், வசுந்தரா தனது காதலனை மீண்டும் அடைய வேண்டும் என்பதற்காகவே அவரது மனைவியை உடல்ரீதியாகச் சிதைக்கத் திட்டமிட்டதாக வாக்குமூலம் அளித்துள்ளார்.

இந்தச் சம்பவம் ஆந்திரா மட்டுமின்றி இந்தியா முழுவதையும் அதிர்ச்சியில் ஆழ்த்தியுள்ளது. காதலுக்காக ஒரு பெண்ணின் உயிரையும் வாழ்வாதாரத்தையும் இவ்வளவு கொடூரமாகச் சிதைக்க முயன்ற வசுந்தராவின் செயல் 'சைக்கோ' தனமானது என சமூக வலைதளங்களில் பலரும் கண்டனம் தெரிவித்து வருகின்றனர். தற்போது வசுந்தரா மற்றும் அவரது கூட்டாளிகள் மீது கொலை முயற்சி மற்றும் சதித் திட்டம் உள்ளிட்ட பல்வேறு பிரிவுகளின் கீழ் வழக்குப் பதிவு செய்யப்பட்டு சிறையில் அடைக்கப்பட்டுள்ளனர்.