மீண்டும் அமெரிக்க அதிபர் ட்ரம்பிடம் சரணாகதி அடைந்த எலான் மஸ்க்

மஸ்க் - டிரம்ப் 'மெகா' கூட்டணி மீண்டும் மலர்ந்தது! 2026 தேர்தலை வெல்ல ₹830 கோடி அள்ளி வீசும் எலான் மஸ்க்!

உலகின் பெரும் பணக்காரரான எலான் மஸ்க், அமெரிக்காவின் 2026 இடைத்தேர்தலில் குடியரசுக் கட்சிக்கு (Republicans) தனது முழு ஆதரவை வழங்கத் தயாராகிவிட்டார். கடந்த 2025-ஆம் ஆண்டின் நடுப்பகுதியில், அதிபர் டொனால்ட் டிரம்ப்பின் வரி மற்றும் செலவினக் கொள்கைகளை "பைத்தியக்காரத்தனம்" என்று விமர்சித்து மஸ்க் வெளியேறியிருந்தார். ஆனால், தற்போது இருவருக்கும் இடையே 'சமரசம்' ஏற்பட்டுள்ளதாகவும், வரும் நவம்பர் மாதம் நடைபெறவுள்ள நாடாளுமன்றத் தேர்தலில் குடியரசுக் கட்சியை வெற்றிபெறச் செய்ய மஸ்க் களமிறங்கியுள்ளதாகவும் தகவல்கள் வெளியாகியுள்ளன.

இந்த அதிரடித் திருப்பத்தின் ஒரு பகுதியாக, கென்டகி (Kentucky) மாநில செனட் தேர்தலில் போட்டியிடும் தொழிலதிபர் நேட் மோரிஸுக்கு (Nate Morris) மஸ்க் சுமார் $10 மில்லியன் (இந்திய மதிப்பில் சுமார் ₹83 கோடி) நிதியுதவி செய்துள்ளார். மிட்ச் மெக்கானல் (Mitch McConnell) ஓய்வு பெறுவதால் காலியாகும் இந்த இடத்தைக் கைப்பற்ற மஸ்க் காட்டும் ஆர்வம், அவர் மீண்டும் தீவிர அரசியலுக்குத் திரும்புவதை உறுதிப்படுத்துகிறது. குறிப்பாக, டிரம்ப்பின் தீவிர ஆதரவாளராகக் கருதப்படும் நேட் மோரிஸை ஆதரிப்பதன் மூலம், மஸ்க் மீண்டும் டிரம்ப் முகாமுக்குள் அடியெடுத்து வைத்துள்ளார்.

கடந்த ஆண்டு அரசுத் திறனாய்வுத் துறையின் (DOGE) தலைவராகப் பணியாற்றிய மஸ்க், வெள்ளை மாளிகையுடன் ஏற்பட்ட மோதலால் அந்தப் பதவியிலிருந்து விலகியிருந்தார். எனினும், சமீபத்தில் மறைந்த பழமைவாதச் செயல்பாட்டாளர் சார்லி கிர்க் (Charlie Kirk) நினைவேந்தல் நிகழ்ச்சியில் டிரம்ப்பும் மஸ்க்கும் சந்தித்துக் கொண்டனர். அங்கு இருவரும் கைகுலுக்கி, நீண்ட நேரம் உரையாடிய புகைப்படங்கள் இணையத்தில் வைரலாகின. இந்தச் சந்திப்பே இவர்களின் 'கசப்பான விவாகரத்தை' முடிவுக்குக் கொண்டு வந்து, மீண்டும் ஒரு அரசியல் கூட்டணியை உருவாக்கியுள்ளதாகக் கூறப்படுகிறது.

தற்போது வெளியாகியுள்ள 'நியூயார்க் டைம்ஸ்' கருத்துக்கணிப்புகளின்படி, எதிர்க்கட்சியான ஜனநாயகக் கட்சி (Democrats) 48% ஆதரவுடன் முன்னிலையில் உள்ளது. குடியரசுக் கட்சி 43% ஆதரவுடன் பின்னடைவைச் சந்தித்துள்ள நிலையில், இந்தத் தேர்தலை டிரம்ப் தனது கௌரவப் பிரச்சினையாகப் பார்க்கிறார். ஒருவேளை இந்தத் தேர்தலில் தோல்வியடைந்தால், தான் பதவி நீக்கம் (Impeachment) செய்யப்பட வாய்ப்புள்ளதாக டிரம்ப் தனது கட்சியினரை எச்சரித்துள்ளார். இந்த இக்கட்டான நிலையில்தான், மஸ்க்கின் பணபலமும் செல்வாக்கும் குடியரசுக் கட்சிக்குத் தேவைப்படுகிறது.

வெறும் நிதியுதவியோடு நிறுத்தாமல், வாக்காளர்களைக் கவரும் வகையில் டிஜிட்டல் விளம்பரங்கள் மற்றும் குறுஞ்செய்தி பிரச்சாரங்களை மேற்கொள்ள மஸ்க்கின் தொழில்நுட்பக் குழு ஏற்கனவே வேலையைத் தொடங்கிவிட்டது. டிரம்ப்பின் தீவிர ஆதரவாளர்களாக இருந்து, நாடாளுமன்றத் தேர்தல்களில் ஆர்வம் காட்டாத வாக்காளர்களை வாக்குச்சாவடிக்கு வரவழைப்பதே மஸ்க்கின் முக்கிய இலக்காகும். மஸ்க்கின் இந்த 'ரீ-என்ட்ரி' (Re-entry) அமெரிக்க அரசியலில் ஒரு மிகப்பெரிய புயலைக் கிளப்பியுள்ளது என்பதில் சந்தேகமில்லை.