"காலை வெட்டுவீங்களா? இது ரொம்ப தப்பு!" - அண்ணாமலைக்காக சீறிய சீமான்: மராட்டிய அரசியலில் பரபரப்பு!
மும்பை மாநகராட்சித் தேர்தல் களம் தற்போது தமிழக அரசியல் வரை அதிர்வலைகளை ஏற்படுத்தியுள்ளது. வரும் ஜனவரி 15-ம் தேதி தேர்தல் நடைபெறவுள்ள நிலையில், தமிழக பாஜக முன்னாள் தலைவர் அண்ணாமலை மும்பையில் வசிக்கும் தமிழர்களிடையே பாஜகவுக்கு ஆதரவாகப் பிரச்சாரம் மேற்கொண்டார். அப்போது பேசிய அவர், "மும்பை என்பது மகாராஷ்டிராவிற்கு மட்டும் சொந்தமானதல்ல, அது ஒரு சர்வதேச நகரம்" என்று குறிப்பிட்டிருந்தார். அண்ணாமலையின் இந்தப் பேச்சு மராட்டிய மண்ணின் மைந்தர்கள் அரசியலை முன்னெடுக்கும் கட்சிகளிடையே கடும் கொந்தளிப்பை ஏற்படுத்தியது.
அண்ணாமலையின் கருத்துக்குப் பதிலடி கொடுக்கும் வகையில் பேசிய மகாராஷ்டிர நவநிர்மாண் சேனா தலைவர் ராஜ் தாக்கரே, மிகவும் தரக்குறைவான விமர்சனங்களை முன்வைத்தார். "தமிழ்நாட்டிலிருந்து வந்த உனக்கும் இந்த நிலத்திற்கும் என்ன தொடர்பு? லுங்கி கட்டிக்கொண்டு மகுடி வாசித்துக் கொண்டிரு. மதுரைக்குள் மும்பை வந்தால் உன் காலை வெட்டிவிடுவேன்" என்று பகிரங்கமாக எச்சரிக்கை விடுத்தார். அதேபோல், உத்தவ் தாக்கரேவின் மகன் ஆதித்யா தாக்கரேவும், "அண்ணாமலை தேர்தலில் டெபாசிட் கூட வாங்க முடியாதவர், அவர் பிரதமரைப் போலப் பேசுகிறார்" என்று கிண்டல் செய்திருந்தார்.
இந்த விவகாரத்தில் தற்போது நாம் தமிழர் கட்சியின் ஒருங்கிணைப்பாளர் சீமான், அண்ணாமலைக்கு ஆதரவாகக் குரல் கொடுத்துள்ளார். இது குறித்துப் பேசிய அவர், "அண்ணாமலை மும்பை பற்றிப் பேசியது அவருடைய தனிப்பட்ட கருத்து. அதை ஏற்பதும் மறுப்பதும் ஒருவரின் ஜனநாயக உரிமை. ஆனால், மும்பைக்கு வந்தால் கால்களை வெட்டுவேன் என்று மிரட்டுவதை ஒருபோதும் ஏற்க முடியாது" என ராஜ் தாக்கரேவின் கருத்துக்குக் கடும் கண்டனம் தெரிவித்துள்ளார். அண்ணாமலையுடன் அரசியல் ரீதியாகப் பல கருத்து வேறுபாடுகள் இருந்தபோதிலும், ஒரு தமிழராக அவருக்கு விடுக்கப்பட்ட மிரட்டலுக்குச் சீமான் எதிர்ப்பு தெரிவித்துள்ளது அரசியல் வட்டாரத்தில் உற்று நோக்கப்படுகிறது.
மும்பை மாநகராட்சித் தேர்தலில் தமிழர்களின் வாக்குகள் வெற்றி தோல்வியைத் தீர்மானிக்கும் சக்தியாக இருப்பதால், அங்கிருக்கும் அரசியல் கட்சிகள் அண்ணாமலையின் வருகையைத் தங்கள் வாக்கு வங்கிக்கு ஏற்பட்ட அச்சுறுத்தலாகக் கருதுகின்றன. அண்ணாமலைக்கு எதிராக விடுக்கப்பட்ட இந்த மிரட்டல், தமிழக அரசியலிலும் பாஜக மற்றும் நாம் தமிழர் கட்சித் தொண்டர்களிடையே விவாதப் பொருளாக மாறியுள்ளது.