மோடியின் ஒரு போன் கால்... முடங்கிய இந்தியா-அமெரிக்கா வர்த்தகம்! ட்ரம்ப்பின் 500% வரி மிரட்டல் பின்னணி என்ன?
இந்தியா மற்றும் அமெரிக்காவிற்கு இடையே பல மாதங்களாக நிலுவையில் உள்ள வர்த்தக ஒப்பந்தம் நிறைவேறாததற்கு, பிரதமர் நரேந்திர மோடி அதிபர் ட்ரம்பை தொலைபேசியில் அழைக்கத் தயங்கியதே காரணம் என அமெரிக்க வர்த்தகச் செயலாளர் ஹோவர்ட் லுட்னிக் அதிரடி குற்றச்சாட்டை முன்வைத்துள்ளார். ஒரு பிரபல பாட்காஸ்டில் பேசிய அவர், ஒப்பந்தத்திற்கான அனைத்துக் கோப்புகளும் தயாராக இருந்தும், இறுதி முடிவை எடுக்கும் 'குளோசர்' (Closer) அந்தஸ்தில் உள்ள ட்ரம்புடன் பேச இந்தியா தயக்கம் காட்டியதாகத் தெரிவித்துள்ளார். இதனால் இந்தோனேசியா, பிலிப்பைன்ஸ் போன்ற நாடுகளுக்குக் கிடைத்த முன்னுரிமை ஒப்பந்தங்கள் இந்தியாவுக்குக் கைநழுவிப் போயுள்ளன.
தற்போது அமெரிக்காவுடனான வர்த்தக ஒப்பந்தம் இல்லாத நாடுகளுக்கு 50% வரி விதிக்கப்பட்டுள்ள நிலையில், இந்தியாவும் இந்த வரிவிதிப்பிற்கு உள்ளாகியுள்ளது. ஒருவேளை இந்தியா விரைவில் ஒப்பந்தத்திற்கு வரவில்லை என்றால், இந்த வரி இன்னும் அதிகரிக்கப்படும் என ட்ரம்ப் ஏற்கனவே எச்சரித்திருந்தார். இதன் தொடர்ச்சியாக, உக்ரைன் போருக்கு மத்தியிலும் ரஷ்யாவிடமிருந்து இந்தியா தொடர்ந்து கச்சா எண்ணெய் வாங்குவதை அமெரிக்கா கடுமையாக எதிர்க்கிறது. இதனைத் தண்டிக்கும் விதமாக, இந்தியா உள்ளிட்ட நாடுகள் மீதான இறக்குமதி வரியை 500% வரை உயர்த்தும் புதிய மசோதாவிற்கு ட்ரம்ப் பச்சைக்கொடி காட்டியுள்ளதாக அமெரிக்க எம்.பி லிண்ட்சே கிரஹாம் தெரிவித்துள்ளார்.
இந்தியாவின் 86 பில்லியன் டாலர் மதிப்பிலான ஏற்றுமதிச் சந்தைக்கு அமெரிக்கா மிகப்பெரிய நுகர்வோராக உள்ளது. தற்போது விதிக்கப்பட்டுள்ள 50% வரியே இந்தியாவின் ஜவுளி மற்றும் தோல் பொருட்கள் ஏற்றுமதியைப் பெரிதும் பாதித்துள்ள நிலையில், 500% வரி விதிக்கப்பட்டால் அது இந்தியப் பொருளாதாரத்திற்குப் பேரிடியாக அமையும் என வல்லுநர்கள் எச்சரிக்கின்றனர். ட்ரம்ப்பின் இந்த 'அதிகாரப் போர்' இந்தியாவைத் தனது ரஷ்ய ஆதரவு நிலைப்பாட்டிலிருந்து பின்வாங்கச் செய்வதற்கான ஒரு தந்திரமாகவே பார்க்கப்படுகிறது.
இருப்பினும், இந்தியத் தரப்பு இந்தக் குற்றச்சாட்டுகளை மறுத்துள்ளது. கடந்த ஆண்டில் மட்டும் பிரதமர் மோடியும் அதிபர் ட்ரம்பும் எட்டு முறை பேசியுள்ளதாகவும், வர்த்தகப் பேச்சுவார்த்தைகள் இன்னும் ஆரோக்கியமாகவே நடைபெற்று வருவதாகவும் புது தில்லி தரப்பில் தெரிவிக்கப்பட்டுள்ளது. ஆனால், லுட்னிக்கின் கருத்துக்கள் அமெரிக்கா இந்த ஒப்பந்தத்தை ஒரு 'சலுகையாக' பார்க்காமல், இந்தியாவின் பணிவை எதிர்பார்க்கும் ஒரு 'அரசியல் துருப்புச்சீட்டாக' கருதுவதை வெளிச்சம் போட்டுக் காட்டியுள்ளது.